VOV4.M’nông: Bah nau ngăn nau kan bah gưl kan tal 14 kŏ ân saơ: Kan ăp nŭih rnoi mpôl đê̆ nsôih râng ndrel ma săch kan geh ăp nŭih ntơh măt Quốc hội ngăn ngên geh nau dơi, hŏ rgop nau mô jê̆ tâm nau dơi nsum bah Quốc hội, ngăn lah tâm nau kan ndâk njêng ndrel ƀư ân dơi ăp nau kan rnoi mpôl đê̆. Aơ lah ăp nau kan khlay gay ntrŭt dăng nau hun hao ndrel n’hao nau rêh bah nŭih ƀon lan tâm nkuăl yôk, nkuăl rnoi mpôl đê̆. Tĭng nau nchrăp, Quốc hội gưl 15 nsôih geh đê̆ ngăn lah 18% ntơh măt lah nŭih rnoi mpôl đê̆.

          Quốc hội gưl 14 geh 86 ntơh măt lah nŭih rnoi mpôl đê̆, geh rnoh 17,3% rđil nau nchrăp bôk năp mô tŏng 4 nŭih. Bol ma kơt nê, ăp ntơh măt Quốc hội ntơh ân nkuăl rnoi mpôl đê| hŏ ntoh nau nsôih, nau kan, râng ueh ngăn tâm ăp nau kan ndâk njêng pháp luật, uănh ndrel ntrŭnh ăp nau kan khlay bah neh dak. Gay Quốc hội gưl 15 lŏ ndơn ndrel ƀư ân ueh ăp nau tă nau dơi hŏ tă geh, ngăn lah tâm nau ndâk ndrel ƀư nau kan rnoi mpôl đê̆ ân geh n’hao lơn tay nau ueh bah ăp ntơh măt Quốc hội, săch dơi ăp ntơh măt blau ngăn gay ma râng Quốc hội nê lah nau ma cử tri ŭch ngăn rnôk ma nar săch nŭih kan ntơh măt Quốc hôị gưl 15 ndrel ntơh măt HĐND ăp gưl mra geh tâm lơ 23/5 tât. Cử tri Phạm Giáo, nkuăl Đức Phổ, n’gor Quảng Ngãi ŭch:

           ‘N’hao nau ntơh măt ân nkuăl jêr jŏt, nkuăl, jru, nkuăl ngai, nkuăl ƀon lan rnoi mpôl đê̆ mra geh nau dơi ueh lơn dăch lơn, gĭt ăp nau lơn mpeh nkuăl rnoi mpôl đê̆ vay lah ăp nau jêr jŏt, ƀon lan ê geh gĭt rbăng âk, nau văng sa hôm jêr. Yor ri, lơn ma gĭt dơi ăp nau jêr, lơn ma gĭt nau ŭch bah ƀon lan ri mra leo tât ân Quốc hội gay geh ăp nau kan kơl an đah nkuăl aơ, đăp mpăn nau dơi n’hao nau rêh bah ƀon lan ân bah oi ăp nau jêr bah khân păng”.

          Năm kan rlau aơ, Quốc hội hŏ nchră luh 2 nau ntrŭnh khlay, nê lah nau ntrŭnh mrô 88 nchră Bôk nau kan rgum hun hao văng sa, rêh jêng ân nkuăl rnoi mpôl đê| ndrel gôl yôk lvang năm 2021-2030 ndrel nau ntrŭnh mrô 120 ân dŏng nau ntuh kơl Bôk nau kan bah neh dak hun hao văng sa, rêh jêng nkuăl ƀon lan rnoi mpôl đê| ndrel nkuăl yôk lvang năm 2021-2030. Ngăn lah, nau ntrŭnh 88 rƀŏng tât nkô| nau tât năm 2030 lah n’huch rnoh rnăk ach o jur tâm dâng 10%. Nau ngăn lah mô hôm geh ăp xã, thôn jêr jŏt ngăn, 70% rnoh xã nkuăl rnoi mpôl đê| geh dơi ƀon lan mhe. Wa Nguyễn Lâm Thành, rmôt kan Lạng Sơn, kơp dơn:

           ‘Quốc hội hŏ nchră nau nau ntrŭnh, lah leo ăp nau dơi geh tât nau kan ngăn lăp tâm ntrong kan bah kônh wa rnoi mpôl đê̆ ndrel ăp nkô̆ nau ân geh rklaih. Mra dơi uănh aơ lah rơh bôk năp Quốc hội geh ăp nau ntrŭnh têh. Aơ kŏ lah nau ntoh nau kan ndrel nau rŏng đah ăp ntil ma kônh wa rnoi mpôl đê̆. Aơ kŏ lah rơh gay ma nơm lŏ nkah ndrel ntoh nau kan bah nơm đah nkuăl jể jŏt gay kơl an ân nkuăl aơ hun hao ndrel neh dak ndrel đăp mpăn ân nau hun hao tâm ban đah ăp rnoi mpôl”.

          Yor nau tât geh bah du nkuăl yôk, trong hăn hôm jể, kơp n’ăp ma nau gĭt rbăng bah kônh wa...lah nau kan tâm nchră, bonh đă săch kan ngăn ngên geh ƀư mô ueh ri mra khuch ngăn tât nau dơi bah kônh wa ndrle kŏ khuch đŏng tât nau tă geh nsum bah rơh săch kan. Gay dơi geh rnoh đê̆ ngăn 185 rnoh ntoh măt nŭih rnoi mpôl đê| tâm năm kan Quốc hội gưl 15, gay săch dơi ăp nŭih tâm di ngăn, ntoh măt ân kônh wa rnoi mpôl đê| ân geh nau mĭn njêng nâp ndrel gĭt kloh mpeh nau jêng bah ăp nŭih. Ngăn lah nau kan nkoch mbơh ân geh uănh khlay gay ma ân saơ dơi nau khlay, nkô̆ nau tâm ăp nau kan bah rơh săch kan, nsôih râng ndrel bonh đă nŭih ƀon lan ndrel râng nau săch kan ân geh jêh nau dơi, nau kan bah cử trị, ƀon lan. Yor ri, săch luh ân dơi ăp nŭih ntoh măt ân ƀon lan săch lah ăp nŭih mra ntoh măt ân kônh wa râng nau kan kơl an, đă nchrăp nau kan ndrel uănh nau ƀư nau kan. Ntơh măt Quốc hội 14 Quàng Văn Hương, rmôt bah n’gor Sơn La, lah rjăp:

           ‘Nkoch trêng ân geh nau kan gay ma kônh wa gĭt ân dơi mpeh nau kan, nau dơi, nau geh jêng kŏ kơt lah nau kan ân geh tât nau nsôih, nau kan bah ăp ntoh măt ma nơm săch luh. Ân geh nkoch trêng đah ăp nau dơi, nau geh jêng bah nŭih geh nau gĭt ngăn, bah nê kônh wa saơ dơi ăp nŭih mra dơi geh nŭih ntoh măt ân nơm. tâm nê, lah săch dơi ăp nŭih rnoi mpôl đê̆ mô lah nŭih ntơh măt rêh tâm nkuăl rnoi mpôl đê̆ râng kan Quốc hội ri nê lah ăp nŭih geh leo nau ngơi bah kônh wa, nkoh tât ăp nau mĭn ŭch bah kônh wa tât ntŭk kan bah Quốc hội”./.

                             Nŭih rblang: H’Thi