Geh rơh hăn pâl nđaih ta Dak Lak tâm ăp nar êp lễ hội cà phê Buôn Ma Thuột rơh tal 9, yuh Đoàn Thị Phương Tấm, ta nkual ƀon têh Hải Phòng saơ dŭt ndrăt, ŭch rŏng đah mông nar nchrăp an lễ hội dôl geh ta n’gor.

Gâp tât đah Buôn Ma Thuột tâm rơh aơ lah ơm lơn lễ hội du pơh, Ta ăp ngih sông sa têh, ngih rlu rlău têh way ta trong nkual ƀon têh saơ geh dŭt âk banner mpla nsơ mpeh bôk nău ƀư lễ hội cà phê Buôn Ma Thuột. Tă tâm mâp gâp dơi gĭt lễ hội dơi ƀư 2 năm du tơ̆ n’hanh geh dŭt têh. Saơ Dak Lak tâm ăp năm dăch aơ uănh khlay lơn mpeh ăp ƀư pâl nđaih. Lĕ rngôch ăp ntŭk tât geh ăp nău wơt rhơn dŭt n’hâm đah bu năch.

Năm aơ, Lễ hội cà phê Buôn Ma Thuột bah bah lơ 9-13/3 đah dŭt âk nău ƀư uĕh. Gay tâm di nău ŭch bah nuĭh ƀon lan n’hanh năch pâl nđaih, aƀaơ lĕ rngôch ăp ntŭk rlu rlău, ngih ngêt sa têh, ngih rlu rlău têh ta Dak Lak dŭt n’hâm nkra uĕh ntŭk ntô, dăp pă nuĭh kan, n’hao rmôt nuĭh kan. Wa Nguyễn Minh Khánh, mât uănh tăch rgâl khách sạn Elephans, nkual ƀon têh Buôn Ma Thuột an gĭt:

Khánh sạn mpôl hên geh 185 jrô đah 4 ntil jrô. Tât aƀaơ hin ri lĕ rngôch rnoh jrô bĭch bah khách sạn lĕ dơi nchăm, âk ngăn lah ăp nar 9-11/3. Năch lĕ nchăm, geh du đêt bah ơm. N’hanh gay nchrăp an lễ hội cà phê êp tât ri khách lĕ rƀŏng tĭng yôk băng rôn, n’hanh mpla nsơ ăp bôk nău ƀư lễ hội.

Lam n’gor Dak Lak aƀaơ geh bơi 280 ntŭk rlu rlău nchrăp wơt bu năch đah dĭng lĕ bơi 5.600 jrô bĭch, 12.400 nsưng. Tâm nĕ geh 21 khách sạn bah 1-5 sao, hôm ƀa ƀă lah jay rlu rlău năch, jay bĭch, homestay, ntŭk ƀư gŭ rlu rlău bah dih n’hanh rnăk pâl nđaih. Tât aƀaơ, âk ta ăp ntŭk aơ lĕ geh bah 35-98%, du đêt ntŭk lĕ mbơh mô hôm geh jrô bĭch.

Nô Võ Minh, Giám đốc mât uănh 2 ntŭk rlu rlău ta Buôn Ma Thuột nkoch, ntŭk kan lĕ rgum nâp nâl nuĭh kan, n’hao tay nuĭh kan tĭng khay lĕ jêh ntĭm nti gay tâm di nău ŭch rhŏ n’hanh ntop kơl mbơh an bu năch. Ndrel đah nĕ, bôk nău kơl an, ntrŭt nsôr pâl nđaih dơi ƀư gay wăch rgum năch tâm ăp nar ƀư lễ hội.

Ndâk ƀư ăp sam ƀŭt nchih mpeh ndơ kah Tây Nguyên, ƀư ăp mpla nsơ mpeh nar pâl nđaih, ăp nău rhŏ ntop kơl an ndơ djôt sĭt an năch rlu rlău rnôk tât uănh nsong ƀư ngăn tâm rơh lễ aơ. Kơt khách sạn n’hanh resot mbra mô hao khlay ma hôm an rnoh khlay tâm di an ăp công ty pâl nđaih kơt ntŭk pâl nđaih gay ntrŭt hao, ntrŭt nsôr hao jêng an pâl nđaih Dak Lak aƀaơ hin.

Ndrel đah nchrăp ăp ndơ mpeh ndoh ndơ, rlu rlău, ăp ntŭk tăch rhŏ an nău pâl nđaih nchrăp kơp uănh, ndâk ƀư ăp trong tuor, trong pâl nđaih uĕh, rgum jă, tâm rgop đah ăp nău ƀư tâm trôm lễ hội cà phê.

Geh 34 tuor hăn ndrel đah âk ndơ ƀư ngăn gay năch săch, tâm nĕ geh âk tuor hăn ndrel đah trong drăp ndơ yău, dơi an nkoch mbơh, mpla nsơ ăp ntŭk uĕh n’hanh ăp ntŭk ơm têl ntoh lư ta Dak Lak. Tĭng wa Lê Văn Đức, Groi kruanh Hiệp hội pâl nđaih Dak Lak, rhoăt nău blău ơm bah rơh lễ hội bah năp, ăp ntŭk kan trong hăn pâl nđaih lĕ săch na nê̆ ăp ntŭk tât, nău ƀư ngăn ngên n’hanh uănh dăp mông nar tâm di an năch pâl nđaih dơh săch ăp tuor, trong hăn tâm di.

Lĕ rngôch ăp doanh nghiệp lữ hành nchrăp da dê n’hanh nchrăp uĕh lĕ rngôch ăp bôk nău ƀư tuor, trong hăn gay rhŏ du trong uĕh ngăn. Lơn lah tâm rgop ăp ntŭk drăp ndơ yău n’hanh ăp ntŭk bri dak uĕh bah n’gor Dak Lak, jêng bu bôk nău kan mpeh way cà phê gay năch tât ƀư ngăn, trong ƀư nkret njêng n’hanh nkra njêng cà phê. N’hanh khay 3 aơ yan nkao cà phê dŭt âk ri năch pâl nđaih tât ta aơ dơi uănh n’hanh lăp tâm mông nar lễ hội.

Nău ƀư têh đah dŭt âk nău ƀư uĕh, răm, Lễ hội cà phê Buôn Ma Thuột dơi mpŏng lah dơi an mpla nsơ ndơ geh bah Dak Lak, wăch rgum ntuh kơl, hun hao wăng sa. Gay geh nău uĕh tâm nuih n’hâm năch, nău kan pâl nđaih Dak Lak dôl nsrôih nchrăp ăp ndơ uĕh ngăn, nchrăp gay rhŏ an bu năch tâm rơh lễ hội rơh tal 9 aơ.