VOV4.M’nông: Ê tât du khay đŏng dơm lah geh rơh rƀŭn bôk năp bah Quốc hội gưl gưl 15. Mô knŭng ƀư rjăp mpeh rnoh nŭih, rơh rƀŭn aơ hôm uănh du đê̆ nkô̆ nau khlay êng. Ndri ma, Kruanh Quốc hội Vương Đình Huệ đă ân geh lŏ rgâl mhe rơh rƀŭn bôk năp Quốc hội gưl 15 tĭng trong n’huch mông mbơh, n’hao nau nkoch uănh nau ân tâm di, gay ăp ntoh măt Quốc hội geh mông uănh ndrel rgop nau.

            Tĭng nau nchrăp, rơh rƀŭn bôk năp, Quốc hội gưl 15 mra pah kan tâm 11 nar n’gul. Tâm nê, Quốc hội dŏng 5 nar ân nau kan săch nŭih, dŏng 4 nar n’gul gay uănh nau mbơh ndrel du đê̆ nkô̆ nau êng ndrel du kêng măng ân nau nchrăp, hôm e lah nar ƀư nau kan êng, lôch rƀŭn ndrel nchrăp tay du nar lah geh nau êng tât.

            Ta rơh rƀŭn, ăp nŭih kan bah Uỷ ban Rnâng kan Quốc hội tâm ban nau ƀư rơh rƀŭn tal bôk năp, Quốc hội gưl 15 geh tâm măng 20/7 tât, đah nau ƀư nar rƀŭn mpeh rnoh nŭih lor ndrel nchră ăp nŭih kan êng ba kơi. Ri aơ lah rơh rƀŭn bôk năp đah gưl âk ngăn lah nau kan mpeh rnoh nŭih, ân geh rƀŭn mbơh sŏng. Tâm nê, geh nklăp 50 ntoh măt ndrel âk mpưm cán bộ nŭih kan kơl an Quốc hội, phóng viên báo chí. Yor ri, ăp nŭih kan bah Uỷ ban đă: Ân geh nchrăp ân nau njrăng rdâng srê Covid-19 ân nâp. Tâm nê, ƀư nau chuh vắc xin njrăng rdâng srê Covid-19 ơm ân ăp ntoh măt ndrel rmôt kơl nau kan…uănh đê̆ ngăn 2 tŏ lor ma lăp rƀŭn. Êp nê, nkah đă ăp ntoh măt Quốc hội ân n’huch nau mâp rnôk rƀŭn, yor lah chuh vắc xin hôm geh ntưp ji. Ndri ma, ân geh njrăng ngăn rnôk râng rƀŭn tal bôk năp gưl 15. Mpeh nar ƀư rƀŭn bôk năp, Quốc hội gưl 15, Kruanh Quốc hội Vương Đình Huệ ndŏ nau:

             ‘Rnoh nar ân geh uănh tay gay ma geh ntrŭnh. Ta rơh rƀŭn bôk năp, Quốc hội gưl 14, 10 nar knŭng ƀư ăp nau kan mpeh rnoh nŭih pah kan ndrel ntop tay nau mbơh văng sa rêh jêng tơm prăk 6 khay, lah lôch. Hôm rơh rƀŭn aơ, bah nơm ân geh âk nkô̆ nau êng, nau aơ nơm ân geh kơp ân rjăp, rơh aơ ân geh ntop tay nau nchrăp 5 năm, geh nau nchrăp hun hao văng sa rêh jêng 5 năm, nchră nau nchrăp kan 5 năm lor, ndrel gay ân Quốc hội uănh ntrŭnh nau nchrăp hun hao văng sa rêh jêng 5 năm 202-2025, ndrel nchrăp tơm prăk 5 năm. Kơp ân năp, mô ân dơi gưl kan bah năp ƀư nchâp tâm gưl kan aơ”.

