VOV4.M'nông: Nô Y Pôt Niê, deh năm 1988, lah Giám đốc công ty TNHH Êđê Café, ta buôn Kla, xã Drai Săp, nkuâl Krông Ana, n'gor Dak Lak. Công ty TNHH ÊĐê Café hŏ dơn geh săk ntơ lư “Top 10 săk ntơ lư, ntô lĭr ntoh lư năm 2019”. Tâm nô nău nuh srê COVID-19 yơn Êđê cà phê nsrôih bên di tâm nô nău mhe. Aƀaơ, âk băl tâm boh dak bah dih ton tâm boh, ndơ̆ săk ntơ lư ÊĐê cà phê luh ntŭk tăch rgâl dak bah dih. Nô Y Pót Niê nkoch ăp nău kan bah doanh nghiệp ma rơh tâm ôp bah kơi aơ.   

- Hơi nô! Tâm nô nău nuh srê Covid-19 krit nji, công ty Êđê cà phê hŏ mhâm bên di mêh?

Nô Y Pôt Niê: “Tâm năm 2019, mhe njêng yơn nsĭt geh bah mpôl hên nklăp 900 rkeh, tât năm 2020 nklăp 1 rmen prăk. Tât năm aơ nsĭt geh bah mpôl hên hŭch âk, mô hŏ tât 500 rkeh prăk. Bôk năp, he saơ Covid-19 khuch tât lĕ rngôch ăp ntil tâm nău rêh, mô dơn êng ăp ntŭk ƀư njêng. Nuh srê khuch âk tât ăp công ty tăch rgâl đŏng, mô dơn êng bah mpôl hên. Yơn mô di kơt nê̆ ma plơ̆ rŭch. Mpôl hên lơn ma nsrôih lơn đŏng. Hôm đah công ty mpôl hên yor ăp ndeh rdeng n'hanh bưu điện hŏ rlu đŏng. Mpôl hên rgum tăch ta mạng xã hội ma Tiki n'hanh Shopee, livestream ta facebook, Zalo. Năch ta lam ăp ntŭk kuăl điện an mpôl hên rvăt tay ndơ bah Êđê’s cafe. Mpôl hên tâm ôp đah bưu điện n'hanh dơi njuăl 5kg ăp tơ̆ njuăl. Mô dơi njuăl kơt bah năp nuh srê. Mpôl hên way tăch kơt nê̆. Ăp nar tăch geh nklăp ntơm bah 30- 50kg let lơ".  

- Ơ! Nuh srê Covid-19 khuch tât trong wăng sa nsum, yơn tâm rnôk nê, Êđê cà phê hŏ n'gluh du đêt ndơ geh ƀư mhe kơt Cà phê sầu riêng, cà phê bum trău kiăt. Moh ndơ ƀư an may ăp nău mĭn dja mêh.

Nô Y Pôt Niê:  “Ngăn ma lah, gâp geh nău mĭn tâm pot cà phê đah ăp ntil ndơ dja hŏ ơm bah jŏ hôm. Nklăp gâp lah nuĭh Rđe mom ndăm nănh njêng công ty êng du hê. Gâp dŭt rhơn n'hanh ŭch rŏng băl mom n'hao êng săk n'hanh kơt nti, hun hao lơn yor gâp saơ ƀon lan he hôm geh âk nău khoah kơt nău gĭt blău tâm nău rêh, kơt nti...Tâl bar, gâp saơ, âk nuĭh âk năm deh ngêt cà phê cà phê nđôch ngăn dơm, cà phê kơt nê dŭt kah yơn khuch tât n'hâm suan kơt hao duh mham. Jêng gâp ŭch ƀư geh cà phê tâm di đah n'hâm suan bah nuĭh âk năm deh, gâp ân klêh play sầu riêng, gâp rlong pâr n'hanh mpli nsum ndrel cà phê saơ dŭt kah. Gâp saơ cà phê Robusta mpli ndrel đah play sầu riêng, đường, dak toh, tĭng du trong ƀư êng êng. Tât aƀaơ hŏ jêng geh du ntil ndơ ƀư êng dơi âk nuĭh ŭch joi rvăt dŭt uĕh ngăn. Gâp saơ dŭt rhơn yor nău dja".

