VOV4.M’nông: Bôk nau kan trong Trường Sơn Đông hăn rlet 7 n’gor miền Trung ndrel Tây Nguyên, dôl nchrăp rlet trong Vườn quốc gia Chư Yang Sin n’gor Dak Lak ndrel vườn Quốc gia Bidoup Núi Bà, n’gor Lâm Đồng. Lah bôk nau kan tơm khlay bah neh dak, hăn rlet trong tơm mpeh nau ueh nâp bri, geh mât njrăng rjăp, ngăn lah bôk nau kan ân geh ƀư rjăp ndrel nâp, tĭng di ăp nau ntrŭnh bah pháp luật. Yơn lah, nau ntrŭnh ƀư tâm nau ngăn ri mô geh kơt tĭng ăp nau ntrŭnh. Rmôt kan ƀư trong ri teng roh trong bri gay ma nkra trong hôm nŭih tơm bri ndrel n’gâng kan ri mô geh nŭih gĭt.

Tâm Tiểu khu 1383 ndrel 1402 (vườn Quốc gia Chư Yang Sin- n’gor Dak Lak) ntŭk Rnâng kan mât njrăng bôk nau kan 46, N’gâng kan tham mưu, N’gâng kan neh dak dôl ntrŭnh ƀư trong Sơn Đông mrô kan Đ41. Ta aơ, du trong jong nklăp rlau 7km, rlet koh 2 tiểu khu hŏ geh uih lâng, đah rlau 15 ha bri geh kăl khuch. Ăp bri ta trong aơ geh kuih, kuai, uih lơi neh, knŭng hôm du đê̆ tơm hôm tâm meng trong. Wa Y’ Te Bkrông, Kruanh n’gâng kan mât njrăng bri nkuăl Lắk, n’gor Dak Lak ân gĭt, mô kloh lah nau uih neh nê ntă ntơm rnôk geh. Ăp n’gâng kan bah nkuăl ndrel n’gor knŭng saơ nau kan nê tâm dŭt khay 01 mhe rlau. Wa Lộc Xuân Nghĩa, Giám đốc Vườn Quốc gia Chư Yang Sin mbơh: Ntŭk nê geh uih âk ngăn, di tâm rnôk trạm rgum ƀư nau mât ăp rnoh neh êp ntŭk ƀon lan gŭ. Nkre lah, rmôt kan kŏ mô lăng njrăng ndri ma ndrât ngăn du rmôt ƀư nau kan ngih dak lŏ ƀư kăl ntŭng bri rnôk ê geh pă săm ƀŭt kơp dơn:

‘Oh nô tâm trạm geh nau mô lăng njrăng, knŭng mĭn lah nê lah ntŭk kan ngih dạk, ri ngăn lah ƀư tâm nkuăl mpeh ba dih aơ ri gay ma mât njrăng bah bu ntŭng kăl si ƀư mir. Mpeh rnâng kan mât đah rđau kan, ăp jrâu kan bah ntŭk kan hên hăn mêt uănh ri lŏ saơ nau jêr ngăn, tâm ăp nkuăl bri krŏng ngai ê geh dơi lăp”.

Wa Võ Thành Huệ, Groi Kruanh UBND nkuăl Lắk (n’gor Dak Lak) lah rjăp, rmôt kan nkra trong Trường Sơn Đông hŏ mô geh tâm nchră ma Vườn quốc gia Chư Yang sin. Wa Huệ mbơh, 15 ha bri mhe geh kăl rnôk aơ ê geh nau ntrŭnh đă ƀư rgâl jêng nau dơi dŏng neh, yor nau dơi ntrơn rgâl geh dơi bah Thủ tướng Chính phủ ân. Nkuăl uănh aơ lah nau tih pháp luật ndrel dôl tâm rgop đah ăp ntŭk kan bah n’gor uănh, ƀư kloh:

‘Ăp rmôt kan mô geh nchră bah n’gâng kan tâm nkuăl, ê geh ƀư nau ntrơn rgâl, ri ma knŭng leo máy móc, dnơ dŏng lăp ƀư ri kơt nê lah tih ăp nau ntrŭnh bah ngih dak. Nkuăl hŏ jao ân N’gâng kan mât njrăng bri mêt uănh, pah kan đah rmôt tơm bri lah Chư Yang Sin, mbơh tât n’gâng kan tuch tăm ndrel hun hao ƀon lan, ntŭk kan mât njrăng bri bah n’gor gay ma geh nau ntĭm rđau”.

