Nchrăp ôi tay (3/6) Rơh hop tâl 20 bah Ban rđău đă gưl neh dak njrăng, n’gang nuh srê Covid-19 hop pơk sŏng dăng đah ăp n’gor. Ta rơh hop dja mbra tâm nchră, uănh năl n’hanh hăn tât mbơh lĕ nuh srê Covid-19 ta Việt Nam. Bah năp nê, mhe aơ Thủ tướng Chính phủ Phạm Minh Chính rđău đă Bộ Y tế nchrăp siƀŭt rgâl nuh srê Covid-19 bah nău ji ntưp rêng rmôt A jêng rmôt B (jêng bah rmôt dŭt klach rvê mha êng jêng geh ma nău ntưp rêng âk, lam hvi, rnoh khĭt âk jêng rmôt nău ji ntưp rêng klach rvê geh ma nău ntưp rêng ngăch, mbra jêng geh khĭt) n’hanh hăn tât mbơh lĕ nuh srê ta Việt Nam. 

Bah nău tă ơm gĭt kan ngăn ngăn, rlău ăp rơh rdâng lơh nuh srê, ăp đại biểu quốc hội n’gâng kan dak si an lah: Việt Nam mbra mô hôm rvê mbơh lĕ nuh srê Covid-19, yor hŏ tŏng ăp ndơ. Việt Nam hŏ geh tŏng 3 nău dơi tơm, khlay gay mô hôm rvê mbơh lĕ  nuh srê Covid-19. Nê lah rnoh âk nuĭh ji jru tă  bah Covid-19 lơh kơt lah mô hôm geh. Ăp nuĭh khĭt lơn âk tă bah nuĭh ơm geh nău ji tâm săk geh ntưp đah Covid-19, an saơ nha hôm ntưp rêng tâm lam nuĭh yơn mô hôm klach rvê, lơh jêng khĭt âk. Bah meng nê, Việt Nam geh rnoh âk nkrum vắc xin dŭt lam hvi. Hŏ geh 266 rkeh dĭng chuh an nuĭh ntơm bah rlău 12 năm deh đah 2 n’glai tơm, n’glai tâl 4 hŏ dơi chuh an nuĭh rlău 18 năm deh geh ma nău ntưp âk. Rlău ma nê, nô nău nuh srê Covid-19 lam ntŭr neh hŏ đăp mpăn. Bôk khay 5-2023, Nhih pah kan dak si lam  ntŭr neh mbơh Covid-19 mô hôm lah nô nău jăch ndăn lam ntŭr neh./.