Ôi ntri (11/12) ta Nkual ƀon têh Cao Lãnh, Tổng Bí thư Tô Lâm leo mpôl pah kan Trung ương ƀư tơm rơh pah kan đah Ban Chấp hành Đảng bộ n’gor Đồng Tháp mpeh nô nău tĭng ƀư Nghị quyết Đại hội XIII bah Đảng, Nghị quyết Đại hội đại biểu Đảng bộ n’gor Đồng Tháp tâl XI, năm kan 2020 - 2025; nău tĭng ƀư nău ntrŭnh 35 bah Bộ Chính trị mpeh đại hội đảng bộ ăp gưl hăn tât Đại hội đại biểu lam dak tâl XIV bah Đảng.

Lah rđău đă ta rnôk tâm nchră, lôch rnôk djăt nău mbơh n’hanh nău rgop bah nuĭh ntơh măt ăp n’gâng kan, Tổng Bí thư Tô Lâm rnê âk n’hanh nchih nkah nău nsrôih, ăp nău dơi geh ma Đảng bộ, n’gâng kan  n’hanh ƀon lan n’gor Đồng Tháp hŏ dơi geh tâm bah ri aơ nơh. Lah rjăp năm 2025 lah năm hao ngăch, đăt ndal, tât ơm, gay nsrôih geh nău dơi âk ăp rnoh ŭch tât kan bah trong nchrăp hun hao wăng sa- rêh jêng kon nuĭh 5 năm, lvang năm 2021 - 2025 n’hanh Nghị quyết Đại hội đại biểu Đảng bộ n’gor Đồng Tháp tâl XI, năm kan 2020 - 2025, Tổng Bí thư dăn đă, Ban Chấp hành Đảng bộ n’gor Đồng Tháp geh trong nkra lĕ n’hâm suan, wat jêh gay tĭng ƀư geh nău dơi nău dơn kan hun hao wăng sa- rêh jêng kon nuĭh năm 2025, rgum nsrôih tât dŭt âk ăp rnoh kan hŏ ndơ̆ luh, lơn lah ăp rnoh tât kan geh tât hun hao wăng sa, nsĭt geh bah ƀon lan.