Khay năm mhe ta Trường Sa nklăp  lah mha êng lơn rđĭl đah ăp ntŭk lam neh dak Việt Nam. Tết lah wăch sĭt nsum, lah rnăk wâl njôm wăr,... yơn  đah nuĭh tahen dak lêng, Tết lah mông nkah jay tât ngâr dak măt bah ăp bu klo ndăm tahen mhe, lah măt  uănh dêh rmên bah nô  sỹ quan rnôk uănh păng rup rnăk wâl bah meng nsưng bĭch. N’hanh rlău ma nê, Tết đah nuĭh tahen ntŭk  gôl dak ngai ngât lah  nău n’hao êng săk, nâp ti nhŭp n’gâr phao mât njrăng đăp mpăn nkual  dak  lêng, neh dak, an nău ăp tŏng bah năm mhe ntŭk ƀon nơm tơm jay. Nău nchih bah Lan Anh - Phóng viên Radio nău ngơi Việt Nam way gŭ ta nkual Đông Bắc.

Tết tât, ta neh kơh, ăp rnăk njôm wăr nsum bah meng dông piăng, ăp nuĭh tâm nchĭnh ly ndrănh ndrel tâm dăn nsum wơt du  năm mhe uĕh lăng. Hôm ta ăp ntŭk ndru gôl dak Trường Sa, cán bộ, tahen ndrel rlai tâm mông nar khuh n’gôr wơt  năm mhe, mprơ rnê wơt năm mhe Giáp Thìn 2024.

Tết ta Trường Sa mô geh ndrănh, bia, mô n’huk mhât, mô geh pháo kao  yơn way dơi rhơn nđơr n’hanh răm mƀak bah nău tâm rŏng ndrăng băl tahen ƀon lan krêp mpêt. Nău dŭt mpŏng kâp tâm măng giao thừa ta gôl dak ngai ngât lah bôk nău kan tâm nđŭr njroh mprơ đah cán bộ, tahen n’hanh ƀon  lan. Tâm  trôm hội trường răm mƀak, ăp nuĭh  ndrel  mprơ n’gloh nău mprơ kết đoàn, mpơl  nău nsrôih mât njrăng ƀư tơm dak  lêng gôl dak huêng khlay bah neh dak. Trung Tá Đặng Văn Tài, Chính trị viên phó gôl dak Song Tử Tây an gĭt: Năm aơ lah năm tâl 2 nô wơt tết ta gôl dak.  Bol ngai rnăk wâl, yơn  ăp tơ̆ wơt Tết ta gôl dak  lah nău rhơn n’hao n’hanh rlong tă mô dơi chuêl.

Tết ta gôl dak tŏng n’hâm răm bah neh kơh njuăl tât đŏng, geh quất, đào, bánh chưng. Aơ lah nău rŏng đah ăp nuĭh ƀon lan, nuĭh kon, rnăk wâl bah neh kơh njuăl  tât tahen ta gôl dak. Aơ lah nău krêp dêh lhăt gay rgŏ jă tâm pă đah cán bộ tahen ta gôl dak nâp ti nhŭp n’gâr phao gay mât njrăng nâp ƀư tơm, dak lêng, gôl dak, n’har dak lêng bah neh dak.

Đah tahen mom lor bôk năp wơt Tết ngai jay lah nău nkah dŭt jêr chuêl  ngăn. Tâm ndơ ndrăp ndjôt hăn gôl dak bah ăp nuĭh tahen lah rup gui rnăk wâl, u che, me bơ̆. Nê lah tơm ndơ ntrôl kơl tay suan dăng kơl nuĭh tahen dăng  lơn đah nău  dơn kan ta ntŭk gôl dak ngai ngât. Tahen Hà Quang Huy (ƀon tơm ta Khánh Hòa) nkoch: Lor bôk năp wơt Tết ntŭk gôl dak  nuĭh n’hâm dŭt jêr nkoch. Yơn mom ndăm ân dơi tiăr nti n’hanh Huy dŭt n’hao êng săk mpeh nău nê.

Geh nkah đŏng yơn nău dơn kan ân ƀư lôch jêh. Gâp ŭch njuăl tât me bơ̆ n’hanh băl mpôl n’hanh yuh nô ân lơi dĭng rvê yor ta aơ geh gưl bah lơ n’hanh chỉ huy n’hanh ndrel ndrăng băl tahen kơl gâp dŭt âk nău uĕh blău đŏng. Gâp mpŏng ta jay me bơ̆ lơi dĭng rvê lôch 2 năm hăn ƀư  tahen, tĭng ƀư jăp nău dơn kan bah tahen ri gâp mbra plơ̆ sĭt đah me bơ̆”

Hôm tahen Nguyễn Hữu Em, ƀon tơm Khánh Hòa nkoch bol ma ngai jay geh nkah rnăk wâl đŏng yơn aơ lah nău Tết âk nkah uĕh tâm nău rêh bah he.

