VOV4.M'nông: Kêng măng 16/5, ta Nhih pah kan Trung ương Đảng, Tổng Bí thư Nguyễn Phú Trọng hŏ wơt Tổng thống Hy Lạp Ca-tê-ri-na Xa-kê-la-rô-pu-lu n'hanh Mpôl ntơh măt gưl têh Chính phủ Hy Lạp tât mâp dơm nkhêp geh hăn khâl ngăn Việt Nam. Tổng Bí thư Nguyễn Phú Trọng rhơn rnê Tổng thống Ca-tê-ri-na Xa-kê-la-rô-pu-lu n'hanh Mpôl ntơh măt gưl têh Chính phủ Hy Lạp khâl ngăn Việt Nam n'hanh mbah rhơn wa Ca-tê-ri-na Xa-kê-la-rô-pu-lu dơi sơch lah bu ur Tổng thống lor bôk năp bah Hy Lạp.

Tổng Bí thư tâm ôp đah Tổng thống Hy Lạp mpeh ăp nău dơi rgâl mhe, rnoh tât hun hao bah Việt Nam n'hanh gung trong tâm boh dak bah dih, nsrôih êng, ƀư tơm êng, đăp mpăn, tâm rnglăp, tâm boh n'hanh hun hao; Việt Nam lah băl, tâm boh nsing nơm, nuĭh lăp kan nsum geh nău dơn kan bah nsum mpôl lam ntŭr neh, lor nchrăp, nsrôih lăp rgum lam ntŭr neh. Bar kruanh tâm ban ŭch n'hao dăng tâm boh chính trị, ntrôl dăng nău kan nsum, tâm kơl nsum ta ăp rơh rgum nchră dak bah dih./.

Nuĭh rblang: Điểu Thân