Hảng pồ nău Nùng jêng lah ntŭk tăch ndơ kalơ yôk. Ntoh bah nê đŏng, yơn Hảng Pồ ta xã Ea Siên (thị xã Buôn Hồ, n’gor Dak  Lak) mô hôm di lah rơh tăch ndơ ngăn dơm đŏng ôh, hŏ jêng săk ntơ bah du lễ hội ƀư ăp năm tâm 3 nar kêng dŭt khay ngoăy âm lịch. Lễ hội Hảng Pồ Ea Siên geh wăch rgum mô dơn nuĭh Nùng, nuĭh Tày ma đah nău tât râng bah âk rnoi nuĭh ta Dak Lak.

Du rut nău nchih: “Ring lam ăp nău kan uĕh lăng” bah rmôt Phóng viên way gŭ kan ta nkual Tây Nguyên –Radio nău ngơi Việt Nam nkoch nghị quyết mpeh “Mât ndray n’hanh ntik n’hao săk tơm văn hóa rnoi nuĭh tâm n’gâng kan rdâk njêng n’hanh mât njrăng neh dak” bah Thị uỷ Buôn Hồ, n’gor Dak  Lak hŏ n’hanh dôl nsit geh ngăn ngăn. (Nău nchih bôk năp) geh moh: “Lễ hội Hảng Pồ wăch rgum hun hao lot ngai”.

Nău mprơ Sli bah rnoi Nùng tă bah bar hê bu mprơ Triệu Thị Phóng, n’hanh Nông Thị Thiện mprơ, ntơm rơh sinh hoạt way nkô̆: “sol êng, nkra êng mpeh nău khlay kan đảng viên tâm Lễ hội Hảng Pồ” bah Chi bộ Đảng thôn 1B, xã Ea Siên, Thị xã Buôn Hồ, n’gor Dak Lak, ƀư bar pe nar bah năp nơh.

“Mpôl hên hŏ geh du câu lạc bộ mprơ Sli ta thôn 3, đah 31 nuĭh lăp kan nsum. Yơn mô hŏ  geh druh ndăm râng câu lạc bộ dja. Gâp ŭch rŏng ăp kônh, ăp yơ trêng nti tay ăp nău tă ơm gĭt mpeh nău mprơ Sli an rơh druh ndăm bah kơi, gay mât ndray nău mprơ Sli bah rnoi nuĭh he.”

“U che he hŏ cheh tanh êng ndơ nsoh way ơm bah rnoi Nùng, lah bok brai nđôch. Gâp rgop an rơh druh ndăm lah: hŏ nsoh ao nđôch ri ân cheh tanh kho nđôch đŏng. Geh nuĭh nsoh ao nđôch yơn đah kho jeans, kho n’glang ri păng mô tâm di đah nău way rnoi nuĭh he”.

“Xã hên geh 6 rnoi nuĭh lah: Rđe, Dao, Xơ Đăng, Tày, Yuăn n’hanh Nùng. He mhâm  ƀư gay ăp rnoi nuĭh ndrel râng du lễ hội nsum. Xã Ea Siên geh du lễ hội ma  geh lĕ rngôch ăp rnoi nuĭh ndrel râng ri mơ tâm rnglăp, geh nău dơi uĕh lăng.”

Nău dăn đă bah ăp đảng viên Lộc Văn Cường, Hoàng Minh Tuệ n’hanh Nông Văn Khanh dơi nchrăp na nê̆  ma siƀŭt. Aơ lah ăp nău rgop đah nuih n’hâm răp  jăp bah ăp nuĭh tâm nău kan. Khân păng ƀư lễ hội hôm uănh  năl săk nơm, rnăk wâl, kon său. Bah ndơ nsoh,  ndơ sa, tât tâm rlong ăp môn thể thao, nău pâl rlưn way ơm tâm ƀon lan. Mô dơn nê lĕ ma nău mprơ, nău ngơi, trong wơt năch mhe, wơt năch bên ….Uănh năl sŏng dăng ăp nău khoah, nău dăn đă trong nkra bah, rgâl di gay Hảng Pồ năm bah kơi lôch jêh ăp tŏng lơn.

Wa Hoàng Minh Điều, Bí thư Chi bộ thôn 1B an gĭt: Lĕ rngôch rnoh nuĭh bah thôn lah nuĭh Nùng da dê. Kônh wa “mbăk anh tĭng săk ntơ xã, săk ntơ ƀon” đah ăp nău way uĕh lăng bah rnoi  nuĭh he ta Lạng Sơn, Cao Bằng lăp tâm Dak Lak njêng nău kan bah rach năm 80-90 bah rôk năm bah năp nơh. Ta Ea Siên, Hảng Pồ ntơm nơh dơi ƀư ntoh êng tĭng rkŭm thôn, ƀon n’hanh ƀư nchah nchrai bah n’gul khay ngoăy tât khay bar âm lịch. Hảng Pồ hôm geh ăp nău tât khuch an tay đŏng kơt: nô nău ndrănh djăr nhŭl hơm, pâl cờ bạc, tĭng nău rluk mâl ơm… roh đăp mpăn rnă njrăng, khuch tât nuih n’hâm ƀon lan.  Nău ngăn geh dja, Đảng ủy, n’gâng kan xã Ea Siên gŭ  mĭn, ƀư tâm nchră n’hanh n’glêh an ƀư Lễ hội Hảng Pồ ndrel du rơh tâm  lam xã tâm 3 nar, rgum tơm lah nar 28 khay ngoăy âm lịch. Wa Hoàng Minh Điều an lah: Lễ hội Hảng Pồ Ea Siên lah nar rgum đah nău ŭch rŏng mpŏng geh bah nuih n’hâm ƀon lan đah Đảng jêng geh suan rêh n’hanh nău ring tam dăng. Tĭng wa Điều, nău ân tĭng ƀư dĭl bah chi bộ thôn 1B lah:

