Ôi lơ 8/8, ta ntŭk kan Quốc hội, mpôl kan uănh nđôi mpeh bôk nău kan “nău ƀư tĭng nău kơl, pháp luật mpeh mât uănh ntŭk tăch rgâl neh ntu n’hanh hun hao ngih jay gŭ ta ntŭk rêh jêng năm 2015 tât lĕ năm 2023” rƀŭn nchră rơh tal 1.

Mpôl kan uănh nđôi bôk nău yor Groi kruanh rnâng kan QH Trần Thanh Mẫn ƀư tơm, ndrel đah 3 groi kruanh leo kan, 22 nuĭh kan ndrel n’hanh du đê̆ đại biểu, nuĭh way kan geh jă. Nkô̆ nău uănh nđôi lah uănh năl ăp nău geh, nău mô dơi, nău jêr, kŏ văk, rhoăt luh nău tă gĭt kan, mbơh dăn ăp trong kan n’hao an săk rnglăy ƀư tĭng nău kơl, pháp luật mpeh mât uănh ntŭk tăch rgâl neh ntu n’hanh ngih jay ta ntŭk rêh jêng. Đah hun hao ngih jay gŭ, uănh nđôi rgum ta bôk nău kan, nău nchrăp, ăp trong kan hun hao ngih jay gŭ ta ntŭk rêh jêng; nuĭh kơl, nău dơi dơn kơl an mpeh ngih jay gŭ ta ntŭk rêh jêng... Ntoh ngơi ta rơh rƀŭn nchră, Groi kruanh rnâng kan Quốc hội Trần Thanh Mẫn lah na nê̆ aơ lah bôk nău uănh nđôi têh bâh Quốc hội, đă an ăp nuĭh kan ndrel nsrôih tât râng tâm nchră, tâm rgop nău dăn đă gay ma nău nchrăp kan uănh nđôi, mbơh tơih nău geh uănh nđôi n’hanh  Nghị quyết mpeh nău geh uănh nđôi bôk nău kan geh nău geh ueh ngăn ngên.