Bol nkual đồng bằng sông Cửu Long geh n’hong dak me dak diăng tâm păch pêng, geh âk gôl, âk ntŭl yôk yơn đah nău mât uănh bah Đảng- Ngih dak hŏ ntuh kơl ntung trong tât aƀaơ muh măt nkual neh dja hŏ rgâl kloh. Ntung, trong dơi rdâk njêng nâp, têh uĕh, mbluh soih, rhuăt glêh mông nar rsong hăn, rdeng ndơ tăch lah ndơ uĕh gay hun hao nkual neh bri lâng dâng sre dak me n’glah trong sĭn hun hao “Lhung jong săk” nsing nơm lăp tâm rơh hun hao mhe.

Ntung Rạch Miễu 2 (mbăk rlău dak me sông Tiền) nthoi bar n’gor Tiền Giang n’hanh Bến Tre geh lĕ rngôch rnoh ntuh kơl 6.800 rmen prăk ndăn ngăch ƀư lôch jêh gay n’glăp dŏng. Ndrĭ Bến Tre - Tiền Giang hŏ geh 2 ntung “nthoi bar kơh dak me rhơn”, nkra nkô̆ nău kol khan ndeh mbro âk năm aơ. Wa Trần Văn Bon, Giám đốc Sở xây dựng n’gor Tiền Giang rhơn an gĭt:

 “Ntung Rạch Miễu dja hŏ ƀư lôch jêh rlău 80%, ntung dja ƀư dŭt mbrơi lôch jêh lah nar 2/9/2025. Aơ lah nău kan dŭt khlay an nău hun hao wăng sa- rêh jêng kon nuĭh 2 n’gor Tiền Giang n’hanh Bến Tre n’hanh ăp n’gor duyên hải bah nkual”.

Ma âk tơm prăk bah trung ương, n’gor, rĭng ăp năm, n’gor Tiền Giang rgum ntuh kơl rlău 800 rmen prăk hun hao ntung trong. Ăp trong nchrăp pơk hvi, n’hao têh uĕh tay ăp ntung trong me hŏ ƀư wat jêh, nău rsong hăn bah nuĭh ƀon lan dŭt dơh ngăch, ô tô hăn dơi tât ăp xã, ấp. Wa Ngô Tấn Lâm, ta xã Tam Bình, nkuâl Cai Lậy, n’gor Tiền Giang mpơl nău:

 “Gâp rêh 2 chế độ ma saơ chế độ dja dŭt uĕh, ntung trong tâm ƀon lan hun hao. Ăp rnăk geh  ndơ honda 2-3 bôk, ƀon lan geh ndrŏng. Ntung trong aƀaơ hŏ mbluh soih, gôl Ngũ Hiệp aƀaơ mbăk dơi tât ntung dŭt dơh ngăn, ƀon lan geh ndrŏng. Ăp năm ntơm nơh, ƀon lan ƀư jay ta neh, yơn aƀaơ mon jay lăk bê tông, geh nuĭh mon jay 3-5 dăp. Trong tăch luh ndơ tuch tăm nơm geh ntung njŏ dŭt dơh ngăch, dah rŏng ma rsong hăn”.

Bến Tre tă dơi uănh lah “gôl êng” yor jêng bah 3 gôl dak trâp djut, dak me tâm păch pêng. Tât aƀaơ, ăp ndrâm duk mpun hăn rlău dak me hŏ rgâl ma ntung bê tông nâp uĕh. Năm e nơh, Bến Tre lah n’gor lor bôk năp bah nkual Đồng bằng Sông Cửu Long ntơm rdâk leo ƀư trong meng dak lêng. Wa Nguyễn Trúc Sơn, Groi kruanh UBND n’gor Bến Tre  an gĭt:

 “Trong meng dak lêng, năm 2024 mpôl hên hŏ rdâk ƀư du gâl trong n’hanh du mblâm ntung. Năm 2025 mpôl hên ƀư tay njăr trong meng dak lêng dja, lor bôk năp lah nthoi đah n’gor Tiền Giang n’hanh n’gor Trà Vinh, lah 2 bôk nthoi geh ntŭk ntô ndơ dŏng dŭt têh ma mpôl hên ân mbrôn suan rdâk ƀư tay trong dja tâm năm 2025, ma tơm ndơ hŏ tâm pă an lvang năm 2024-2025”.