“Tâm chi bộ he ân sơch ăp bu kuâng geh nău nsing nơm ngăn n’hanh gĭt wât mpeh nău mprơ Sli, mpeh ăp rnoh khlay văn hoá, săk tơm bah rnoi Nùng. Dăn đă UBND xã njêng câu lạc bộ mprơ Sli tâm ban kơt câu lạc bộ ntik n’hao săk tơm rnoi mpôl đê̆ ta thôn.”

 Hảng Pồ Ea Siên năm 2024 dơi ƀư đah âk nău kan, âk mpưm. Nău way ôp kuăl brah ndơ tuch tăm jŭr geh, goh gâr ntơm pơk, rgŏ jă trong leo ƀư tâm rlong, múa yău mŭr; Njroh mprơ, ndơ ngêt sa, tâm rlong ăp môn thể thao kơt têk rse, tâm rlong duk kalơ kơh, n’hanh âk ndơ pâl rlưn way ơm an ƀon lan n’hanh năch rlong uănh saơ kơt: lảy cỏ, ntŭp blĕr, mprơ sli, mprơ then… wa Nguyễn Văn Minh, Bí thư Đảng uỷ xã Ea Siên an gĭt: Ea Siêng geh 8 thôn, đah 7.600 nuĭh n’hanh 6 rnoi nuĭh ndrel gŭ rêh nsum. Lễ hội Hảng Pồ mhe aơ hŏ wơt rlău 40 rbăn tơ̆ năch  ăp ntŭk sĭt râng. Rnoh ndơ ngêt sa, ndơ tăch dŏng tâm lễ hội n’hanh tăch an năch rnoh khlay hao tât 10 rmen prăk, tâm nê geh 90 mblâm rpu n’hanh rlău 500 mblâm sŭr gay nkret njêng ăp ndơ sa way ơm.

“Lam trong kan chính trị n’hanh ăp du hê nuĭh ƀon  lan gĭt mpeh nkô̆ hôr nău khlay da dê, mpeh văn hoá, huêng khlay bah Lễ hội. Bah nê nsing nơm, ƀư tơm ngăn, lah tơm mpôl bah lễ hội. Mpôl hên ntuh kơl tay, gŭ mĭn gay rdâk njêng lễ hội jêng ndơ geh ƀư OCOP, bah nê mât ndray, ntik n’hao săk tơm văn hoá rnoi nuĭh.”

Năm 2018, Ea Siên hŏ dơi UBND n’gor Dak Lak kơp dơn lah xã ƀon lan mhe. Mô hŏ di nuih  n’hâm đah nău dơi dja, Đảng uỷ, n’gâng kan ta ntŭk n’gluh tât rnoh rdâk njêng Ea Siên jêng xã ƀon lan mhe ntop n’hao tay tâm năm 2025. Wa Y Cing Mlô, Groi Kruanh UBND thị xã Buôn Hồ an lah: Nău dơi bah Lễ hội Hảng Pồ hŏ bun dăp tay nuih n’hâm tâm rnglăp, nkre đah ăp rnoi nuĭh. Nkre rgop uĕh tâm nău nkoch n’hơ, nkơnh mbơh ăp ndơ kah khlay bah n’gor tât ăp nkual lam dak.  

“Thị xã hŏ ƀư du rơh tâm nchră way nkô̆ hun hao Lễ hội Hảng Pồ, đah nău ŭch mbra n’hao jêng lễ hội gưl thị xã. Hăn tât mbra ƀư ăp siƀŭt gay đăng ký jêng du drăp ndơ văn hoá mô mpơl săk. Tâm dăp rgum rdâk njêng xã Ea Siên geh n’glăp tâm du dăp rgum nkual trung tâm văn hoá gay pơk hvi ƀư lễ hội dja.”

Tât nar ton hăn dơm, Lễ hội Hảng Pồ Ea Siên mbra ntơm pơk tâm nar 28 khay ngoăy âm lịch ăp năm. Nkhêp geh ăp nuĭh kon bah Ea Siên wăng sa gŭ rêh ăp ntŭk rgum sĭt. Khân păng ndrel ăp năch lam ntŭk rlong sa ndơ kah khlay kơt: bánh mƀêt, sŭr gŭch, khâu nhục; rvi rvâng đah ndrui ndrănh yăng gay tâm tuă kuăt ndrôi ndrel lảy cỏ, ntŭp bler, mprơ sli n’hanh ăp nău pâl rlưn way ơm uĕh… 

Bu mprơ Triệu Thị Phóng, n’hanh Nông Thị Thiện hŏ ndrel nău mprơ Sli dja  bah xã Ea Siên, thị xã Buôn Hồ hăn tâm nđŭr ta âk ntŭk tâm lam dak; bah bu lơ jŭr tât bu dêh bu dâng buăt nthoi nsum mpôl, mprơ rnê nău rêh, rêng lam nău tâm rŏng. păng nđơn trêng tay an rơh kon său bah kơi tay mât ndray./.