VOV4.M'nông: Bôk nău kan gưl neh dak mpeh rnoh tât n'hŭch ach o jŏ jong nâp dăng lvang năm 2021-2025, tĭng nău nchrăp Ngih dak mbra ntêm an 75.000 rmen prăk tâm nê tơm prăk Trung ương lah 48.000 rmen prăk; Ngân sách ta n'gor: rlău 12.600 rmen prăk an pah kan n'hŭch ach o đah nuĭh lah rnăk ach o, rnăk dăch kêng ach o, rnăk mhe luh bah săk ach o ta lam dak, uănh khlay ta ntŭk hôm jêr jŏt. Nău ntuh kơl tơm prăk an bôk nău kan lah khlay ngăch yơn gay an ƀư jŏ jong nâp dăng ri hôm âk nkô̆ nău ân dơi nchră.

Tĭng Bộ trưởng Bộ Lao động-Thương binh n'hanh Xã hội Đào Ngọc Dung, aƀaơ, âk nkuâl ach o, xã, nkual bri lâng meng dak lêng n'hanh gôl dak mô hŏ luh bah nkual dŭt jêr jŏt mha êng. Ăp ntŭk dja lah nkual "nklang ntŭk ach o", geh neh ntu yôk nor jru ngai, wăng sa- rêh jêng kon nuĭh n'hanh ntŭk ntô ndơ dŏng hôm âk jêr jŏt, geh rnoh rnăk ach o âk, du đêt ntŭk rnoh âk rnăk ach o hôm rlău 40- 50%. Nău dơi geh n'hŭch ach o mô hŏ nâp dăng ngăn ta du đêt n'gor; rnoh âk plơ̆ tay ach o; rnoh âk rnăk ach o ntoh luh tay hôm âk tă bah trôk nar, dak bŭk, nuh srê, kop ji lơh.  

          Jêng, nău ŭch nkrum lam lĕ rngôch bah bôk nău kan n'hŭch ach o âk ding, nkrum lĕ, jŏ jong, bah ir plơ̆ tay ach o n'hanh ntoh âk tay rnăk ach o; ntop kơl nuĭh ach o, rnăk ach o rlău dơi rnoh geh rêh tơm, tât ăp tŏng ăp ndơ rhŏ dŏng tơm tâm nău rêh, n'hao săk geh nău rêh, hŭch đêt brêt rgay ta kon se; ntop kơl ăp ntŭk ach o luh bah nô nău dŭt jêr jŏt mha êng, nuĭh đăp mpăn geh ăp tŏng mpeh jay gŭ n'hŭt răm.   

Nsrôih n'hŭch 1/2 rnoh rnăk ach o, rnăk dăch kêng ach o tĭng rnoh di âk ding bah neh dak, 30% rnoh nkuâl ach o, 30% rnoh xã dŭt jêr jŏt mha êng, nkual neh rkăng, meng dak lêng, gôl dak luh bah nô nău jêr jŏt dŭt mha êng, rlong ntop kơl hun hao rlău 1000 trong ntĭt leo n'hŭch ach o, nta joi geh nău rêh, nău kan jŏ jong nâp dăng, rnoh nuĭh kan mpeh nkual ach o, nkual jêr jŏt lôch jêh ntĭm nti geh tât 60%, tâm nê geh bằng cấp, si ƀŭt kơp dơn 25%. Nsrôih ntop kơl rnăk ach o, rnăk dăch kêng ach o geh dŭt đêt 1 hê tâm rnoh năm kan geh nău kan jŏ jong, 90% rnăk ach o, rnăk dăch kêng ach o geh wăng sa, dơi dŏng ăp ndơ rhŏ dŏng viễn thông internet.

