Ta rơh rƀŭn tal 8, HĐND n’gor Lâm Đồng khóa 10, năm kan 2021-2026 lĕ ntơm nklăch phiếu săch wa Võ Ngọc Hiệp mât ƀư Groi kruanh UBND n’gor Lâm Đồng.

Tĭng nĕ, rơh rƀŭn tal 8 HĐND n’gor Lâm Đồng khóa 10 lĕ mbơh an nkoch nuĭh kan n’hanh ăp đại biểu HĐND nklăch phiếu săch ntop tay Groi kruanh UBND n’gor khóa 10 năm kan 2021-2026. Wa Võ Ngọc Hiệp, Kruanh Ủy ban MTTQVN n’gor Lâm Đồng dơi săch nău kan aơ đah geh 54/55 phiếu.

Ăp đại biểu HĐND n’gor an nkao mbah rhơn ăp đồng chí mât dơn ta nău kan mhe.

Bah năm 2010 tât aƀaơ, wa Võ Ngọc Hiệp mât ƀư ăp nău kan: Kruanh UBND nkual ƀon têh Đà Lạt, Kruanh N’gâng kan Công thương n’gor Lâm Đồng n’hanh Kruanh Ủy ban MTTQVN n’gor Lâm Đồng. Ndrel đah nău săch ntop Groi kruanh UBND n’gor, ăp đại biểu HĐND n’gor Lâm Đồng lĕ nsơr ty mbơh an, Nghị quyết mpeh nău mô săch du đêt nău kan đại biểu tĭng ŭch êng n’hanh tĭng nău đă tâm pă dơn nău kan di trong ƀư.