VOV4.M’nông: Dăp uĕh, rgâl mhe, tâm rgop ăp công ty nông lâm nghiệp ngih dak tĭng Nghị quyết 30 năm 2014 bah Bộ Chính trị khóa 11 n’hanh Nghị quyết 118 năm 2014 bah Chính phủ lah nău ntrŭnh bah Đảng, Ngih dak ngih dak. Ta Tây Nguyên, ăp công ty nông lâm nghiệp ngih dak dôl mât uănh rnoh neh dŭt âk, hao tât bơi 1,2 rkeh đô lar. Aơ lah ndơ khlay an hun hao wăng sa ta ntŭk têh âk kơt Tây Nguyên. Ndrĭ yơn, ăp công ty nông lâp nghiệp ta aơ lŏ pah kan dŭt mô blău, wăk kol, tŭp nău tih. Nuĭh nchih nău an Đài TNVN ta nkual Tây Nguyên geh âk nău nchih: “Nghị quyết 30: Joi bah nău ngăn công ty nông lâm nghiệp ta Tây Nguyên” Kêng lôch nău ntuh nar aơ, jă kônh wa n’hanh lĕ băl mpôl djăt nău nchih bôk năp geh nkô̆ nău: “Nău rvê bah nuĭh ntuh kơl”.

Công ty Cổ phần Tập đoàn TH lah ngoăy tâm âk doanh nghiệp hăn lor râng tâm nău dăp uĕh, rgâl mhe ăp công ty lâm nghiệp ta Tây Nguyên đah nău ntuh kơl tâm nkual neh têh 27.000ha ơm dơi mât uănh, dŏng  mô rjăp yor 2 công ty lâm nghiệp Rừng Xanh n’hanh Cư M’lan, nkuăl Ea Súp, n’gor Dak lak. Dŭt năm 2016, tĭng nkô̆ nău dăp ntrong kan 2 hê, Công ty TNHH nkret njêng ndơ sa n’hanh lâm nghiệp Dak Lak dơi ndâk njêng. Wa Trịnh Xuân Thắng, Tổng giám đốc công ty an gĭt, nău ntrŭnh an công ty tăm n’hanh mât rong ta neh bri mô jêng ma n’hêl na nê̆ rnoh neh mô hôm geh bri. Yơn lah, nău ntrŭnh bah Ngih dak geh nău rgâl đah nău rlu rgâl neh bri mô jêng an nău ŭch êng, trong nchrăp bôk năp rlu tay. Tâm rnôk nĕ, lĕ 6 năm yơn sam ƀŭt kơp dơn sam ƀŭt dŏng neh aƀaơ hôm e moh săk 2 công ty ơm. Dôl rvê lơn, lor rnôk tâm rgop, hang rbăn ha neh lĕ roh n’hanh aƀaơ Công an n’gor Dak Lak dôl nkra nău tih aơ. Nău ntuh kơl bah công ty dôl wăk vêl n’ăp mpeh pháp lý n’ăp n’hêl na nê̆:

          “Nău ŭch bah Tập đoàn lăp gay geh neh ntuh kơl yơn tât rnôk aƀaơ mư geh neh tâm sam ƀŭt, nĕ lah nău khlay ngăn. Geh âk ntŭk dơi ƀư ri geh ƀon lan mprơh sĭt. Lah geh ăp nkual neh ƀon lan mô hŏ rŭn in ri nĕ lah nkual jêr jŏt, ngai, njê, sât blak ma lŏ jêt chrai. Tập đoàn mô dơi janh sŏk prah an ntuh kơl, yor gĭt lah mô gĭt nar roh”.

Công ty Cổ phần Tập đoàn TH dôl wăk wêl đah pháp lý n’ăp n’hêl na nê̆.

