Nai dak si Nguyễn Thị Mới, Kruanh Khoa nau ji Nhiệt đới, tâm ngih dak si Nhi n’gor Gia Lai mbơh, Khoa geh 40 nsưng bĭch săm, yơn ăp nar rlau aơ rnoh nŭih ji rtoh luh dak hao ngăch, geh rnôk rlau 100 nŭih ji lah kon se rtoh luh dak ndrel bĭch săm, ƀư jâk ir. Rnoh kon se geh ntưp rtoh luh dak hao ngăch du gưl lah yor tâm rnôk yan geh nau ji, êp nê, âk kon se ê chuh vắc xin njrăng rtoh luh mô lah ê tŏng nglai ƀư nau tât âk nau ji ndrel nau ji mra jêng jâk lơn rđil ma kon se êng:

            ‘Nau tât bah srê rtoh luh dak tâm 3 khay ma aơ geh hao âk, du nar tâm khoa geh nklăp 100 nŭih ji, geh rnôk ri bĭch nsum dơm, dăp tay nsưng bĭch, nai dak si ri n’hao nau pah kan geh rnôk kơt lah rlau bar tŏ, ngăn lah tâm rnôk têt ri jêr rgănh ngăn”.

            Mât chăm kon nơm mhe 14 khay dôl săm tâm Khoa nau ji nhiệt đới, yuh Rơ Lan Tuyết, tâm ƀon T’nung, xã H’bông, nkuăl Chư Sê mbơh, kon yuh ê geh chuh vắc xin njrăng rtoh luh dak ri ma rnôk geh nau ji ri păng ji rlau ma bu êng ngăn. Tât rnôk aơ, păng hŏ geh săm 3 nar, rnôk aơ n’hâm soan mbơm oi đŏng:

            ‘Kon gâp ji tâm 7 nar tâm ngih, mô saơ bah duh ri ma leo tât ngih dak si nkual, leo tât ta nê 7 nar ri ngih dak si ngih gay ma bu uănh săm. Rnôk aơ kon gâp bah oi hôm, dơi pu toh, sŏ n’hâm ueh lơn, siăk ri hôm siăk đŏng, djroh ri mô hôm saơ tay ôh”.

            Nau rvê ngăn lah kon se tâm ntưp ndrăng nơm tâm ăp ngih dak si săm. Yuh Yao, gŭ tâm Tổ Dân phố 8, nkuăl têh Đăk Đoa, geh kon păng 5 khay ji rêng tât klơm soh, jâk, nkoch tay:

            ‘Kon gâp ta aơ ntơm lơ 2 tết, bah năp nê ri kon gâp ji tâm klơm soh, geh lăp ngih dak si tâm nkuăl Đăk Đoa săm du pơh. Yor tâm nkuăl geh kon se ji rtoh luh rnôk tâm jrâu bĭch săm nsum ri ma kon gâp ƀeng geh ntưp”.

            Ntơm bôk năm tât rnôk aơ, Ngih dak si Nhi Gia Lai ndơn săm bơi tât 500 kon se lăp ngih dak si yor rtoh luh dak, hao kơt lah âk ngăn đah rnoh nŭih tâm ndrel rơh aơ năm 2024. Nai dak si Từ Mai Linh, Groi Giám đốc Ngih dak si mbơh, ntơm bah nau nkah lah bah N’gâng kan dak si, ngih dak si nchrăp ueh rnoh nŭih, nau kan, ăp nau njrăng rdâng tâm ăp khoa gay ma năn saơ rtoh luh ndrel săm ân ueh:

            ‘Ngih dak si kŏ pă, dăp rgum tay ăp nau ji êng êng, geh bĭch tâm nkah jrâu êng gay ma đăp mpăn mô geh tâm ntưp. N’hao nŭih kan, ndơ dŏng máy sŏ n’hâm, Cpap gay săm ân nŭih ji ueh ngăn. Rnôk saơ kon se ji kop duh, siăk, hoch dak muh, rtoh luh tâm săk geh tât rtoh luh dak ri rnăk vâl ân leo nkre tâm ngih dak si gay ma khám, mbơh, săm du trong ueh ngăn, nau kan chuh njrăng rtoh luh kŏ dŭt khlay ndrel ân kon se geh chuh ntơm 9 khay, chuh tâm di, tŏng tĭng nau ntrŭnh bah N’gâng kan dak si”./.