VOV4.M’nông: Mhe aơ, Uỷ ban Rnâng kan  Quốc hội hŏ nchră nau ntrŭnh mrô 268 mpeh nau pă săm ƀŭt ân Chính phủ ntrŭnh nau ntrŭnh geh ăp nau kan tĭng nkô̆ nau êng rđil nau ntrŭnh bah luật gay tŏng dơi nau njrăng, rdâng srê Covid-19. Tĭng nê, Chính phủ ntrŭnh nau khlay ngăn ndrel ndal tâm rnôk srê Covid-19 dôl geh nar lơn ma khuch, jêr rdâng tâm âk n’gor, nkuăl ƀon têh.

            Tĭng nê, Uỷ ban Rnâng kan Quốc hội tâm ban nau đah nau ntrŭnh bah Chính phủ gay dơi ƀư ăp nau ndal tâm nau njrăng, rdâng srê Covid-19. Ngăn lah,  Chính phủ dơi ân nau ntrŭnh ndâk ntŭk rgum, săm ân nŭih ntưp srê Covid-19 nkre lah nau pă săm ƀŭt ân ƀư nau kan. Jao ân n’gâng kan dak si geh nau ntrŭnh ăp nau kan hành chính tâm nau ntrŭnh tĭng nau dơi rhuăt gleh gay ma tŏng dơi nau đă ndal bah nau kan njrăng, rdâng srê. Rnâng kan Hội đồng nhân dân ndrel nau mbơh bah Hội đồng nhân dân ta tơh rƀŭn êp ngăn. Đah nau ntrŭnh mpeh nau trok prăk khám săm ji ân nŭih ntưp srê Covid-19 tâm ăp ntŭk săm rgum, săm nŭih ji srê Covid-19 yor tơm prăk ngih dak đăp mpăn tĭng nau dŏng ngăn, Chính phủ lŏ rđau ƀư nau ntĭm mbơh mpeh tơm prăk ngih dak geh nau dơi trok tâm lĕ rnoh prăkl khám, săm ji geh tât nau săm srê Covid-19. Wa Đỗ Đức Duy, Rmôt kan ntoh măt Quốc hội n’gor Yên Bái ân lah, nau ntrŭnh mrô 268 hŏ ƀư ân ngăn năn ăp nau kan geh jao tâm nau ntrŭnh bah Quốc hội mpeh nau njrăng srê, leo nau ntrŭnh lăp tâm nau rêh:

            ‘Nau aơ hŏ ntoh nau tâm ban nau hăn nsum leo kan bah Quốc hội ndrel Chính phủ kŏ kơt lah gĭt kloh ngăn ndrel kơl an ngăn bah Quốc hội ndrel Chính phủ, đah nŭih ƀon lan lam dak. Phung hên rnê prêh ngăn nau rđau nchrăp kan, blau ueh bah Kruanh Quốc hội ndrel rđau kan Quốc hội, tâm ban đah nau kan ngăn bah srê Covid-19”.

            Srê Covid-19 đah ăp nau tât jêr rdâng, hŏ ndŏ luh ăp nau jêr mhe tâm nau rklaih pă kan pah, kơl an nau rêh ƀon lan. Gay dơi rlet rlau ăp nau jêr bah srê ji, ŭch geh ăp nau kan ân năn, tâm di, nau tơm nâp kŏ kơt lah nau nsôih kơl an bah Ngih dak ơm tât đah ƀon lan. Cử tri ndrel ƀon lan lam dak tâm ban nau ndrel rnê prêh ngăn Uỷ ban Rnâng kan Quốc hội năn nchrăp nau ntrŭnh 268. Wa Nguyễn Thị Hoài Linh-Cử tri ta Hà Nội, ntoh nau:

            ‘Nau aơ ân saơ Quốc hội ndŏ nau rêh, n’hâm soan bah ƀon lan hao ba lơ lĕ, đăp mpăn nau rêh jêng ƀon lan, mât chăm n’hâm soan ndrel nau rêh bah ƀon lan. Phung hên saơ geh nau đăp mpăn ngăn ndrel rnơm tâm nau ntrŭnh, ntrong kan bah Quốc hội ndrel Chính phủ tâm nau rđau kan njrăng, rdâng srê Covid-19 rnôk aơ”.

            Tĭng wa Trịnh Xuân An, ntoh măt Quốc hội n’gor Đồng Nai, nau kan Uỷ ban Rnâng kan Quốc hội năn ntrŭnh nau ntrŭnh mrô 268 ntrŭnh n’hêl du đê̆ nkô̆ nau kan êng êng đah nau ntrŭnh bah pháp luật rnôk aơ hŏ năn doh rklaih mpeh nau kan pháp lý gay ma rdâng ân geh săk tam ngăn đah srê ji:

            ‘Njrăng rdâng srê ân geh ăp nau ntrŭnh ân ueh, năn, rjăp ndrel ntoh nau kan bah năp ƀon lan. Aơ lah nau kan dŭt n’hâm tâm di kơp n’ăp ma chính trị ndrel pháp lý, geh ƀon lan ndrel ăp ntoh măt Quốc hội rnê prêh, ntoh nau blau, ngăch, ƀư nâp kan, hăn nsum bah Quốc hội ndrel Chính phủ  tâm nau kan njrăng rdâng srê. Nkô̆ nau kan nê lah ăp nŭih yor nau geh jêng bah ƀon lan, ăp nau yor đăp mpăn ndrel hun hao bah neh dak”.

            Hôm wa Nguyễn Thanh Hải-ntoh măt Quốc hội n’gor Thái Nguyên ri ân lah, nau kan bah Uỷ ban Rnâng kan Quốc hội ntrŭnh nau Rnâng kan hội đồng ƀon lan jai nau ntrŭnh ăp nau kan tâm nau dơi bah hội đồng ƀon lan ndrel nau mbơh bah Hội đồng ƀon lan ta rơh rƀŭn êp ngăn ân geh đăp mpăn tâm di đah rnôk âk nkuăl dôl ƀư nau njrăng rdâng srê nâp nâl kŏ kơt lah n’huch nau rgum âk nŭih, ƀư nau tâm nkhah nŭih:

            ‘Phung hên kŏ nsing tâm nê gay ma ndâk ăp nau kan ngăn lơn ân ăp nkuăl phung hên, gay ma njêng luh ăp nau kan kloh nơih lơn ma dơi tâm ăp nau ntrŭnh bah pháp luật kŏ kơt lah Luật njrăng rdâng srê rnôk aơ ê geh ntrŭnh pă ăp ntil ndơ dŏng dak si tâm nau njrăng rdâng srê mhâm ƀư ntrŭnh pă nau kan njrăng rdâng ân ueh lơn, săk tam lơn ndrel n’huch ăp ntil săm ƀŭt ƀư nau kan yơn kŏ mô geh tih ăp nau ntrŭnh bah pháp luật”.

            Ngoai tâm ăp nau ueh ngăn lah Quốc hội jao nau kan ân Chính phủ, Thủ tướng Chính phủ ntrŭnh ndrel ƀư ân dơi ăp nau kan ê geh luật ntrŭnh mô lah hôm êng đah ăp nau ntrŭnh tâm ăp luật, pháp lệnh rnôk aơ gay ma tŏng dơi nau đă kan ndal bah nau kan njrăng rdâng srê Covid-19./.

                        Nŭih rblang: H’Thi