VOV4.M’nông: Rơh rƀŭn Quốc hội gưl 14 hŏ lôch geh nau dơi đah nau kan geh săch nŭih ntơh măt gưl prêh, tâm nê Chính phủ năm kan mhe. Jêh rnôk ndơn nau kan bah Thủ tướng Chính phủ Phạm Minh Chính kŏ kơt lah ăp nŭih kan bah Chính phủ, ăp ntơh măt Quốc hội hŏ ntoh nau rnơm ndrel nau ŭch du Chính phủ rjăp pah kan gay ma ndâk njêng, ƀư kan jăp.

            Ăp ntơh măt kơp dơn ndrel rnê prêh Thủ tướng Chính phủ mhe Phạm Minh Chính lah nŭih geh nau rjăp, geh nau mĭn rgâl mhe, blau nau kan, nuih n’hâm kan prêh ndrel pah kan ntoh ngăn bah ăp ntŭk kan ma păng tă mât ndrel nau geh ta ưbah tâm dâng. Wa Bùi Sĩ Lợi, rmôt kan bah n’gor Thanh hoá, kơp dơn:

             ‘ Đah Thủ tướng Chính phủ, aơ lah rup gui bah nŭih rđau kan geh nau rjăp, tâm dăch ngăn mpeh tâm dâng rnôk ma păng ƀư Bí thư n’gor uỷ Quảng Ninh, jêh nê lah Kruanh rnâng kan bah Trung ương ndrel lah nŭih gĭt kloh ngăn ăp nau kan bah Đảng. Đah nuih n’hâm nê, đah nau kan geh nê, ndrel ma nau ngăn, gâp geh nau mpŏng rnơm ngăn bah Thủ tướng lah nŭih geh nau kan rjăp, rgum tâm ăp nau kan khlay bah neh dak, rklaih ăp nau khlay ndal ma nŭih ƀon lan dôl kâp rnơm”.

            Geh nar pah kan jŏ jong đah Thủ tướng Phạm Minh Chính rnôk păng ƀư Bí thư n’gor uỷ Quảng Ninh, wa Đỗ Thị Lan, rmôt kan bah n’gor Quảng Ninh, mbơh:

             ‘Thủ tướng Chính phủ Phạm Minh Chính mro ntoh nơm lah nŭih nau blau tâm nau mĭn mhe, geh trong rƀŏng kan tă bah ngai ndrel lah nŭih geh nau mĭn kan, tâm dăch ma nau ntrŭnh bah Trung ương ndrel nau geh jêng bah ƀon lan ndrel nau hun hao bah neh dak. Tâm rnôk pah kan ta Quảng Ninh phung hên saơ kloh ngăn bah ăp nau tă geh ma Thủ tướng hŏ lơi ân, kơt lah nau rgum ăp tơm nau kan tâm nau ntuh kơl nkra ngih vâl, gung trong tâm nau dăp rgum, leo nau rgum lăp tâm nau ngăn kơt lah hun hao nau kan công nghiệp, nkuăl văng sa, nthoi đah nkuăl văng sa ndrel neh dak, rgum tơm hun hao trong kan ân tâm ban…jêh ri ƀư nau rgâl mhe hành chính”.

            Hôm wa Nghiêm Vũ Khải, rmôt kan bah n’gor Hải Phòng, kơp dơn: Nau jêr kŏ kơt lah nau ntul rlong nrôk aơ tâm nau rđau kan lah nsum ndrel rđau kan Chính phủ lah êng nê lah nau tât, rnôk păng geh tât rgâl êng. Nê lah nau ma Thủ tướng mhe bah Chính phủ ndrel ntrong kan bah Chính phủ rnôk aơ ân geh nkah kan:

             ‘Tâm rnôk neh dak geh âk nau ueh yơn kŏ geh âk nau ntul rlong ndrel ăp nau ntul rlong nkre tâm nau kan bah nơm kơt lah rgâl mhe hành chính geh âk nau kan tât yơn kŏ geh âk nau hôm ntoh luh mô lah tâm nau nchrăp mbơh ăp nau kan mpeh lam ntur neh ndrel rklaih ăp nau geh tât mhe, aơ lah kan ân geh rklaih ân tâm di bah năp nau rgâl mhe bah văng sa ntŭk ntu ntuh kơl. Phung he ân geh kơt tĭng tâm nau kan mhe, rgâl nau blau mhe mô êng knŭng tâm nau kan khoa học công nghệ ma tâm nau mât kan, nau mbơh mhe bah ntŭk kan ê nkra ndoh ndơ, tăch rgâl đah dak ba dih kŏ geh nau rgâl ân ueh, nchrăp tâm rnglăp ndrel nchrăp ƀư nau kan leo văng sa ân geh nau dơi nâp nâl”.

