VOV4.M’nông: Ta rơh rƀŭn tal 2 Quốc hội gưl 15, mbơh nau rgum ăp nau đă bah cử tri ndrel ƀon lan njoăl tât Quốc hội yor Bí thư Trung ương Đảng, Kruanh  Uỷ ban Trung ương MTTQ Việt Nam Đỗ Văn Chiến mbơh kloh: Cử tri ndrel ƀon lan ngăn ngên uănh khlay tât nau kan njrăng, rdâng srê Covid-19. Đă ân geh nau rklaih, geh nau ƀư jŏ jong mpeh nau kan vắc xin, ngăn lah vắc xin chuh ân nŭih tâm dâng 18 năm, uănh rklaih nau kan, nau kơl an nŭih sĭt tâm n’gor tă bah nkuăl geh srê ơm geh kan pah ndrel đăp mpăn nau rêh. Nkre nâp mpeh nau ntĭm nti trực tuyến ân kon se ăp gưl nti.

            Cử tri ndrel ƀon lan tâm ban nau kơl an Đảng, Quốc hội, Chính phủ hŏ ntrŭnh âk nau ntrŭnh rđau đă nau kan njrăng rdâng srê đah nuih n’hâm “njrăng srê kơt njrăng phung rlăng”, n’gân n’hâm soan, nau rêh bah ƀon lan hao ba lơ, lor. Ăp nau kan geh mât đăp mpăn nau rêh, geh dŏng, ƀoi tĭng, nkhah êng, mât chăm dak si ân ƀon lan geh rklaih nkre ta ntŭk đah nau ƀư “hăn tât ăp ngih, goh ăp mpông, kơp tĭng ăp nŭih”. Nau kan ndrel ăp nau ƀư njrăng, rdâng srê geh ntrŭnh tâm rơh rlau aơ lah nau ueh, geh dơi ăp nau khlay đah nau ƀư ngăch, rjăp tâm nau rđau kan. Yơn lah, cử tri ndrel ƀon lan hôm rvê ngăn đŏng:

            ‘ Cử tri ndrel ƀon lan ân lah, nau kan njrăng rdâng srê hôm du đê̆ nau ê dơi. Nau mbơh nchrăp geh rnôk ê tâm dăch ma nau ngăn. Geh rnôk, geh ntŭk hôm thơ tha, ê nâp blau, ê rjăp, mô geh nau tâm ban tâm nau rđau kan, đă rklaih ăp nau tât ngăn, ndal. Hôm nau ê dơi tâm mbơh năl nau kan gay ma ntrŭnh ân geh nau tâm ban ăp nau kan gleh kŏ kơt lah nau jong nkre njrăng, rdâng srê, nkre hun hao văng sa, rêh jêng. Nau ntrŭnh âk nau rđau đă, tâm nê geh du đê̆ nau ntrŭnh ê tâm dăch ma nau ngăn, mô tŏng nau tam ƀư, lơh jêr ân ƀon lan ndrel ntŭk kan. Ntrong kan ngih dak si tâm dâng ndrel nau blau rđau mât kan ăp gưl hôm geh nau ê blau, kơt lah ăp ndơ dŏng, dak si, sinh phẩm, vắc xin...kŏ rvăt ê năn, ndrât, prăk dŏng âk”.

            Cử tri hôm rvê yor GDP 9 khay năm 2021 mô geh nau dơi nau nchrăp, nau pă prăk ntuh kơl nsum mbrơi, du đê̆ nau kan văng sa, rêh jêng khlay tâm năm 2021 deh rđil nau ntrŭnh bah Quốc hội. Nsum mpôl ƀư nau kan tăch rgâl ŭch Chính phủ, ăp nkuăl ân geh nau kan ân năn leo tăch ndoh ndơ, nchuăn rdeng ndoh, ndơ dŏng gay mât ân nâp nau kan ê nkra, tăch rgâl, geh nau kan kơl an mpeh soay, n’huch ăp rnoh prăk dŏng kan, prăk manh neh, ntoch jong, n’huch prăk kon ngân hàng, geh nau kơl an mât rnoh nŭih pah kan...gay ntŭk kan dơi ndâk tay, hun hao ê nkra.

            Cử tri nkoch âk nŭigh hôm mâp nau jêr ma ê geh ndơn ăp nau kơl an tâm nau rêh, nau ƀư hôm kol, jêr, nau pă tơm prăk dŏng kan mbrơi, âk ntŭk ƀon lan hôm mâp nau jêr yor srê, yơn ê geh kơl, hôm nau ndăn sa êng tâm nau kơl nŭih, lơh jêr, ƀư ji nuih tâm ƀon lan. Cử tri rvê mpeh nau nâp, nau săk tam bah nau ntĭm nti ndrel nti trực tuyến, ngăn lah đah kon se nti nti ntơm jrâu 1-5; nau kan geh mâp dŏng đah ndơ điện tử mra khuch ngăn tât n’hâm soan bah kon se.