Wa Nguyễn Quốc Hưng, Kruanh n’gâng kan mât njrăng bri n’gor Dak Lak mbơh, ntŭk kan rmôt kan ƀư nau kan kăl bri tâm rnoh ƀư nau kan Đ41 bah bôk nau nkra trong Trường Sơn Đông, yor Rnânh kan mât njrăng bri 46 (N’gâng kan kơl nchră nau, n’gâng kan neh dak) ƀư tơm nau kan ntoh măt ntuh kơl. Aơ knŭng lah ngoai tâm âk nau kan bah bôk nau nkra trong Trường Sơn Đông, nchrăp geh rnoh jong nklăp 36km đah âk ha neh bri mât njrăng bah Vườn quốc gia Chư Yang Sin ŭch geh rgâl. Wa Hưng lah rjăp, n’gor Dak Lak ndrel n’gâng kan tuch tăm ndrel hun hao ƀon lan hŏ ntĭm mbơh kloh gay Rnâng kan mât njrăng bôk nau kan 46 ƀư ăp nau ntrơn rgâl neh bri. Yơn lah, rnôk ê geh ƀư jêh ăp nau kan, ê geh ân ƀư ntrơn rgâl ri rmôt kan hŏ leo uih neh bri. N’gâng kan dôl tâm rgop nsum đah ăp ntŭk kan mêt uănh, ƀư kloh nau kăl bri tih pháp luật:

‘N’gâng kan mra geh nau dơi tâm rgop mpeh âk ding nau kan gay ma uănh năl tâm ntŭk, uănh ntŭk nê gay geh nau rklaih tĭng nau ntrŭnh, tĭng Luật mât njrăng bri, tĭng ăp nau ntrŭnh. Nau aơ ri mô hôm geh mhal prăk tay ôh, tâm 5 sào bri tuch tăm hŏ geh mhal tih hình sự hôm, ma ta aơ ri rlau 15 ha bri mât njrăng”.

Mbơh ma phóng viên Radio Việt Nam, du rđau kan bah Rnâng kan mât njrăng bri 46 mbơh, đah nau kan tâm ntŭk aơ tâm âk khay, rnôk aơ dôl ma uănh kloh nau kan gay ma mbơh ân n’gâng kan neh dak. N’gâng kan mra geh mbơh, ơh nau báo chí jêh rnôk geh nau ntrŭnh đă bah N’gâng kan.

Mô êng knŭng uih bri vườn quốc gia Chư Yang Sin gay ma nkra trong Trường sơn đông, nau ntŭng kăl bri ƀư trong kŏ geh tâm Vườn quốc gia Bi doup Núi Bà (n’gor Lâm Đồng). Tâm bôk nau kan Đ42 ndrel C13 bah bôk nau kan, du trong jong âk km đah âk trong neh bri chăt mhe hŏ geh kăl roh hêng.

Tĭng nau ntrŭnh, bri ƀư nau kan geh mât njrăng lah bri geh mât ân rjăp ngăn, nau ntrơn rgâl ân geh nchră luh bah Quốc hội, Chính phủ. Nau kan leo nkra trong Trường Sơn Đông rŏng ma ntŭng kăl êng si mô êng knŭng tih nau ntrŭnh ma hôm njêng trong leo têh ƀư jêng nau ntŭng kăl si ndrel in sŏk tơm si tâm ăp Vườn quốc gia Chư Yang Sin ndrel Bi Doup Núi Bà./.

Nŭih rblang: H’Thi