VOV4.M’nông: Rgum prêh ngăn tâm nau nkoch trêng tă bah rơh rgŏ jă, nau kan “Lam ƀon lan râng njrăng, rdâng srê Covid-19 ndrel luh, pă tih dôih gay n’hao nau gĭt, gĭt kloh nau kan bah ăp nŭih bah năp nau khuch bah srê Covid-19, rmôt tahen biên phòng hŏ rgum n’hâm lam ƀon lan râng njrăng ndrel luh, lăp tih dôih, rgop nau njrăng rdâng mô ân srê ntưp ta ưbah ba dih tâm ƀon lan.

          Tĭng nê, bôk nau kan geh ƀư đah âk nau kan ngăn, n’hêl, tâm ban đah nau dôl geh tâm nkuăl, ndrel ăp nau kan, nau rgŏ jă tâm nkuăl, đăp mpăn nau ŭch mpeh nau njrăng, rdâng srê Covid-19. Nkoch trêng gay ăp nŭih ƀon lan gĭt kloh mpeh nau kan, nau krit jêr bah srê Covid-19, ƀư nau kan kơl an nau rêh, hăn nsum ma ƀon lan geh nau rêh jêr jŏt rnôk geh nau khuch bah srê Covid-19.

          Lah n’gor geh trong n’har bri jong rlau 468 km tâm dăch ma dak Lào, geh âk trong pơk êng, kan nkân njrăng nkuăl n’har bri, njrăng nau lăp tih dôih hŏ geh tahen Biên phòng Nghệ An bư tâm ban, hvi ndrel tam. Bah nê, uănh khlay nau nkoch trêng tât ƀon lan tâm nkuăl n’har bri. Đại tá Dương Hồng Hải, Groi Rđau kan N’gâng kan tahen Biên phòng n’gor Nghệ An, mbơh:

          ‘Phung hên ƀư ueh nau kan nkoch trêng đah đah ƀon lan tâm nkuăl n’har bri, der ăp nau kan tâm nthoi tâm kơl gay ma nglăp nŭih tih dôih tâm dak nơm tă bah Lào, ƀư ăp ntŭk nchich mbơh nau mpeh phung tih dôih tâm njock ăp nkuăl n’har bri, phung hên jao ân nŭih ƀư Groi Bí thư Đảng uỷ lah cán bộ tahen biên phòng hăn jur tât xã ƀư tơm tâm nau nkoch trêng, rgŏ jă ƀon lan râng tâm nau mbơh saơ phung tih dôih ma rlet lăp tâm nkuăl n’har bri ndrel mô geh tŏng ăp ntil săm ƀŭt tĭng nau ntrŭnh đă”.

Hăn kan nsum ma tahen Biên phòng, âk ngăn nŭih ƀon lan tâm xã n’har bri kŏ n’hao êng nau gĭt tâm nau kan njrăng, rdâng srê Covid-19 kơt put bok put mbung tâm ntŭk âk nŭih, puh nkhĭt kman, srê ntŭk nơm gŭ rêh. Ngăn lah ƀư nau nkoch mbơh nau ân tahen Biên phòng rnôk tât nchrăp ƀư nau kan, mbơh nau ân rnôk saơ ăp nŭih luh lăp tih dôih tâm nkuăl.

Bah năp nau tât nar lơn ma hô khuch bah srê Covid-19, tahen Biên phòng n’gor Quảng Bình hŏ ndâk 14 ntŭk ƀư nau kan njrăng rdâng tâm trong luh, lăp êng tâm nkuăl n’har bri đah dak băl Lào gay ma njrăng nŭih tă bah nkuăl geh srê lăp tâm dak nơm. Thiếu tá Lê Ngọc Gia, chính trị viên đồn Biên phòng Làng Ho, tahen Biên phòng n’gor Quảng BÌnh mbơh, tâm rnôk dôl jêr, tahen ŭch geh nau kơl an bah ƀon lan tâm nkuăl n’har bri:

‘Phung hên dŭt n’hâm geh nau rnê ngăn, bol ma tâm trong n’har bri yor rmôt hên ƀư, nau rêh kônh wa hôm âk nau jêr, yơn kônh wa hŏ rgop âk ngăn, ndoh ndơ, nuih n’hâm kơl an tahen. Tâm rơh tât ri phung hên mra ƀư jêh nau kan njrăng rdâng srê Covid-19”.