          Nsing nơm đŏng râng tâm rgop tâm nău kan lŏ mir ta Tây Nguyên lah Công ty cổ phân ndơ sông sa kah NutiFood rnôk rwăt tay bơi 80% tâm rgop ta Công ty Cà phê Phước An. Nău kan bah công ty lah kơt dŏng lŏ mir công nghệ mhe, ndơ̆ ăp ndơ uĕh kah tâm ntŭk tăch tâm dak n’hanh lam ntŭr neh. Yơn 4 năm bah kơi tâm rgop, mô knŭng mô ƀư nkra njêng, doanh nghiệp hôm dôl kol tâm nău wăk vêl tâm pit pháp lý đah ăp nuĭh ƀon lan jao. Wa Nguyễn Huyền Trâm, Tổng giám đốc công ty an gĭt, bôl lĕ nsrôih tâm nchră, nău mô hŏ dơi mkra, công ty đă ndơ̆ ngih phat dôih gay mkra tĭng nău ntrŭnh pháp luật:

          “Gay mkra nău tâm pit, Công ty lĕ mbơh âk trong mkra gay ƀư tĭng nuih n’hâm kan ndrel, tâm ton uĕh đah nuĭh ƀon lan dơn jao mât đah công ty, ƀư tĭng di nău ntrŭnh bah pháp luật. Săk rnglăy mô hŏ geh. Trong mkra n’gleh dŭt, lôch trong, mpôl hên đă njuăl sam ƀŭt ndơ̆ ăp rnăk dơn mât hăn ngih phat dôih gay mkra tĭng di nău ntrŭnh bah pháp luật”.

          Khuch bah năp mô rah wah tâm rgop dôl ƀư an Công ty Cổ phần Cà phê Gia Lai n’hanh Công ty Cổ phần Chè Biển Hồ, đah bơi 1.700ha ta n’gor Gia Lai dŭt jêr mbơh ƀư ăp trong nkra njêng, tăch rgâl jêh 3 năm tâm rgop. Năm 2016, rnôk ƀư tâm rgop, n’gor Gia Lai knŭng an rgâl công ty cổ phần. Ndrĭ yơn, công ty ơm lah Công ty TNHH MTV Cà phê Gia Lai n’hanh công ty TNHH MTV Chè Biển Hồ lŏ ƀư tih ntĭm rđău bah UBND n’gor ký tay ndơ tâm ton jao an jŏ năm đah nuĭh pah kan tât năm 2042 n’hanh năm 2047.

Nău ngăn roh neh, roh bri hô mô hŏ dơi mkra lôch

          Wa Trịnh Đình Trường, Kruanh HĐQT, Tổng Giám đốc bah 2 Công ty cổ phần an gĭt, nuĭh ntuh kơl lĕ mô dơi gĭt nu nău n’hanh đah ăp tâm ton jao an kơt nĕ, nuĭh pah kan aƀaơ dôl ƀư tơm ngăn bah mir tơm tăm. Công ty cổ phần hôm e dơi uănh kơt công ty ngih dak, hôm e n’gleh an trong nkra njêng, tăch rgâl, mô geh ăp trong ƀư, nău kơl gay doanh nghiệp dơi rklaih luh trong ƀư sa ơm. Tâm rnôk nĕ, nuĭh ntuh kơl rwăt mô knŭng lah tâm rgop, drăp ndơ ta neh, nău dơi manh neh ma hôm lah nău kan đah nuĭh pah kan, nău kan bah doanh nghiệp ngih dak n’glơi an. Ăp nău aơ mô dơi uănh mĭn di ta năp n’hanh bah kơi tâm rgop:

          “Ta ntŭk tâm rlong tăch rwăt ri tĭng nău way an tâm rlong tăch rwăt kloh, neh ntu kloh, lĕ rngôch ăp ntil kloh yơn ngih dak mô njrăng nău khuch neh. Mpôl hên jêng “kon nuĭh đă choai”. Aƀaơ lĕ tŭp jâng tâm bŏk hôm, ji nuih ta nău aơ jôt lah jŭr, hao ri mô dơi hao, gŭ du ntŭk ri mô dơi hôm, moh ntil khĭt đŏng”.

          Doanh nghiệp an âk rhiăng rbăn rmen prăk gay râng tâm rgop, geh nău rƀŏng ndrel đah Ngih dak ƀư geh săk rnglăy ăp rnoh neh têh hvi n’hanh uĕh jêng ta Tây Nguyên. Ndrĭ yơn, jêh dăp uĕh, tâm rgop, âk doanh nghiệp lŏ kol tâm nău wăk wêl, ăp nău tâm pit mô geh lôch n’hanh khuch lah nkra njêng, tăch rgâl roh yot jŏ jong.

          Nuĭh rblang: Y Sưng Phê Ja