Di nkah gĭt 78 năm Nar Cách mạng khay 8 lôch uĕh n’hanh Quốc khánh 2/9, ta nkuăl n’har bri Ngọc Hồi, Hội Liên hiệp Druh ndăm Việt Nam n’gor Kon Tum tâm rgop đah Rnâng kan Mặng lưới Tình nguyên Quốc Gia nkual Tây Nguyện ƀư trong hăn “Gâp rŏng Neh dak gâp” năm 2023.

Trong rêng hvi nuih n’hâm hăn lor yor ntŭk gŭ rêh n’hanh nkoch nău mbơh mpeh nău rŏng ƀon tơm, neh dak bah rơh druh ndăm.Trong hăn “Gâp rŏng neh dak gâp năm 2023 ƀư âk nkô̆ nău khlay đah tât râng bah rlău 400 đoàn viên, druh ndăm tât bah 6 ntŭk; Dak Lak, Gia Lai, Dak Nông, Lâm Đồng, Phan Thiết n’hanh Kon Tum.

Ta ƀon Đă Mế, xă Pờ Y, nkuăl Ngọc Hồi, ndrel đah ƀư bôk nău văn hóa, njroh mprơ, tâm mâp, tâm nđŭr đah kônh wa rnoi mpôl đêt B’râu, ăp ntŭk kan lĕ an 100 dŭng đăp mpăn rêh jêng an rnăk ach o; 250 nklâm ndơ geh ba lô, sam ƀŭt nchih, ndơ dŏng nti kơl ăp oh kon hŏk nchrăp lăp năm nti mhe đah dĭng lĕ khlay ăp ndơ rlău 114 rkeh prăk. Di rơh aơ, Rnâng kan Mạng lưới tình nguyện Quốc Gia Nkual Tây Nguyên an 400 tơm mắc ca an rnăk ach o rnoi mpôl đêt geh tay nuih n’hâm gay ăp rnăk hao nkra njêng, ntơm hao rklaih luh ach o.