Kêng măng 1/11, ta Nhih pah kan Trung ương Đảng, Tổng Bí thư Nguyễn Phú Trọng hŏ wơt Tổng thống Mông Cổ Ukhnaagiin Khurelsukh dôl hăn khâl gưl Ngih dak tât Việt Nam. Ta rơh wơt, Tổng Bí thư Nguyễn Phú Trọng lah rjăp: Đảng, Ngih dak n’hanh ƀon lan Việt Nam way ŭch rŏng ntrŭt ntrôl tâm boh bar ding đah Mông Cổ lah dak băl mpôl way ơm nar lơn ma hun hao ngăn ngăn lơn đŏng ta lĕ rngôch ăp trong kan, tâm di đah nău săk geh n’hanh nău ŭch geh bah bar dak. Tổng Bí thư Nguyễn Phú Trọng mpơl nău nsing nơm hăn  khâl Việt Nam bah wa Ukhnaagiin Khurelsukh  mbra rgop ntrôl dăng lơn đŏng tâm rnglăp way ơm đah bar dak, lơn lah tâm rnôk bar dak dôl ndrel rƀŏng tât nkah ndray 70 năm njêng tâm boh Việt Nam - Mông Cổ tâm năm 2024.

Kêng măng 1/11, jêh rnôk tâm nchră, Kruanh dak Võ Văn Thưởng ndrel Tổng thống Mông Cổ hŏ mâp báo chí, nkoch tât nau geh bah tâm nchră. Tâm nau dơi tâm boh vay ơm ueh, Kruanh dak ân lah, tâm rơh tât, nau tâm boh Việt Nam-Mông Cổ mra lŏ geh ƀư nâp, hun hao, rƀŏng tât ndâk nau tâm boh mhe. Ntoh nau tâm nar rƀŭn mbơh, Kruanh dak Võ Văn Thưởng, rnê, nau tâm boh kan nsum ndrel tâm boh vay ơm đah bar dak Việt Nam- Mông Cổ dôl hun hao ueh, geh dơi âk nau mhe tâm rơh êp aơ, ngăn lah tâm nau kan chính trị, neh dak, rnă njrăng ndrel văng sa. Gay leo nau tâm boh bar dak hun hao jru, ngăn ndrel săk tam lơn tay tâm rơh tât, Kruanh dak mbơh hŏ tâm ban nau kan đah Tổng thống Mông Cổ âk nau kan khlay, tâm nê tâm ban nau ntrŭt dăng nkô̆ nau n’hao rlau n’gul rnoh geh tăch rgâl bar ding hao rnoh 200 rkeh đôla tâm ăp năm ba kơi. Bah năp nê, Kruanh dak Võ Văn Thưởng ndrel Tổng thống Mông Cổ hŏ râng nau kí ton ăp nau tâm boh đah ăp n’gâng kan, ntŭk kan bah bar dak./.