Mỹ ton tâm pă nău lư n’hanh trong ƀư dŭt uĕh an đah Việt Nam gay hŭch đêt n’hanh bên di đah rgâl duh nđik trôk nar. Nê lah nău lah rjăp bah Bộ trưởng Tuch tăm Mỹ Thomas Vilsack ta rơh mâp báo chí kêng măng 19/4, ta Hà Nội, nkhêp geh hăn pah kan tât Việt Nam.

Hăn khâl gŭ tâm ăp rêng kan nkah ndray 10 năm njêng tâm boh lam lĕ rngôch Việt Nam – Mỹ, rƀŏng tât rdâk uĕh tâm boh bar ding, nkre ƀư jru hvi tay tâm boh tăch rgâl đah bar dak. Ta rơh mâp báo chí, Bộ trưởng Tuch tăm Mỹ Thomas Vilsack lah rjăp, tâm boh Mỹ - Việt Nam dôl nar lơn ma jêng jru hvi, lơn lah kơp ntơm bah lôch bar dak njêng tâm boh lam lĕ rngôch. Mpeh nău pơk hvi trong tăch rgâl đah bar dak, lơn lah tâm trong kan tuch tăm mât rong, wa Vilsack hŏ pah kan đah ăp nhih pah kan geh tât gay joi trong tăch n’gluh ăp ntil ndơ mhe bah Mỹ tât Việt Nam n’hanh bah Việt Nam tât Mỹ .