Mpeh nău ŭch tât kan ma Bộ trưởng Bộ Lao động-Thương binh n'hanh Xã hội Đào Ngọc Dung hŏ mbơh rblang, lah tĭng ƀư geh nău tam, ri ta năp măt ân geh ăp nău gŭ mĭn, uănh năl nkô̆ mô hŏ geh nău tam bah pah kan n'hŭch ach o tâm bah ri aơ nơh. Nău tâm chong cheng bah ăp trong kơl, tơm prăk ntuh kơl mô hŏ geh nău tam, tâm nê ân uănh khlay tât nău rgâl gĭt êng bah nuĭh geh dŏng, ma ta aơ lah nuĭh ach o nơm. Nău dja dơi wa Phạm Đình Thanh, đại biểu Quốc hội n'gor Kon Tum mpơl nău:  

Aƀaơ nuĭh ach o, dăch kêng ach o lah ƀon lan rnoi mpôl đê̆ dŭt âk. Tâm rnoh tât kan nghị quyết ndơ̆ luh lah kân bah ir plơ̆ tay ach o, ntoh tay rnăk ach o ri ân rgâl nău gĭt êng bah ƀon lan rnoi mpôl đê̆ lah nuĭh ach o. Dơn geh trong ƀư kơt nê mơ dơi nâp dăng jŏ jong. Dah âk nău ntop yơn bu mô rgâl ri tât lĕ ndơ ntop kơl khân păng plơ̆ ach o tay.  

Âk nuĭh an nău rgop, gay pah kan n'hŭch ach o nâp dăng ngăn ri ân uănh khlay tât pah kan ntĭm nti nău kan, nta  joi geh trong rêh an nuĭh ƀon lan, geh ăp nău uănh năl, di tay nău tĭng ƀư pah kan n'hŭch ach o ta ăp n'gor mhâm ƀư an tâm di đah tĭng ntŭk, tĭng nuĭh, mô dŏng nsum nsum. Đại biểu Nguyễn Thị Lan Anh, mpôl Lào Cai nchŏng kloh:

Đah ăp nuĭh ach o rmôt dâk bah kơi dŭt dja, hŏ ach o hôm ma đêt geh nău nchrăp lor, bah nău joi geh nău rêh, mô dơn nê đêt mâp hăn, tâm boh tâm  brê ach o da dê. He ân uănh khlay tât nău way tâm rgop mbluh xã, mbluh nkual, uănh khlay ntop kơl ăp hợp tác xã, lơn lah nkual yôk yang, nkual dŭt jêr jŏt mha êng...tâm trong nchrăp nta joi geh nău rêh ân nta nău dơi kan an bu ur.

Tâm đề án bôk nău kan rnoh ŭch tât kan gưl neh dak mpeh n'hŭch ach o jŏ jong ân geh ăp nău kơi ntop đŏng, yor nău he hŏ năl dơi nkuâl ach o, xã ach o, xã nkual n'har bri yơn hôm dŭt jêr jŏt mha êng ri mô hŏ nkoch kloh. Nău dja dơi đại biểu Lê Kim Toàn, mpôl ntơh măt bah n'gor Bình Định dăn đă:

Mpeh ntŭk ri dăn đă lah nkuâl ach o n'hanh xã dŭt jêr jŏt mha êng păng dah ma geh ntŭk gŭ, nkual yôk prêh geh, nkual bri dâng geh, meng dak lêng geh đŏng yơn păng lan xã dŭt jêr jŏt ri ân dơi an kơl lor...lah dơn ntrŏng bri dâng meng dak lêng dơm ...ri rgơ̆ ma jêng geh liăn nuĭh kơl.

Bah lơ nê lah ngoăy tâm hang rhiăng nău rgop bah ăp đại biểu ta ăp rơh hop ta rmôt dơm, nău rgum uănh năl tay bôk nău kan mbra dơi Quốc hội mĭn uănh rgâl nkra n'hanh ndơ̆ luh ăp trong nkra na nê̆ tâm ăp bôk nău kan. Dơi gĭt tơm prăk ngân sách dăn đă tĭng ƀư bôk nău kan gưl neh dak n'hŭch ach o nâp dăng lvang năm 2021-2025 dơi rgâl hŭch bah 90.000 rmen prăk jŭr hôm 75.000 rmen prăk, yơn tĭng groi kruanh Quốc hội Nguyễn Đức Hải, Quốc hội n'hanh Chính phủ mbra geh tay ăp nău rgâl mhâm ƀư an tơm prăk ngân sách tŏng ăp, tâm di gay tŏng uĕh ăp gâl kan bah  bôk nău kan./.

VOV 4- Nuĭh rblang: Điểu Thân