 Tât aƀaơ, n’gor Sóc Trăng geh 17 njăr trong tâm chruh nthoi, rgop hun hao wăng sa- rêh jêng kon nuĭh, n’hanh wăch rgum ntuh kơl tâm ăp n’gor. Lơn lah nchrăp tât 30/4 năm aơ, ntung Đại Ngãi 2 n’hanh gâl trong gay nthoi 2 nkuâl Long Phú n’hanh nkuâl Cù Lao Dung (Sóc Trăng) mbra ƀư wat jêh, njêng nău tâm nthoi dơh đah ăp n’gor duyên hải mpeh bah dâng n’hanh đah nkual ƀon têh Hồ Chí Minh. Wa Nguyễn Thanh Chiều, Giám đốc HTX Nông nghiệp An Phát ta xã An Thạnh 1, Cù Lao Dung, Sóc Trăng, nkoch:

"Ntơm nơh Cù Lao Dung geh khan yơt êng kăl ti dak me, jru ngai, lah hăn chuah dak me dŭt jêr jŏt đŏng. Ntung Đại Ngãi wat jêh, rsong hăn ri HTX mpôl hên mbra hun hao lơn, geh suan tâm rlong âk lơn đah ăp ndơ tơm play, lơn lah play wai. Mpôl hên dôl geh trong nchrăp pơk ntŭk nkret njêng play wai pâr jôn n’hanh hun hao pâl nđaih bri dak"

Ta ăp n’gor êng kơt: An Giang, Đồng Tháp, Cà Mau, Vĩnh Long ntung trong dơi ntuh kơl wat jêh, “rhuăt glêh” trong hăn đah ăp n’gor, rhuăt glêh mông nar rsong hăn bah nuĭh ƀon lan.

Tĭng Bộ Xây dựng, aƀaơ, nkual đồng bằng Sông Cửu Long hŏ n’hanh dôl an ƀư 9 ntung trong khlay gưl neh dak đah lĕ rngôch tơm prăk ntuh kơl nklăp 106.000 rmen prăk. He mbra năl lah mô hŏ tă geh ntung trong nkual đồng bằng sông Cửu Long dơi mbrôn suan ntuh kơl dăng kơt aƀaơ. Tĭng dăp rgum tât năm 2030, Đồng bằng Sông Cửu Long geh nklăp 1.200 km trong cao tốc đah 3 njăr trong tĭng trong rƀŏng Bắc – Nam n’hanh Đông – Tây. Tât aƀaơ, nkual dja hŏ dăp rgum lôch jêh tach ndeh păr, trong dak tâm nkual.

Ngăn hŏ an saơ, ntung trong hăn lor bah năp, wăng sa hun hao tĭng bah kơi. Năm rlău aơ, rnoh ngăch hun hao wăng sa bah nkual đồng bằng Sông Cửu Long geh tât 7,3%, âk rlău rĭng geh nsum bah lam dak. Rĭng geh tĭng bôk nuĭh tâm nkual geh tât 80,7 rkeh prăk năm 2024.

Đah ăp ndơ ƀư, trong nchrăp ntung trong dôl dơi jêng n’hanh ndăn ƀư lôch jêh tâm ăp năm tât mbra lah ndơ khlay kơl nkual neh lâng dâng sre dak me n’glah trong sĭn “lhung jong săk” hun hao, nâp dăng lăp tâm rơh hun hao mhe bah neh dak./.