VOV4.M’nông - Groi Thủ tướng Rnâng kan Chính phủ Trương Hòa Bình mhe n’glôn jêh mpeh rơh rƀŭn Ban ntĭm rđău Trung ương bôk nău kan rƀŏng tĭng lam dak Hun hao wăng sa-rêh jêng nkual ƀon lan rnoi đêt n’hanh nkual yôk lvang 2021-230. Groi Thủ tướng jao an Ủy ban Dân tộc, N’gâng kan Kế hoạch n’hanh Đầu tư n’hanh ăp n’gâng kan, nău kan ƀon lan geh tât geh nău kan tâm rgop uĕh, nsrôih lôch jêh ăp nău kan dơi jao tŏng ăp ngăch di, nchrăp mbơh ƀư bôk nău kan bah khay 10/2021, Di rơh aơ, nuĭh nău an Đài TNVN ôp wa Hầu A Lềnh-Kruanh n’gâng kan, Chủ nhiệm Ủy ban Dân tộc mpeh bôk nău kan khlay aơ.

                   - Dăn mbah rhơn wa lĕ dơi Quốc hội uănh an săch ƀư Kruanh n’gâng kan, Chủ nhiệm Ủy ban Dân tộc ! đah nău khlay nuĭh kruanh trong kan ngih dak ƀư pah kan rnoi mpôl, wa dôl mĭn âk mpeh nău tâm ôp tâm nchră kơl Chính phủ gay mât uănh tay n’hanh mât uănh uĕh lơn an ƀon lan rnoi mpôl đê đŏng ?.

         Wa Hầu A Lềnh:  “Mpôl hên uănh năl, bôk năp lah nsrôih gay tĭng tay ăp rơh cán bộ, kruanh, kơt rmôt cán bộ ƀư pah kan rnoi mpôl đêt tâm 75 năm bah năp gay n’hao đah ăp ngih pah kan n’gâng kan, nău kan Trung ương n’hanh tâm ôp an Đảng gay geh ăp nău ntrŭnh, nău kơl dŭt n’hâm khlay, mhe aơ, n’hanh mbơh ƀư săk rnglăy ăp nău ntrŭnh, nău kơl nĕ. Lơn lah Nghị quyết mrô 88 Quốc hội mpeh uănh an bôk nău rgop an tâm nchră lĕ rngôch hun hao wăng sa rêh jêng nkual rnoi mpôl đêt n’hanh nkual yôk tâm lvang tât”.

Wa Hầu A Lềnh-Kruanh N’gâng kan, Chủ nhiệm Ủy ban Dân tộc

         - Hơi Kruanh n’gâng kan bah n’hêl na nê̆ nău rêh n’hanh tâm rnôk pah kan ri wa mĭn m’hâm mpeh nău geh tât n’hanh nău dơi hun hao bah nkual yôk, nkual prêh đŏng ?.

         Wa Hầu A Lềnh:  “Rlău jêh nti nsơm pah kan n’hanh hun hao nău kan ta nkual rnoi mpôl đêt, mpôl hên gĭt saơ nkual rnoi mpôl đêt lah nkual dŭt n’hâm êng. Aơ lah nkual geh dŭt âk nău dơi hao, mpeh wăng sa, mpeh văn hóa rêh jêng, mât njrăng bri dak rnă njrăng n’hanh ntŭk geh âk nău uĕh blău ơm rnoi mpôl dŭt âk n’hanh uĕh. Âk nău dơi hao nĕ lĕ dơi Đảng Ngih dak mĭn lah gay ŭch n’hao nău rêh drăp ndơ n’hanh nuih n’hâm an nuĭh ƀon lan. Yơn lah, bah meng ăp săk rnglăy dơi geh ri hôm e dŭt âk jêr jŏt. Lơn lah mpeh ntung trong ngih wâl, ntĭm nti, gĭt blău nkra njêng, ƀư nkra njêng n’hanh tăch ndoh ndơ bah kônh wa”.

