VOV4.M'Nông: Bộ Y tế mhe geh si ƀŭt njuăl Kruanh Ƀan rđău đă njrăng, n'gang nuh srê COVID-19 n'hanh kruanh UBND ăp n'gor, nkual ƀon têh mpeh n'hao dăng ăp trong njrăng, n'gang nuh srê ta năp njêng săk mhe Omicron. Ta Việt Nam hŏ năl geh ăp nuĭh ntưp njêng săk mhe Omicron ta pe nkual miền Bắc, miền Nam, miền Trung lah ăp nuĭh lăp bah dih hŏ dơi mât uănh, an gŭ rgum êng năn ngăch. Tâm rnôk njêng săk mhe Omicron mbra lăp n'hanh ntưp rêng ngăch, Bộ Y tế dăn đă ăp n'gor, nkual ƀon têh rđău đă lĕ n'hâm suan, n'hao dăng ăp trong njrăng, n'gang nuh srê Covid-19; lor nchrăp njrăng, n'gang njêng săk mhe Omicron; lor nchrăp rdâk njêng ăp trong ntĭt lor, gay rdâng lơh đah ăp nău tât nuh srê Covid-19 ta nkual, n'hao nău dăng lam trong kan dak si tĭng trong rƀŏng 4 ta ntŭk; N'hao dăng groi nđôi, mât uănh ăp nuĭh bah dih lăp. Ăp n'gor ân n'hao dăng pah kan nkoch trêng n'hao nău njrăng lor bah nuĭh ƀon lan ta năp njêng săk mhe Omicron, mô rgum âk nuĭh rnôk mô geh nău khlay./.

Nuĭh rblang: Điểu Thân