VOV4.M'nông: Trong rƀŏng tât bah bôk nău kan neh dak mpeh hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030 lah nuĭh ƀon lan dơi dŏng nău geh bah bôk nău kan, nkre mât uĕh săk geh, dơh soih bah nkual; ntrŭt ntrôl nuih n'hâm nsrôih ndôr êng nsan hao bah ƀon lan gay nkual rnoi mpôl đê̆ n'hanh mpeh yôk yang hun hao ngăch, nâp dăng. Gay dơi tât rnoh kan dja, nkô̆ nău rgum tơm nuĭh kan, wăch rgum ntuh kơl tĭng ƀư bôk nău kan dơi Quốc hội, Chính phủ êng uănh khlay.

Nghị quyết bah Quốc hội uănh an dŏng bôk nău kan rnoh tât gưl neh dak mpeh hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030 ntrŏng dŭt kloh lah: rgum ăp tơm ndơ ntuh kơl hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang, tâm nê tơm ndơ ngih dak mât tơm khlay n'glêh an gay rgum ăp tơm ndơ êng ƀa ƀă. Aơ lah du ntŭk dŭt mhe, dŭt khlay yor trong kơl ân geh tơm prăk ngân sách ăp tŏng. Măt êng, ăp n'gor nkual rnoi mpôl đê̆ n'hanh mpeh yôk yang lah n'gor jêr jŏt mha êng da dê. Yor kơt nê̆, tơm ndơ kơi ntop bah Trung ương lah du tơm ndơ an geh lor gay dơi tât rnoh kan.

Yơn lah, tâm rnôk tơm ndơ bah ngih dak hôm mâp âk jêr jŏt tă bah nuh srê COVID, ân rgum tay tơm ndơ lam rêh jêng kon nuĭh gay bôk nău kan gưl neh dak dơi tât rnoh hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030 dơi tĭng ƀư geh nău tam. Ta rơh hop bôk năp Quốc hội khoá 15 mhe aơ, nuĭh ntơh măt Bố Thị Xuân Linh, mpôl Bình Thuận dăn đă:

Gay đăp mpăn geh nău dơi n'hanh nău tam bah  bôk nău kan, Chính phủ geh trong nkra na nê̆ đăp mpăn tŏng ăp tơm prăk năn ngăch n'hanh ăp kôp tĭng trong joi âk tơm prăk. Tâm nê tơm prăk ngih dak lah tơm khlay n'hanh geh nkô̆ nău n'glêh an. Ntrôl dăng wăch rgum ăp tơm ndơ bah dih ngân sách. Ntrŭt nsôr nău tât râng rgop bah nuĭh ƀon lan gay tĭng ƀư rnoh tât bôk nău kan tĭng nău way ngih dak n'hanh ƀon lan ndrel ƀư. Nkre tâm rnôk an tĭng ƀư hôm uănh khlay ntĭm nti na nê̆ nău ndop ăp tơm  prăk gay tĭng ƀư ăp rnoh tât kan gưl neh dak hun hao wăng sa rêh jêng kon nuĭh nkual rnoi mpôl đê̆ geh nău dơi tam."

Nău n'hao dăng rgum tơm ndơ dak bah dih an bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021-2030 êng dơi uănh khlay đŏng. Ngân hàng lam ntŭr neh ta Việt Nam hŏ mbơh ngăn mpeh nău Ban Thư ký Prăk nkrem tâm boh ntĭm nti lam ntŭr neh (GPE) ntêm an Chính phủ Việt Nam rnoh kơl dơm 25 rkeh đôlar n'hanh nsing nơm an Ngân hàng lam ntŭr neh mbra lah tơm ndranh bah rnoh prăk kơl dja an Việt Nam. Ủy ban Dân tộc rdâk njêng trong nchrăp tâm boh kan nsum đah Bộ Kế hoạch Đầu tư, Bộ Tài chính gay nsŏng kơl an Chính phủ dŏng 25 rkeh đôlar prăk kơl dơm bah GPE, gay kơi ntop ndơ an manh dăn đă 150 rkeh đôlar bah Ngân hàng lam ntŭr neh gay kơi ntop an tĭng ƀư bôk nău kan gưl neh dak hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021-2030.

