VOV4.M'nông: Tâm gŭ ur sai mô hŏ tŏng năm deh, tâm gŭ ur sai hôm dăch ndŭl mham ƀư khuch an tay bah kơi mô jêng săk đah nău rêh bah mô đêt nuĭh rnoi mpôl đê̆. Tâm gŭ ur sai hôm dăch ndŭl mham jêng hêng rnoi deh. Ăp kon se mhe deh way geh ăp nău ji ơm bah ndŭl me, lơn lah ăp nău ji geh tât mham; bôk rngok kon se way mô ngăch blău, săk jăn dêh, brêt...ăp nău tât khuch dja an tay bah kơi tât nău rêh rhơn răm bah rnăk wâl, săk geh nău kan...aơ lah ngoăy tâm ăp nkô̆ khlay jêng tât nău ji ngot ach o tâm ƀon lan rnoi mpôl đê̆ đŏng.

Ndrel du ndŭl deh n'hanh mhe 16 năm deh yơn yuh La Thị Hoa n'hanh nô La Văn Nam nuĭh Đan Lai ta ƀon Cò Phạt xã Môn Sơn nkuâl Con Cuông, n'gor Nghệ An hôm tâm bĭch nsum đŏng. Kon bu ur dak bôk bah khân păng hŏ 2 năm deh, yơn ntơm bah rnôk ntơm luh bah ndŭl me mon hŏ geh nău ji ơm tâm săk hôm. Yuh La Thị Hoa an gĭt:

Gâp n'hanh sai tâm mâp nsum saơ tâm kơnh nsum ri tâm bĭch nsum dơm. Me bơ̆ ŭch an đŏng, hên sĭt gŭ nsum n'hanh deh kon mô hŏ tă geh nđăp nsao ôh. Ntơm nơh tăng nkoch gâp n'hanh sai gâp lah oh nô đŏng, yơn mô chrău ôh tâm bĭch nsum dơi đŏng".

Nău kon se nti Đan Lai ntlơi nti n'gul wah pah trong gay gŭ joi sai ri ăp năm geh da dê đŏng, kon bu ur rlău 14 năm deh mô hŏ geh sai dơi uănh lah hŏ lăn ranh hôm. N'hanh nău mĭn tâm bĭch ur sai dơh ntơ dơm đŏng, kon se tâm kơnh nsum lah bu kuâng đă nuĭh hăn ôp wăng dĭl, lôch ƀư ôp wăng ƀư kuăt ndrôi sĭt tâm gŭ nsum dĭl, hôm nđăp ri moh rnôk ƀư dơi đŏng. Yuh La Thị Nga ta ƀon Cò Phạt an gĭt, nău tâm gŭ ur sai mô tŏng năm deh n'hanh tâm gŭ ur sai hôm dăch ndŭl mham lah nău mô geh mha êng.  

“Khân păng ŭch tâm gŭ ur, bĭch sai, pha lah dơm, ntơm nơh dah năm khân păng nê gâp hŏ geh kon hôm đŏng, mô kơp băl mpôl oh nô ôh, oh nô tâm bĭch nsum lơn ma dăch, khân păng tâm ŭch ri an khân păng sĭt tâm gŭ nsum lôch nê deh kon, geh său, mô hôm tâm ŭch ri tâm ntlơi sĭt gŭ đah me bơ̆".

Nuĭh tâm gŭ ur sai mô tŏng năm deh n'hanh tâm gŭ ur sai hôm dăch ndŭl mham bah du đêt ur sai nuĭh Đan Lai ta Con Cuông, n'gor Nghệ An lah du nău nkoch dŭt mbơh njrăng lor mpeh nău tâm gŭ ur sai n'hanh n'hâm suan deh nse, yor păng têk nkre dŭt âk nău khuch an tay bah kơi, geh tât săk geh rnoh nuĭh. Tĭng nău nkoch bah wa Nguyễn Thị An - Giám đốc HealthBridge Canada ta Việt Nam, aƀaơ nhih pah kan dôl an ƀư du trong nchrăp kan mât chăm n'hâm suan ta n'gor Sơn La ri nău dja hŏ khuch dŭt âk tât săk geh nău rêh.  

"He saơ dŭt kloh lah săk geh rnoh nuĭh khuch dŭt âk tât năm deh kon se mô hŏ tŏng năm deh, mô hŏ dâk têh ndăm gay ma kranh lĕ rngôch săk jăn hŏ deh kon dĭl ri jêng tât khuch an kon dŭt âk lĕ mpeh săk brêt rgay an tât nuih n'hâm, ntop đah rnôk nê lah yor ăp kon se tâm gŭ ur sai ơm, ri kon se bu ur way ntlơi nti n'hanh jêng tât mô geh nău gĭt blău, mô gĭt mpeh nău rêh rnăk wâl, trong mât chăm oh kon. Lah trong rval rvah rvăch tay ri jêng tât an khuch tay bah kơi hôm du bông nău rêh bah kơi tay đŏng jêng tât rvah rvăch tay kơt nê̆ lơn ma ƀư rnoh tât khuch jru lơn".

Nô nău tâm gŭ ur sai mô tŏng năm deh n'hanh tâm gŭ ur sai hôm dăch ndŭl mham khuch dŭt têh tât săk geh nău rêh. Ăp kon se mhe deh geh ntoh âk nău ji, mô tŏng kah ndơ sa, mô tŏng geh ndơ mât chăm tơm bôk năp. Aơ lah nkô̆ jêng tât hŭch hêng rnoi deh, khuch tât rnăk wâl tâm ban kơt lam rêh jêng kon nuĭh. Ndrĭ, nău nkoch trêng, mô lah ndơ năp nău gĭt blău an me lah nău kan ân dơi uănh khlay dŭt mha êng./.

Việt Phú/VOV4- Nuĭh rblang: Điểu Thân