Nkah gĭt 96 năm nar ndâk njêng Đảng Cộng sản Việt Nam, mbah rhơn lôch jêh Đại hội rơh tal 14 bah Đảng n’hanh nchrăp wơt tết Nguyên Đán Bính Ngọ 2026, ôi (10/2) Tổng Bí thư Tô Lâm lĕ tât mpoh su nhang, an nkao nkah gĭt ăp Nuĭh kruanh hăn lor bah Đảng n’hanh ăp nuĭh janh dăng lĕ roh ta Hưng Yên n’hanh Bắc Ninh.

Tâm mông nar rhăt jăp, rngot, ta Nkual nkah ndrăy Tổng Bí thư Nguyễn Văn Cừ (phường Phù Khê, n’gor Bắc Ninh), Tổng Bí thư Tô Lâm ndrel Mpôl đại biểu ryơk an nkao, mpoh nhang, nkah gĭt n’hanh plơng tay n’hâm soan, rgop têh kuăng bah đồng chí Tổng Bí thư Nguyễn Văn Cừ, nuĭh cộng sản leo lor, nuĭh kon ntoh lư bah rnoi nuĭh Việt Nam n’hanh ƀon tơm Bắc Ninh. Ta Jay nkah ndrăy Tổng Bí thư Nguyễn Văn Linh (xă Nguyễn Văn Linh, n’gor Hưng Yên), Tổng Bí thư Tô Lâm n’hanh Mpôl đại biểu an nkao, mpoh nhang nkoch nău ryơk bah năp huêng phan Tổng Bí thư Nguyễn Văn Linh, nuĭh đảng viên lôch nău rêh, tâm lơh yor nău đăp mpăn rnoi nuĭh n’hanh chủ nghĩa xã hội, nuĭh kruanh nâp nâl, mĭn ƀư mhe, leo lor “Ngơi n’hanh ƀư”, nuĭh kon hŏk blău ngăn bah Kruanh Hồ Chí Minh, nuĭh kon ntoh lư bah ƀon tơm Hưng Yên.