Bah meng nê, Thủ tướng Chính phủ mhe uănh an dŏng Đề án ntoch jong năm khay tĭng ƀư nău n'glêh an mbrô 2214 mpeh nău uănh an dŏng Đề án "N'hao dăng tâm boh dak bah dih ntop kơl hun hao wăng sa- rêh jêng kon nuĭh nkual rnoi mpôl đê̆" tât năm 2025, đah nău ŭch nkrum lam gay n'hao dăng tay tâm boh wăch rgum ăp tơm ndơ ntuh kơl, khoa học kỹ thuật, nău tă ơm gĭt kan bah ăp dak, ăp mpôl kan dak bah dih, nsum mpôl, êng nuĭh ta dak bah dih, ntop kơl ntuh kơl hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang. Ăp trong kan an ƀư lor bah Đề án nkre đah nkô̆ rnoh ŭch tât kan gưl neh dak hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030.

Na nê̆, nkra nău mô tŏng neh gŭ, jay gŭ, neh tuch tăm, dak dŏng bah rnăk rnoi mpôl đê̆; hun hao tuch tăm mât rong, si gle, mât uĕh săk geh, dơh uĕh bah ăp nkual gay ƀư jêng geh ndơ tăch tĭng rêng rnoh khlay. Ntuh kơl ntŭk ntô ndơ dŏng tơm khlay, rhŏ an pah kan tuch tăm mât rong, nău rêh tâm nkual rnoi mpôl đê̆ n'hanh ăp nhih pah kan ngih dak mpeh rnoi mpôl đê̆; ntuh kơl hun hao ntĭm nti nkual rnoi mpôl đê̆ n'hanh mpeh yôk yang n'hao săk geh tơm nuĭh kan lah nuĭh rnoi mpôl đê̆; ntuh kơl gŭ mĭn khoa học n'hanh ndơ̆ rgâl công nghệ tâm ăp trong ntĭt leo tâm rgop kan tĭng rêng rnoh khlay. Mât ndray, mpư n'hao rnoh khlay văn hoá way ơm uĕh lăng bah ăp rnoi mpôl đê̆ nkre đah hun hao pâl nđaih; mât chăm n'hâm suan ƀon lan, n'hao têh jong săk, suan dăng nuĭh rnoi mpôl đê̆; njrăng n'gang brêt rgay kon se; tĭng ƀư tâm ban bu ur bu klô n'hanh nkra ăp nkô̆ nău jăch ndăn khlay đah bu ur n'hanh kon se...

Đề án nsrôih tât năm 2025, wăch rgum lĕ săk geh tơm ndơ dak bah dih, lơn lah tơm ndơ kơl dơm, tơm ndơ ntop kơl hun hao ngăn n'hanh tơm prăk an manh dơh. Rgŏ jă, wăch rgum ntuh kơl dak bah dih ntop kơl hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang nsing ta nău ŭch geh n'hanh ngăn ngăn, săk geh n'hanh dơh uĕh bah tĭng n'gor, tĭng rnoi nuĭh, kalơ nău way mât ndray n'hanh hun hao ăp rnoh khlay, săk tơm văn hóa way ơm uĕh lăng bah ăp rnoi nuĭh; mât njrăng ntŭk gŭ rêh neh ntu bri dak. Rgŏ jă ntop kơl kỹ thuật bah ăp mpôl kan, ăp nuĭh dak bah dih ntop kơl n'hao nău dơi kan an nuĭh ƀon lan hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang; công chức, viên chức tĭng ƀư pah kan rnoi mpôl đê̆ ăp gưl ntơm bah trung ương tât tâm n'gor./.

(VOV 4)- Nuĭh rblang: Điểu Thân