             Kruanh Quốc hội Vương Đình Huệ kŏ đă ân geh lŏ rgâl mhe nau kan bah rơh rƀŭn tal bôk năp bah Quốc hội gưl 15 tĭng trong n’huch lơi mông ƀư nau mbơh, n’hao mông mbơh nau kan ân tâm di, gay ăp ntoh măt Quốc hội geh mông nar uănh ndrel rgop nau.

            Mpeh nkô̆ nau, ndrel đah nau kan mpeh nŭih pah kan, ta rơh rƀŭn aơ, Quốc hội uănh nau mbơh mpeh nau nchră nau tă ƀư nau nau nchrăp hun hao văng sa rêh jêng, tơm prăk ngih dak 6 khay bôk năm ndrel ăp ntrong ƀư nau nchrăp hun hao văng sa rêh jêng, tơm prăk ngih dak 6 khay dŭt năm 2021, ân ƀư nau ntrŭnh tơm prăk ngih dak năm 2019, uănh, nchră ăp nau ntrŭnh bah Quốc hội mpeh bôk nau ndâk njêng luật, pháp lệnh năm 2022, rgum nau dŏng neh ntu lvang năm 2021-2030 ndrel nau dŏng neh bah lvang năm 2021-2025.

            Ta nar rƀŭn tal 57, Uỷ ban Rnâng kan Quốc hội mhe rlau, ăp nŭih kan kŏ rgop nau mpeh Bôk nau kan mêt uănh bah Quốc hội, uỷ ban Rnâng kan Quốc hội năm 2022. Tĭng nê, ăp nŭih kan bah Uỷ ban Rnâng kan Quốc hội tâm ban nau uănh, nau rgum nchră nau ntrŭnh kan, nau ƀư kơl an nau mêt uănh geh nsum ma ăp nau ntoh luh geh ntoh măt cử tri uănh njrăng. Ăp nŭih kan bah Uỷ ban rnâng kan Quốc gội tâm ban nau săch 4 tâm 6 nkô̆ uănh mbơh Quốc hội ndrel Uỷ ban Rnâng kan Quốc hội. Ntoh nau ta nar rƀŭn, Groi Kruanh Quốc hội Đỗ Bá Tỵ lah rjăp:

             ‘Ndrel ma nau kan mêt uănh nsum bah Quốc hội, đă Hội đồng dân tộc ndrel ăp uỷ ban ƀư ueh nau ntrŭnh nau mbơh, ăp nkô̆ nau kan hôm ntoh luh ân geh ƀư kloh nau kan bah ăp nŭuh, mĭn njêng gay ƀư ăp rơh rƀŭn mbơh ƀư kloh, lŏ rgâl mhe ntrŭnh ăp rmôt kan mêt uănh tâm rgop ƀư nau kan mêt uănh, n’hao nau nâp bah Uỷ ban Rnâng kan Quốc hội”.

            Yor nar ntơm rnôk aơ tât nar rƀŭn mô hôm âk, tâm rnôk hôm âk nau kan ân geh ƀư, ndri ma, Kruanh Quốc hội đă ăp ntŭk kan geh tât nchrăp tâm rgop uănh, nsôih nchrăp ăp nkô̆ nau geh tât nau kan bah nơm, mât đăp mpăn ân nâp, ơm njoăl săm ƀŭt tât ăp ntoh măt Quốc hội. Tĭng Kruanh Quốc hội Vương Đình Huệ, jêh rơh rƀŭn 57, Uỷ ban Rnâng kan Quốc hội knŭng rƀŭn du tŏ dơm gay uănh ăp nkô̆ nau hôm e mra geh ndŏ Quốc hội tal bôk năp, tâm nê geh ăp nkô̆ nau kan khlay geh tât nau nchrăp hun hao văng sa, rêh jêng, nau nchrăp tơm prăk, tơm prăk kan, nchrăp nau ntuh kơl rgum 5 năm…Kruanh Quốc hội đă Chính phủ ndal njoăl săm ƀŭt ngăn bah ăp nkô̆ nau geh tât ăp ntŭk kan bah Quốc hội gay ma uănh./.

                                                Nŭih rblang: H’Thi