Ôi aơ 23/, ta ntŭk kan Quốc hội, ủy ban rnâng kan Quốc hội ntơm lăp rơh tal 2 bâh rơh rƀŭn nchră tal 37. Tâm ôi aơ, ủy ban rnâng kan Quốc hội an tâm rgop mpeh nău nchrăp Luật Thuế tăch rgâl khlăy êng. Nău dŭt nkah lah, nău nchrăp Luật thuế tăch rgâl khlăy êng geh ntrŭnh: Rnoh thuế tăch rvăt khlăy êng đah ntil ndơ ndrănh, bia mbra ntơm geh dŏng rnoh thuế hao mbro bâh ntơm năm 2026 n’hanh tât năm 2030 mbra geh hao thuế tât 100%. Ta rơh tâm nchră rgop nău nchrăp Luật thuế tăch rvăt êng mhe rgâl mhe yor Hiệp hội Doanh nghiệp ntuh kơl dak bah dih tâm rgop đah báo Đại biểu Nhân dân ƀư mhe aơ, ăp nuĭh way kan, ndơn kan doanh nghiệp lĕ geh mbơh tơih ăp nău dăn đă gay ma mât đăp mpăn nău dơi đah chính phủ n’hanh doanh nghiệp. Tĭng nĕ, ăp doanh nghiệp tâm ban nău mĭn bâh Đảng n’hanh Ngih dak tâm nău dŏng rnoh kơl thuế tăch rvăt khlăy êng gay ma mât săk soan an ƀon lan, bah ir geh dŏng ăp ntil ndơ mô ueh an săk soan kơt lah ndrănh bia, mhât su.