            Ta rơh rƀŭn aơ, Quốc hội ân ƀư ntop tay đah 2 Groi Thủ tướng Chính phủ ndrel 12 Bộ trưởng, kruanh rđau nau kan. Ăp ntoh măt ân lah, ăp nŭih geh săch ƀư Groi Thủ tướng, Kruanh n’gâng kan rnôk aơ lah ăp nŭih tâm rơh rlau aơ geh âk nau kan ngăn tâm nkuăl, geh nau blau tâm nau mât nau kan ndrel geh nau ntrŭnh ƀư ăp nau kan bah nơm. Ngăn lah geh nau blau, nau dơi, nau rêh, nau mĭn ueh, leo lor ndrle geh ntoh măt Quốc hội, ăp nŭih kan tâm Chính phủ ndrel ƀon lan rnơm. Aơ lah ăp nau ueh ngăn ân ăp rđau kan bôk năp ƀư nau kan bah nơm tâm rơh tât. Wa Phạm Văn Hoà, rmôt kan bah Đồng Tháp ngơi:

             ‘Gâp mĭn ê lor aơ nŭih rđau kan ân ƀư ăp nau kan lah ăp nŭih tă geh nau dơi bah bôk nau kan geh nau leo tât rnôk aơ ntă nau ê geh dơi bah ntŭk kan, rmôt kan bah neh dak bah ăp nau ŭch, nau mĭn bah kônh wa gay ma nơm ân geh rđau, rđau ƀư ân dơi nau kan dăch tât. Gay ân ăp nŭih rdau ntŭk kan nê ƀư ân dơi nau kan bah nơm gay ma rêng ueh lơn nau ŭch kâp bah ăp ntoh măt Quốc hội hŏ rnơm ndrel ân ƀư. Ăp nau kan hôm jêr bah kônh wa tâm nê geh ăp nŭih rđau kan kŏ ân geh tâm rgop ân ƀư ăp nau kan bah nơm gay ma rklaih ăp nau jêr”.

            Êng đah n’gâng kan ntĭm nti, wa Nguyễn Thị Việt Nga, rmôt kan bah Hải Dương ŭch, Kruanh n’gâng kan mhe mra geh ndŏ luh ăp nau kan ngăn tâm nau ntĭm nti ân geh tâm di lơn. Phung he mĭn nau kan gay ma hun hao mô ah ân geh rgâl mhe nau kan ntĭm nti mô di lah nau kan gleh nar ma ân geh mĭn ân rjăp nâp ndrel ân geh njrăng ngăn. Phung he mô dơi ƀư ndal geh ăp nau rgâl mpeh nau tơm, ma ăp nau rgâl mpeh nau ntrŭnh đă ri ân geh njrăng lor. Phung he ân geh kơp ân ăp, geh trong kan ân n’hêl ngăn, geh mông nar ân rjăp, nâp ri mơ, mô dơi geh nau ƀư ngăch ndal ôh”.

            Kơt nau ndơn ton bah năp Quốc hội, Thủ tướng Phạm Minh Chính ŭch lah, ndrel đah ăp nŭih kan tâm Chính phủ mra leo lôch n’hâm nơm, rlet âk nau jêr, ntul rlong, ndơn tĭng, kơt tĭng ăp nau ueh ơm ndrel nau tă blau kan, nau nsôih bah ăp đồng chí rnâng kan Chính phủ, nŭih kan bah Chính phủ tâm rnglăp, pah kan ân rjăp, kan ân n’hêl, săk tam, lôch n’hâm soan tâm nau kơl an neh dak, kơl an ƀon lan. Phung he rnơm tâm nau mĭn, nau ŭch mra geh ăp nar ueh lăng lơn ân neh dak./.

                                                Nŭih rblang: H’Thi