            Rmôt kruanh Uỷ ban Trung ương MTTQ Việt Nam đă Quốc hội, Chính phủ, ăp ntŭk kan, n’gâng kan, nkuăl ân geh ƀư ơm ngăn nau rƀŭn ncgră bah Rnâng kan rđau nau kan Trung ương Đảng tal 4 mpeh nau njrăng, rdâng srê Covid-19 ndrel ndâk, hun hao văng sa, rêh jêng. Wa Đỗ Văn Chiến, lah kloh:

            ‘Rklaih nau kan, geh nau ƀư jŏ jong mpeh nau dŏng vắc xin, ngăn lah vắc xin chuh ân nŭih tâm dâng 18 năm, n’hai nau ntuh kơl an nau kan dak si tâm dâng ndrel nau kan dak si njrăng rdâng, ndâk nau kan công nghệ dŏng nsum tâm lam dak tâm nau njrăng, rdâng srê Covid-19; uănh khlay nau rklaih ân kloh ăp nau kan mpeh nau rêh jêng, kan pah, nau rêh bah ƀon lan; Leo ndơ dŏng dak si, sinh phẩm xét nghiệm tâm rnoh ndoh ndơ Ngih dak mât đăp mpăn rnoh. Uănh kơl an rklaih ăp nau kan, kơl an nŭih sĭt tă bah nkuăl geh srê ơm đăp mpăn geh kan pah ndrel nau rêh. Nchră uănh ăp mpeh nau nâp tam bah nau ntĭm ndrel nti trực tuyến ân kon se ăp gưl nti, geh nau nchrăp nti ntop tay, ntop nau blau ân kon se, ngăn lah kon se ntơm jrâu 1-5”.

            Rmôt kan Kruanh Uỷ ban Trung ương MTTQ Việt Nam kŏ đă ntrŭnh nau rgum mpeh nau ndâk ndrel hun hao văng sa, ơm rklaih đăp mpăn nau kơl an prăk, ntrŭt dăng ntŭk ƀư kan, nŭih ƀon lan ntuh kơl hun hao văng sa, mô tăch gưl nau pă, dŏng, tăch, geh nau đăp mpăn nŭih kan ân ăp ntŭk, ăp nhoat rklaih kơl ngih gŭ ân công nhân tâm ntŭk pah kan, n’huch nau ăp ntŭk ƀư kan nsrŭng nau kan, lŏ geh nau nkân rnoh hao khlay ndơ, đăp mpăn ân văng sa ơm ndâk, hun hao.

            Jêh rơh ntơm rƀŭn, Quốc hội hŏ djăt nau mbơh nau tă geh mêt uănh tâm nau rklaih, ơh nau đă bah ƀon lan njoăl tât rơh rƀŭn tal 11, Quốc hội gưl 14. Kruanh Rnâng kan ƀư nau kơl an ƀon lan bah Quốc hội Dương Thanh Bình, mbơh, bah ăp nau mâp cử tri, hŏ geh 807 nau đă geh rgum njoăl tât ăp ntŭk rklaih. Nau đă geh tât nau rêh, tâm nê lŏ geh âk nau ma cử tri ŭch: Ntŭk ntu gŭ âm, nau kơl an nŭih geh n’hâm, nŭih poah kan, kan pah, nau rêh, tuch tăm, ƀon lan kan lŏ mir, ƀư ntrong kan ndrel nau kơl an đah cán bộ, công chức...Tât rnôk aơ, 100% nau đă geh ơh. Wa Dương Thanh Bình kŏ mbơh nau đă, tâm nê geh nau đă ăp ntŭk kan Quốc hội n’hao lơn tay nau uănh nau ƀư quy phạm pháp luật, uănh ăp nau kan mhe geh tât nau rêh bah ƀon lan:

            ‘Ăp rmôt kan ntoh măt Quốc hội ân geh n’hao prêh ân nâp lơn nau rgum, rklaih nau đă bah cử tri, năn ntrơn njoăl tât ăp ntŭk kan geh nau dơi rklaih tĭng nau ntrŭnh bah pháp luật. Êng nê đă Chính phủ rđau ăp ntŭk kan bah Trung ương kơp, rklaih nau đă dôl tâm rnôk rklaih ƀư, đăp mpăn rklaih ân nâp, tâm di nau kan. Nkre, n’hao nau nâp nau ndâk nau kan, ƀư jêh pháp luật, n’hao nau ndâk njêng nau ntrŭnh bah quy phạm pháp luật, đăp mpăn nau tâm ban tâm ăp nau ntrŭnh mbơh bah pháp luật”./.

                                    Nŭih rblang: H’Thi