         - Tĭng wa, moh trong mkra bôk năp tâm di lvang aƀaơ gay geh jâng nsan an ăp nkual dôl tâm ntŭk jêr jŏt hun hao mêh ?

         Wa Hầu A Lềnh:  “Mpôl hên mĭn lah ăp trong mkra bôk năp lor lah he tĭng tâm nău ntrŭnh, nău kơl bah Đảng, Ngih dak. Lơn lah Nghị quyết Đại hội Đảng ăp gưl. Ngăn lah dăch aơ, tâm Nghị quyết Đại hội Đảng lam dak rơh tal 13 lĕ nkoch ăp trong rƀŏng khlay n’hanh na nê̆. Chính phủ lĕ rgâl na nê̆ đah bôk nău kan ƀư bah Chính phủ. Gâp an lah ăp nău ntrŭnh nău kơl bah Đảng, Ngih dak aƀaơ lĕ ntơm tŏng ăp. Nău ƀa ƀă lah ndâk ƀư ăp nău ntrŭnh, nău kơl nĕ an rgum n’hanh geh nău lăp bah lĕ trong chính trị tâm năm tât. Nĕ lah ăp trong mkra na nê̆ mbra nsĭt tay nău rêh bah kônh wa ƀon lan dơi rgâl uĕh lơn”.

         - Kruanh n’gâng kan lĕ dơi Thủ tướng Chính phủ Phạm Minh Chính jao nău kan ƀư Groi Kruanh ban rnâng kan Ban ntĭm rđău Trung ương Bôk nău kan rƀŏng tĭng lam dak, Hun hao wăng sa rêh jêng nkual rnoi mpôl đêt n’hanh nkual yôk lvang 2021-2030, Kruanh N’gâng kan nchrăp dăn đă đah Thủ tướng Chính phủ an ăp trong ƀư, nău kơl bôk năp gay ƀư tĭng săk rnglăy bôk nău kan rƀŏng tĭng lam dak nău khlay aơ hơi wa ?

         Wa Hầu A Lềnh:  “Tĭng nău mbơh an Hội đồng uănh năl Ngih dak mpeh nău mbơh mĭn njêng uĕh di, mbơh an Thủ tướng Chính phủ ntrŭnh an ntuh kơl; n’hanh mbơh an Quốc hội tâm rơh rƀŭn bôk năp bah Quốc hội khóa 15 gay ntrŭnh an ntuh kơl. Aƀaơ mpôl hên dôl tâm ban nchrăp ăp sam ƀŭt geh tât; geh ăp rnoh ndơ, rnoh an, nău tâm pă prăk, ăp thông tư ntĭm rdâk ƀư bôk nău kan; ntĭm ƀon lan ndâk njêng Ban ntĭm rđău, Văn phòng tâm pă an; Nkre lôch jêh trong nău way an ƀư jêh nĕ bôk nău kan pah kan lvang bah aƀaơ tât năm 2025 bah Ban ntĭm rđău bôk nău kan rƀŏng tĭng.

         Bah meng nĕ Ủy ban Dân tộc tâm rgop đah ăp N’gâng kan, ban, nău kan, ngih pah kan geh tât gay ndâk njêng ăp sam ƀŭt sam tra, trong ƀư nău kơl gay mbơh an Thủ tướng Chính phủ ký tâm lvang aƀaơ tât khay 9/2021. Đah du nău nsrôih tâm năm 2021 mbra an jêh lĕ rngôch trong ƀư, nău kơl n’hanh ăp Thông tư ntĭm gay geh nău tâm ban ŭch lĕ rngôch bah Trung ương tât ƀon lan, gay mbơh ƀư bôk nău kan aơ geh săk rnglăy.

         Dăn lah uĕh Kruanh n’gâng kan !

         Nuĭh rblang: Y Sưng Phê Ja