VOV4.M’nông- Ôi nar 22/8, kruanh Quốc hội Vương Đình Huệ lĕ leo rơh rƀŭn nchră uănh năl nău ngăn ƀư tĭng nău nchrăp mbrô 81 bâh UBTV Quốc hội khóa 15 n’hanh mbơh tơih bôk nău kan rdâk njêng Luật, pháp lệnh. Ta rơh rƀŭn nchră, kruanh Quốc hội Vương Đình Huệ an lah nău ƀư tĭng nglôch lôch pah kan bâh Bộ chính trị n’hanh nău nchrăp bâh Ủy ban rnâng kan Quốc hội bơi tât 1 năm ba năp lĕ geh nău geh dŭt âk n’hanh khlăy. Nău kan leo ƀư mbơh ƀư pah kan tâm di, ngăch ndăn n’hanh geh săk rnglăy. Tât aƀaơ, Quốc hội lĕ ntrŭnh geh 6 Luật, 8 Nghị quyết.

Ủy ban rnâng kan Quốc hội lĕ geh ntrŭnh 2 pháp lệnh n’hanh 2 Nghị quyết. Nchrăp rơh rƀŭn nchră Quốc hội tal 4 tay mbra geh uănh n’hêl 7 nău nchrăp Luật, 1 Nghị quyết n’hanh uănh n’hêl rơh bôk năp 7 nău nchrăp Luật êng. Kruanh QH dăn đă ntŭk kan geh tât an geh uănh njrăng tât nău ueh di ăp nău nchrăp Luật, mât đăp mpăn nău kan đah ăp trong kan lập pháp hôm e bâh năm kan, an geh rgâl mhe tay trong pah kan tâm rgop, sŏk nău tâm rgop bâh ƀon lan, mât nâp kỷ luật, kỷ cương n’hanh an geh mât njrăng nău sa nkhiăn sa ƀer, nău geh nsum ta trong rdâk njêng pháp luật.

Nuĭh rblang: Thị Đoắt