Saơ rnôk  dja geh du đêt nău rngot đŏng yơn geh oh nô  bah meng bah ir hôm rngot rnôk wơt Tết ngai jay. Ndrel đah oh nô nklâm bánh chưng, bánh tét, chŭt kao mai. Ntơm nơh gŭ  ta jay geh nuĭh tâm rnăk wâl ƀư jêng mô kâp ƀư yơn hăn tât ta aơ ƀư ndrel oh nô an rhơn mƀak. Gâp  dăn me bơ̆ têh dăng uĕh, lah geh nkah kon ri mô geh ndơ lơh ôh, ta aơ wơt Tết đah oh nô dŭt rhơn mƀak đŏng, me bơ̆ mô kâp rvê mpeh kon ôh. Dăn an me bơ̆  sa Tết rhơn mƀak, wơt du năm mhe tŏng bêng nău rhơn mƀak.

Nô Cao Văn Giáp, Groi kruanh xã gôl dak Song Tử Tây an gĭt: tahen n’hanh ƀon lan ta  gôl dak “wơt” Tết ơm, rnôk ăp  bôk duk rdeng jâk  nău rŏng bah neh kơh đah lha dru, phe  mƀêt, đah kao đào, kao mai n’hanh lĕ ma ăp chậu quất uĕh reh... Hôm măng Giao thừa, ta gôl dak rhơn mƀak ngăn đŏng, tahen ƀon lan gơm ngơi n’gôr gră tâm dăn du năm  mhe n’hâm suan ngăch lăng dăng soih n’hanh geh nău dơi.

Ta aơ ăp nô tahen n’hanh ƀon lan lah nuĭh rnăk wâl he nơm n’hanh he lah nuĭh tâm ban ma rnăk wâl bah khân păng đŏng. Mông nar Tết tâm ban kơt lam dak đŏng, mô geh ndơ khoah ôh, geh bánh chưng, geh kao mai, kao đào. Gŭ ta jay giao thừa lah njôm wăr, hôm mpôl hên lah mbah rhơn Tết ăp đơn vị, tâm ut gơm n’gôr, tâm mpăn nuih n’hâm  nsum. Geh rnôk rngot rhơn  nhim mpôl lah nkah me da dê.

Rnăk wâl, me  bơ̆, ur kon, kônh wa way lah nuĭh dâk bah kơi nsing nâp nuih  n’hâm. Đah ăp ndăm tahen mhe tâm ban kơt nê đŏng n’hanh đah ăp sỹ quan hŏ krêp dêh bar pe jât năm đah kho ao tahen tâm ban kơt nê đŏng. Thượng Tá Nguyễn Văn Khương, Chính trị viên gôl dak Song Tử Tây n’hao êng săk: Ƀon way lah ntŭk nsing nâp gay ăp nuĭh tahen gôl dak ngai rƀŏng sĭt.

Rlău ma nău mbah rhơn Tết, rlău ma nklâm ndơ ri hôm geh nklâm ndơ nkô̆ hôr khlay lah lha siƀŭt gâp nchih njuăl an ur kon gay răk lha siƀŭt nê gay gĭt năl mông nar wơt Tết bah sai he ta gôl dak ngai ngât đŏng, I bơ̆ rnôk sa Tết ngai jay, năl dơi nău tâm rŏng bah bơ̆ he.

        Nô Khương tâm ban kơt ndrăng băl tahen bah he gĭt da dê đŏng, nău ŭch rŏng bah ăp nuĭh tahen geh trong rƀŏng sĭt mpeh rnăk wâl, geh nău nkah ur kon, nkah ƀon tơm yơn lĕ rngôch yor ma nău kan mât njrăng neh dak đŏng. Yor neh dak tâm ăp nuih n’hâm nuĭh Việt lah n’hŭt răm, lah me, lah bơ̆, lah săk he nơm. Jêng, Tết đah nuĭh tahen ntŭk gôl dak ngai ngât lah nău n’hao êng săk rnôk nâp ti nhŭp mât njrăng đăp  mpăn an nkual dak lêng, nkual trôk bah neh dak, an nău tŏng ăp  bah khay năm mhe ƀon tơm neh dak Việt Nam./.