VOV4.M'nông: Mhe aơ nơh, nău an ƀư trong kơl rnoi mpôl đê̆ hŏ geh ăp nău dơi khlay. Tâm nê ân nkoch tât nău hun hao lam lĕ rngôch n'gâng kan ntĭm- nti ta nkual rnoi mpôl đê̆ n'hanh mpeh yôk yang. Bol mô hŏ têh uĕh ngăn yơn ân tŏng dơi đah nău ŭch geh ntŭk ntĭm n'hanh nti.  

Nhih nti phổ thông dân tộc bán trú tiểu học Nậm Búng xã Nậm Búng, nkuâl Văn Chấn, n'gor Yên Bái lah ntŭk nhih nti mhe njêng khay 4 năm 2021. Aơ lah ntŭk gŭ rêh n'hanh kơt nti bah ăp oh kon nuĭh rnoi mpôl đê̆ ta nkuâl. Nhih nti mhe, kloh uĕh, nsưng mpan gŭ nti rvăt mhe nê lah nău rhơn mô dơn đah nai ntĭm n'hanh kon se gŭ nti bah nhih nti ma nê lah nău rhơn bah me bơ̆ geh oh kon tĭng nti đŏng. Aƀaơ khân păng mbra đăp mpăn njuăl oh kon yor ăp oh kon mô hôm ji kăt srŏ nđik bah khay sial puh, krŭl duh bah khay wai kơt ta nhih nti ơm. Tĭng nai ntĭm Nguyễn Văn Du, Groi Hiệu trưởng bah nhih nti ri aƀaơ đah ăp oh kon nuĭh rnoi mpôl đê̆ gŭ rêh wăr nê ri nhih nti mhe dja tŏng dơi đah nău gŭ rêh n'hanh kơt nti bah ăp oh kon se nti. Yơn bah meng ăp nău dơh uĕh ri hôm geh jêr jŏt đah nai ntĭm n'hanh kon se nti bah nhih nti Nậm Búng dja đŏng.

“Trong dak dŏng bah ăp kon se ri hôm manh sŏk bah rnăk ƀon lan đŏng, si ƀŭt giáo khoa ri 100% ăp oh mon ân rvăt êng ma nău rêh bah nuĭh ƀon lan nkual yôk prêh dŭt jêr jŏt. Nhih nti dơn n'grŏ rŏ me bơ̆ kon se nti lah ntuh kơl lơn lah đah bar môn toán n'hanh tiếng việt, hôm si ƀŭt ƀa ƀă lah nti tĭng ndrôm si ƀŭt bah nai ntĭm nti yor mô dơi rvăt êng. 60% ăp mon mô geh ndơ ma rvăt geh ăp tŏng ăp ntil ndrôm si ƀŭt".

Wa Nguyễn Văn Tiến, Kruanh xã Tiên Nguyên, du xã nkual yôk prêh bah nkuâl Quang Bình, n'gor Hà Giang an gĭt: Lah gay đăp mpăn ăp tŏng ntŭk gŭ sa kơt nti an nai ntĭm n'hanh kon se nti ta ăp ntŭk nhih nti ta xã ri bôk năp hŏ dơi ăp tŏng, yơn i ngăn ri geh drăp ndơ dŏng hôm pah pât mô ăp tŏng, lơn lah jrô nti n'hanh ăp jay rgum pâl nsum. Ŭch nkra têh hvi tay tâm ban kơt ƀư mhe tay ri prăk ƀư mô geh, tơm ndơ rgum tâm ƀon lan jêr đŏng yor kônh wa lah nuĭh rnoi mpôl đê̆ mô geh ndơ ma rgop, ndơ ntop kơl. Yor kơt nê̆, dŭt ŭch geh nău lăp kan bah ăp rơh kơn, ăp gưl n'gâng kan gay mhâm ƀư săk blău ntĭm n'hanh nti ta nkual yôk prêh hôm âk jêr jŏt.

“Jrô nti hôm mô tŏng, jrô hop, jrô way dŏng kan mô ăp tŏng ơm. Bar pe năm bah năp nơh xã way rgum ndơ rgop bah me bơ̆, cán bộ.. yơn n'gul ntưm tôn dơm mô di lah nâp jŏ kơt ndơ bah ngih dak ƀư. Đăp mpăn nâp uĕh hôm, jrô nti ân tŏng ăp bôk năp hôm, yơn gay tât di rnoh ri mô hŏ dơi geh, hôm mô ăp tŏng, ân manh jrô pah kan bah ăp nai ntĭm, nchop nchep lhăt ngăn".

Mô tŏng ndrôm si ƀŭt giáo khoa, mô tŏng jrô gŭ nti, ăp jrô kan mât bôk kan nê lah ăp nkô̆ nău ma ăp ntŭk nhih nti ta nkual jru, nkual ngai, nkual rnoi mpôl đê̆ dôl hôm mâp geh đŏng. Yơn đah nău mât uănh bah Ngih dak ma ăp trong kan ngăn ngăn, geh nău tam ndrel đah nău ntop kơl bah ăp tơm ndơ rgop lam rêh jêng kon nuĭh mô jŏ ngai, nkô̆ nău dja geh ƀon mbra dơi nkra. Gay mhâm ƀư ăp kon se nti, ăp me bơ̆ kon se đăp mpăn geh dơi du nhih nti dŭt uĕh, đăp mpăn an n'gâng kan tăm nuĭh ma Đảng n'hanh Ngih dak he dŭt uănh khlay./.

VOV4- Nuĭh rblang: Điểu Thân