VOV4.M’nông: Ta rơh rƀŭn mhe rlau, âk ntoh măt Quốc hội ân lah, ndrel ma nau kan ntrŭnh ƀư nau njrăng rdâng srê Covid-19, ri ân geh mbơh ân săk tam lơn nau kan kơl an ƀon lan, nŭih pah kan, nŭih dŏng nŭih pah kan ndơn geh nau kơl an yor srê. Ndrel ma nê, ăp ntoh măt Quốc hội kŏ đă, ntŭk kan trung ương ân geh nau tâm rgop nsum ân geh tâm ban tâm nau ê nkra ndrel tăch ndơ ân ntŭk kan ndrel ƀon lan.

            Tâm nchră ăp nau kan njrăng rdâng srê Covid-19, âk ntoh măt Quốc hội ân lah, nau ntrŭnh ƀư ân rjăp lơn nau njrăng, rdâng srê, yơn mô ân dŏng ăp nau kan nâp ir. Nau ngăn tâm rơh rlau aơ, geh ăp nkuăl ƀư nau dŏng tĭng nau njrăng rdâng hô ir, ƀư ntrong pă ndoh ndơ đah ăp nkuăl mâp nau jêr, mô lah geh nkol.

            Tĭng wa Phan Đức Hiếu, rmôt kan tă bah Thái Bình, ân geh nau tâm ban, tâm rgop nsum đah ăp nkuăl tâm nau njrăng rdâng tĭng nau kan kơp dơn ndrăng nơm ndrel mbơh nau, gay pơk trong nơih tâm nau nchrăn rdeng, leo tăch ndoh ndơ đah ăp nkuăl:

            ‘Tâm rnôk aơ ri srê nuh tâm ăp nkuăl ri êng êng ngăn ndrel ăp nau kan njrăng rdâng srê lah nau êng êng ngăn. Tâm di nau  tât ri aơ lah ăp nau kan ân geh khlay nâp ngăn, yơn lah nau êng êng đah ăp nau kan njrăng, rdâng srê leo tât nau kol mpeh nau nchuănh rdeng leo tăch ndoh ndơ ndrel kon nŭih. Tĭng nau gâp dơi gĭt rnôk aơ tâm ăp trong hăn ri hôm ơm ăp nau kol mpeh ndoh ndơ ri ma nau kan tâm rgop nsum đah ăp nkuăl tâm nau aơ lah nau n’huch âk ngăn ăp nau dơi, nau kan êng êng mô geh nau khlay, ri mra leo tât nau n’hao lơn tay nau nchuăn rdneg leo ndoh ndơ”.

            Nkoch tât nau kan ƀư ân leo ndoh ndơ đah ăp nkuăl Kruanh n’gâng kan Công thương Nguyễn Hồng Diên mbơh, rnôk bôk năp njrăng rdâng srê Covid-19, ăp nkuăl hôm geh nau ndrât, vĭ vĕ ƀư tât nau pă tăch ndoh ndơ khlay dŏng ân nŭih ƀon lan hôm mâp nau jêr, mô tŏng ndơ ƀư kol nau tăch, leo, pă. Ăp nau kan aơ hŏ geh n’gâng kan mât nau kan uănh saơ ndrel rgum ăp nau kan gay ma rklaih:

            “N’gâng kan công thương đă ntŭk kan tuch tăm ntrŭt dăng nau kan ê nkra ăp ntil ndoh ndơ ndơ sa, ngăn lah ndơ sa rih, bum byăp, play tâm nkuăl geh srê ndrel ăp nkuăl êng kơt lah lam dak têm lơi gay ma leo pă tăch. Ăp ntŭk kan gung trong, công an, dak si, n’gâng kan ăp nkuăl, ngăn lah ăp nau kan tâm nkuăl geh srê ƀư ân rjăp ăp nau kan bah chính phủ, Thủ tướng Chính phủ mô ndŏ luh ăp nau kan êng êng ndrel kơt tĭng dŏng mô nâp ngăn ăp nau ntrŭnh. Ăp n’gor tâm nkuăl ân geh lŏ kơp, ndal ƀư kơl an ăp ntŭk kan pă ndoh ndơ khlay dŏng ăp nar gay ma têm dŏng ndoh ndơ tâm nkuăl ntơm 10-15 nar tam ban đah nar geh bu tâm nkhah srang, nkre ƀư ân ueh rjăp nau kan pă tâm ăp siêu thị, chợ tăch ndơ ndrel chợ êng mpeh ăp chợ tơm đŏng, hun hao ăp nau kan tăch rgâl kơt lah tăch ndơ trong điện tử tă bah ngai”.

