VOV4.M’nông: Đah nŭih ƀon lan ach o, nau kan ân geh manh prăk gay ma ntuh kơl ƀư nau kan tuch tăm mô di lah nau nơih, yor khân păng mô geh drăp dnơ khlay, mô lah ngih vâl, mir ba ê geh pă săm ƀŭt kơp dơn nau dơi dŏng neh ri mô geh ndơ ma nchăm. Ăp năm rlau aơ, Ngân hàng chính sách xã hội hŏ jêng ntŭk ndơn kơl an, pơk trong nơih ân âk rnăk geh manh prăk, ntuh kơl hun hao tuch tăm, ăp nhoat jut n’huch ach o.

Wa Trần Đình Ý leo phung hên hăn chop mir tơm táo tâm ntŭk mhe tăm bah nơm. Wa Ý dŏng nklăp 800 mét vuông gay ma tăm táo. Táo geh tăm tâm nê mô geh bu tuh chuh sa, ndri ma mô geh dŏng dak si pu mât njrăng tơm tăm ôh. Wa Ý mbơh, năm e tâm du tơm táo geh 100kg play, bu tât rvăt tâm mir păng rnoh ntơm 20-25 rbăn/kg, Nkŭp lơi prăk ntuh kơl, du tơm wa hôm geh du rkeh. Geh dơi mir tăm aơ rnơm tơm prăk bah Ntŭk kan Ngân hàng chính sách xã hội nkuăl Buôn Đôn. Ndrel tơm mir táo, wa Ý hôm geh prăk gay ma tăm tơm bŭng, cà phê ndrel tiêu, nau geh bơi tât 100 rkeh du năm, ri ma păng hŏ rklaih luh bah rnoh moh săk rnăk ach o. Wa Ý hŏ geh ndâk ngih nâp ueh, kŏ geh rvăt máy tính ân kon păng mhe lăp nti jrâu 6, nti trực tuyến. Wa Ý nkoch: Bol ma ê geh ndrŏng, yơn nau rêh geh kơt aơ lah nau ma păng mô mâp tă geh janh mĭn rnôk lăp ƀư nau kan tâm Thôn Ea MThar 3, Xã Ea Nuôl, nkuăl Buôn Đôn aơ:

‘Dơi geh manh prăk bah Ngân hàng Chính sách tât ri kŏ ntơm bah tơm prăk manh nê gâp hŏ ntuh kơl ƀư ngih, ngih bil aơ gay ma tăm tơm táo. Ân tât rnôk aơ ri saơ nau săk tam păng ueh ngăn. Knŭng tâm du năm gâp hŏ dơi trok prăk manh bah Ngân hàng chính sách đah rnoh prăk manh bôk năp. Gâp tăm hŏ geh 4 năm hôm, kơp luh ri du tơm geh du rkeh tâm du năm”.

Wa Đào Danh Canh, Kruanh rmôt ân manh prăk ta Thôn Ea M’Thar 3, xã Ea Nuôl mbơh, rmôt kan bah wa geh 40 nŭih. Khân păng lah rnăk ach o, êp ach o mô geh ndơ gay ma nchăm đah ngân hàng êng gay ma manh prăk ntuh kơl. Ăp năm rlau aơ, rnơm tơm prăk bah ngân hàng chính sách ma ăp rnăk aơ tŏng nau dơi gay ăp nhoat jut n’huch ach o, khân păng trok lĕ prăk manh:

‘Kônh wa ndơn geh prăk manh gay ma ntuh kơl tâm nau tăm cà phê ndrel ma tiêu, mât rong ndrôk ndrel be hŏ geh săk tam ngăn. Kônh wa hŏ blau rklaih ach o, du đê̆ rnăk hŏ geh trok prăk tơm ân ngân hàng chính sách”.

Yuh H’ Ly Kbuôr, tâm ƀon Ko Edung A, năm aơ 31 năm. Gŭ sai hŏ bơi tât 10 năm, yơn mô geh neh tuch tăm ri ma nau rêh ur sai khân păng mô geh ndơ tâm ngih truh sat. Bah rnôk aơ 5 năm, geh manh 30 rkeh tă bah tơm prăk ngân hàng chính sách xã hội, yuh H’Ly hŏ rvăt cà phê sĭt tăm ndrel rvăt 2 mlâm ndrôk ntil rong. Rnôk aơ hôm ma hôm lah rnăk ach yơn lah rđil ma ntơm nơh, nau rêh bah rnăk yuh hŏ mô hôm nau pah pât kơt ntơm nơh ôh:

“Rnôk aơ, rnăk gâp geh 8 mlâm ndrôk, gâp hŏ tăch 3 mlâm hôm, kŏ geh 23 rkeh ndrel rnôk aơ hôm 5 mlâm. Gâp dăn lah ueh Đảng, Ngih dak hŏ pơk trong ndrel kơl an gâp geh manh prăk gay ma hun hao văng sa ndrel geh nau rêh ueh lăng lơn”.

Wa H’Nhát Byă, kruanh rmôt ân manh prăk bah ƀon Ko Edung A, mbơh: rmôt bah păng geh 70 nŭih. Ăp nŭih tâm nê kŏ geh tơm prăk ân manh dŏng tâm di nkô̆ nau kan lah rvăt phân poh gay ma sui ân tơm tăm, rvăt ndrôk gay ma rong. Ê geh nŭih trok prăk kon mbrơi tâm ăp khay ôh:

‘Rnôk aơ, nŭih ƀon lan tâm rmôt hên geh manh prăk ngân hàng chính sách, ngih dak pơk trong kơl an ndrel pă tơm prăk ân ƀon lan rvăt ndrôk, rvăt sur, tăm cà phê. Ăp rnăk vâl ta aơ rong đê̆ ngăn ntơm 3-4 mlâm ndrôk, khân păng nsôih rong ndrel manh tay tơm prăk tă bah ngân hàng chính sách ngih dak gay ma hun hao văng sa. Ŭch lah tâm rơh tât ngih dak mra lŏ pơk trong nơih pă âk lơn tơm prăk gay ma kônh wa geh tơm prăk pah kan jan sa, ăp nhoat jut n’huch ach o”.

Võ Khắc Huy, Giám đốc ntŭk kan Ngân hành chính sách xã hội nkuăl Buôn Đôn, mbơh: Rnôk aơ geh 9.480 rnăk, tâm nê 4.900 rnăk ƀon lan rnoi mpôl đê̆, geh nau manh prăk đah rnoh 342 rmen prăk. Ăp nê lah ăp rnăk kŏ geh dŏng tơm prăk geh tâm di nkô̆, hun hao dơi nau kan jut jăng ach o, ndri ma rnon mô dơi trok, rnon rlau khay manh knŭng 236 rkeh, geh rnoh 0,6%. Ăp dĭng lĕ ăp nŭih aơ mbrơi trok, rnon mô geh trok yor lah geh trôk nar lơh mô lah khuch yor srê nuh:

‘Ngân hàng chính sách geh âk nau kan gay ma n’huch nau jêr ân nŭih nach dŏng đah ăp nau nchrăp tay nar trok, ân manh tât năm ba kơi. Lah nŭih mô dơi trok ngăn ri phung hên mra ân khân păng rnon tay tĭng nau ntrŭnh bah Ngih dak. Êng nê đă đah Ngân hàng ba lơ lah n’hao tay tơm prăk yor lah bah năp nau tât jêr kơt nê ri ƀon lan ŭch ngăn tơm prăk manh aơ”.

Nŭih rblang: H’Thi