- Moh tơm ndơ kơl an may way nsing nơm rlău dơi ăp jêr jŏt gay hao tât geh nău dơi mêh?

Nô Y Pôt Niê: “He mô dơi gĭt ôi tay klak mhâm jêng. Yơn Êđê cà phê mpôl hên way nsrôih bên di tâm ăp nău tât krit jêr. Nsrôih kơt nti, joi gĭt, geh ăp nău mĭn mhe, blău ƀư mhe ăp ndơ geh ƀư mhe n'gluh an ntŭk tăch rgâl gay wăch rgum nuĭh dŏng ndơ nsing nơm dŏng ndơ bah công ty he. Êđê cà phê mhe njêng dơm yơn nsrôih tâm ăp nău kan, tâm nău nsrôih geh nău dơi nsĭt tay nău uĕh lăng, nê lah nău dơi dŭt mbrơi ngăn bah công ty mpôl hên. Rnôk gâp mhe njêng kônh wa tâm  ƀon hăn ƀư công nhân ta Bình Dương n'hanh ăp nkual ƀon têh têh dŭt âk. Yơn rnôk nuh srê ntoh luh khân păng plơ̆ sĭt tay ƀon lan, gâp nta trong dơh an ăp nuĭh ndrel gŭ pah kan. Aƀaơ geh 10 nuĭh ta Buôn Kla ndrel pah kan ngăn đah Êđê cà phê. Rlău ma nê, hôm geh ăp nuĭh hăn kan tĭng nar đŏng, klêh cà phê mô lah mât chăm cà phê 20- 30 nuĭh đŏng. Gâp trok prăk nar kan nklăp 200.000 rbăn prăk/nuĭh/nar. Mpôl hên way rhơn wơt kônh wa ndrel pah kan gay ntop geh tay wăng sa".

- Tâm let năp tay, may moh geh trong nchrăp, nău ŭch tât kan gay hun hao Êđê cà phê mêh nô?

Nô Y Pôt Niê: “Ntơm bah aƀaơ, gâp hŏ geh ăp trong nchrăp kloh rvah tâm năm 2022. Nău gâp dŭt ŭch lah tăch n'gluh tât ăp dak êng ƀa ƀă. Gâp hŏ râng đăng ký ăp bôk nău kan Amzon, Alibaba. Nê lah ngoăy tâm ăp trong kan tăch n'gluh dŭt têh lam ntŭr neh. Gâp hŏ ký ton tăch n'gluh tât ăp dak êng ƀa ƀă lam ntŭr neh tâm bôk nău kan Amazon n'hanh Alibaba tâm du năm dŭt đêt lah 10 tấn cà phê môi. Rnôk râng ăp bôk nău kan dja gâp geh tay nău kơt nti, nău tă ơm gĭt kan lah nău dŭt khlay. Gâp ƀư lĕ rngôch ăp nău kan ma nău nsrôih, mô gŭ rlu. Tâm năm mhe, gâp mpŏng lĕ rngôch ăp nuĭh ndrel pah kan n'hanh gâp ta công ty n'hanh lĕ rngôch kônh wa ta ƀon lan way ngăch dăng. Tâm nô nău nuh srê gĭt mât njrăng êng săk nơm n'hanh ƀon lan. Săk gâp nơm mbra rdâk njêng ăp trong nchrăp kloh rvah lơn gay dơi tât rnoh tăch n'gluh. Mpôl hên pah kan tâm nău rhơn nđơr. Ŭch rŏng tâm năm mhe mbra pơk hvi xưởng, ndơ ntrŭp dŏng, âk năch tâm dak, dak bah dih rvăt cà phê, gay kơl kônh wa ƀon lan he geh tay tơm wăng sa".

Dăn lah uĕh nô!

Nuĭh rblang: Điểu Thân