            Âk ntoh măt Quốc hội kŏ ân lah, ndrel ma nau ntrŭnh ƀư ăp nau kan nkân njrăng srê ri ân geh ntrŭnh ƀư ueh tam lơn ăp nau kơl an ƀon lan, nŭih pah kan, nŭih dŏng nŭih pah kan ndơn geh khuch tă bah srê Covid-19. Rnôk kon nŭih lah tơm ngăn ri mra njêng luh ăp nau kan êng mhe gay ma nkân njrăng srê ndrel ntrŭt jăng lơi srê ji. Rnôk aơ, Chính phủ hŏ geh âk nau kan kơt an kơt: n’huch rnoh prăk điện, dak, ntoch tay nar ndŏ soay, n’huch rnoh prăk ndŏ êng, kơl an ndal đah nŭih ƀon lan, nŭih pah kan ndrel tơm nŭih dŏng kan. Wa Vũ Thị Lưu Mai, rmôt kan tă bah Hà Nội ân lah, kan Chính phủ ntrŭnh ƀư ndal ăp nau kơl an bah lê nê ntoh nuih n’hâm ueh, nơih ân ƀon lan geh kơl an, yơn ân geh tâm di nŭih, mô geh mpơl n’hơ, mô geh dah ma ƀư, nkre ân geh nkah nau kan kơt tĭng ăp nau kan jêh rnôk mêt uănh:

            ‘ Yor lah rnôk aơ tâm nau ngăn ri đah du đê̆ nau kan kơt lah soay, trong dak lêng ri nơm ân geh kơt tĭng ăp nau kan jêh rnôk geh mêt uănh. Lah geh nau kơp mbơh mô geh tâm di ri mra lŏ joi sŏk, trok pă yơn đah ăp rnoh kơl an ri geh nau êng êng ngăn ndrle nơm ân geh nkah ân tâm di. Ndri ma rnôk geh nau kơp ri ƀon lan knŭng blau ndŏ săm ƀŭt ndrel nau kơp uănh tâm di, nê lah nau kan mât kan Ngih dak bah ntŭk kan ngih dak mât nau kan tâm rnôk ƀư nau kan bah nơm. Rnôk hŏ leo dŏng prăk ân ƀon lan ri ngăn lah nŭih ƀon lan kơp dơn nau tâm di. Mặt êng ri nau kan kơl an lah ntoh tâm nau tâm kơl tâm nau rêh lah rup gui ueh ngăn bah Chính phủ ndŏ mpang ty gay ndrel ƀon lan rlet nau jêr. Ndri ma, nau kan ƀư kŏ ân geh tâm ban tâm di tâm nau rêh”.

            Gay ƀư ân dơi nau ntrŭnh mrô 30 bah Quốc hội gưl XV, mhe aơ Chính phủ hŏ ntrŭnh nau ntrŭnh mrô 86/NQ-CP mpeh ăp nau kan ndal tâm nau njrăng, rdâng srê Covid-19. Nau ntrŭnh aơ geh ân lah nau pơk trong, pơk nau ueh ân ăp n’gâng kan, ntŭk an, nkuăl tâm nau nchrăp ăp nau kan njrăng rdâng srê. Nau khlay lơn tay tâm nau ntrŭnh, Chính phủ ƀư ăp nau kan njrăng rdâng srê ân ngăn, tâm dăch ma nau dôl geh ndrel ndŏ luh nau kan săk tam ngăn hao ba lơ. Âk ntoh măt ân lah aơ lah nau tâm di ngăn ndrel ueh aih ngăn./.

                        Nŭih rblang: H’Thi