Đah nau kan “njrăng rdâng srê kơt njrăng phung rlăng”, ăp tahen mom Đồn biên phòng Quảng Bình tâm ndơn gay ma njrăng ƀư nau kan tâm 24/24 mông tâm ăp ntŭk nkân njrăng tâm trong luh, lăp êng đah dak lă Lào. Ăp tahen mô klach nau jêr, mô klach nau rgănh, gŭ, bĭch, sa tâm bri, tâm njao. Wa Hồ Thuỷ, rnoi Vân Kiều tâm ƀon Eo Bù-Chút Mút, xã Lâm Thủy, nkuăl Lệ Thuỷ, n’gor Quảng Bình nkoch, saơ tahen gŭ tâm nklang bri krŏng ngai jêr kơt nê ri kônh wa hăn kơl, ntop tay n’hâm kơl an tahen ƀư jêh nau kan bah nơm:

‘Lah saơ nŭih nơm mô mơng hăn lăp tâm nkuăl n’har bri ri hên mbơh ân tahen biên phòng gay ăp nô gĭt nau nê, njrăng ân năn. Ndrel ma tahen njrăng rdâng srê Covid-19 mô ân lăp ƀon lan nơm”.

Rmôt kan ndơn nŭih lăp tâm mpông n’har bri đah dak ba dih Cha Lo, n’gor Quảng Bình mbơh, gay ma nkân ân rjăp nŭih luh lăp tâm ăp nkuăl n’har bri, tahen biên phòng n’gor Quảng Bình hŏ ndâk 14 rmôt kan tâm trong hăn, trong teng êng đah dak băl Lào. Đại tá Trịnh Thanh Bình, rđau kan tơm bah tahen Biên phòng n’gor Quảng Bình vay bonh đă kônh wa tâm nkuăl n’har bri nsum ty njrăng, rdâng srê Covid-19:

‘Ăp rmôt ƀư nau kan njrăng rdâng ri rjăp ngăn, mô ân geh nŭih hăn ro nkre ma ƀư nau mêt uănh njok trong n’har bri. Ndrel ma nê ri tâm rgop nsum ma nau kan bonh đă ƀon lan n’hao nau gĭt rbăng kloh mpeh nau kan njrăng rdâng srê, nkre ma pă bok put mung ndrel ƀư nau rep răk kloh ăp ƀon lan”.

Ơi kônh wa ndrel băl mpôl, tâm rnôk âk ngăn nŭih ƀon lan rêh njok trong nsum ty ndrel ma rmôt kan n’gâng kan mât njrăng nkuăl n’har bri, rgop nau njrăng rdâng srê Covid-19, ri hôm geh ăp nŭih ndăn tâm nau dơi ndrel nau kan bah nơm, gay ma kơl an ân ăp nŭih mô ueh, ƀư tih. Ngăn lah nơm hôm nkah ơm tâm rơh êp aơ, trong hăn leo 200 nŭih luh tă bah dak nơm rlet trong n’har bri Bản Lầu (nkuăl Mường Khương, n’gor Lào Cai) geh bu ban saơ, ntop ma âk nau ƀư nau kan dŭt n’hâm blau bah ăp nŭih mhik hŏ geh ƀư kloh. Nau ngăn lah, nŭih dâk ba kơi gay ma kơl an ăp nŭih ƀư hăn luh tât dak ba dih geh nau dơi ngăn nê lah Kruanh Thôn-nŭih râng nau kơl mêt uănh mât njrăng nkân lơi srê ji Covid-19 ndrel ma rmôt tahen.

Ndri ma, mra dơi lah, lah ăp nŭih ƀon lan mô ndơn saơ nau aơ ân tâm di, tŏng ăp, rnoh nau khuch bah srê ji Covid-19 đah ăp nŭih ndrel ƀon lan, ri bol ma geh rmôt tahen Biên phòng geh ma rbăn tôr, rbăn măt, rêng ma rhiăng rbăn ntŭk ƀư nau kan mât njrăng tâm ăp trong teng, trong luh, lăp êng ri kŏ mô dơi njrăng rdâng, kol nkân ngăn ôh ăp nŭih ƀư rlăm, mhik, trong rse ƀư kan, leo luh, vơt lăp, rnglăp nŭih tih dôih./.