Tổng Công ty Điện lực miền Trung (EVNCPC) mhe an 4,2 rmen prăk bah prăk nkrem phúc lợi gay ndâk ƀư 70 mlâm jay tâm kơl ta 13 n’gor, nkual ƀon têh nkual miền Trung-Tây Nguyên tâm năm 2024. Du mlâm jay khlay 60 rkeh prăk. Aơ lah ndơ an ăp rnăk dơi kơl nău rêh jêr jŏt, nuĭh ach o, ƀon lan nkual jru ngai ŭch ntop kơl tâm năm mhe aơ.

Lvang bah năm 2019 tât năm 2023, Tổng Công ty Điện lực miền Trung lĕ ntop kơl ndâk ƀư 286 mlâm jay tâm kơl an rnăk geh nău rêh jêr jŏt. Tâm năm 2023, ntŭk kan aơ an rlău 14 rmen prăk an ăp nău ƀư đăp mpăn rêh jêng. Wa Ngô Tấn Cư, Tổng Giám đốc Tổng Công ty Điện lực miền Trung mĭn lah, trong kan đăp mpăn rêh jêng mô knŭng lah lĕ nău kan ma hôm ton ăp năm bah doanh nghiệp đah nău rêh jêng, nsum ty kơl ăp n’gâng kan mât uănh nuĭh ach o, rnăk wâl dơi kơl.