VOV4.Mnông- Ôi nar 14/12, rơh rƀŭn nchră ăp năm tâm mâp nghị viện châu Á- Thái Bình Dương tal 29 (APPF-29) yor Quốc hội Hàn Quốc leo ƀư tĭng trong trực tuyến lĕ ntơm pơk lĕ rngôch. Tât râng rƀŭn nchră geh klâp ma 150 đại biểu tât bâh ăp nghị viện kan ndrel APPF, nuĭh kan mât uănh nău kan n’hanh ăp năch geh jă. Mpôl đại biểu Quốc hội Việt Nam yor kruanh Quốc hội Vương Đình Huệ leo tơm lĕ tât râng rơh rƀŭn nchră. Ntoh ngơi vơt rhơn rƀŭn nchră, Tổng thống Hàn Quốc Moon Jae In lah na nê̆, ăp nghị viện geh nău kan dŭt khlăy, ndơn kan an nău ngơi bâh ƀon lan, ntrôl ăp nău kan kơl an gay ma ndơ̆ ăp ngih dak plơ̆ tay kơt ơm mhe. Tổng thống Moon Jae In kuăl đă, ăp nghị viện APPF mpơl nău kan leo kan khlăy tâm nău nchrăp an du rach năm kan mhe, nkre lah, mpơl nău mĭn ŭch, rơh rƀŭn nchră APPF-29 mbra geh nău dơi ueh, ntop ndrel ndâk nsơm tâm kơl nghị viện âk ding ndrel tâm rnglăp, tâm kơl ndâk nsơm lôch nuh srê, yor du nău rêh let năp tay ueh lơn, mpơl na nê̆ soan kan bâh nău kan đah dak bah dih âk ding tâm rnôk aƀaơ.

Nuĭh rblang: Thị Đoắt