VOV4.M'nông: Ôi 14/12 ta  hội trường Diên Hồng, jay Quốc hội, Bộ Chính trị, Ban Bí thư tâm nchră dak bah dih lam dak an tĭng ƀư Nghị quyết Đại hội tâl XIII bah Đảng tĭng trong ƀư mâp na nê̆ n'hanh pơk sŏng dăng. Tổng Bí thư Nguyễn Phú Trọng tât râng n'hanh geh nău lah khlay ta rnôk tâm nchră. Aơ lah tâm nchră tâm boh dak bah dih lam dak lor bôk năp tă bah Bộ Chính trị, Ban Bí thư rđău đă ƀư na nê̆ nchră mpeh pah kan tâm boh dak bah dih bah Đảng, tâm boh dak bah dih bah Ngih dak, tâm boh dak bah dih ƀon lan n'hanh lam trong kan chính trị. Tâm nchră lah rnôk gay lam n'gâng kan tâm boh dak bah dih uănh tay rnôk an tĭng ƀư n'hanh nchră ăp trong nkra gay tĭng ƀư geh nău tam nău kan tâm boh dak bah dih rgum tơm tâm ăp năm tât. Aơ lah rnôk gay ăp gưl, ăp n'gâng kan, ăp n'gor n'hanh rmôt cán bộ ƀư pah kan tâm boh dak bah dih gĭt êng ăp tŏng n'hanh jru  hvi lơn đŏng mpeh nô nău, ntŭk gŭ kan bah neh dak he tâm nkual n'hanh lam ntŭr neh; ntŭk gŭ kan, nkô̆ khlay n'hanh nău khlay bah pah kan tâm boh dak bah dih tâm lĕ rngôch trong rdâk njêng n'hanh mât njrăng neh dak, njêng jâng nsan mhe, nău nsrôih mhe n'hanh suan ntrôl mhe an lam  trong kan chính trị, ăp gưl, ăp n'gâng kan, tĭng mpôl kan n'hanh ăp nuĭh tâm nău kan tâm boh dak bah dih./.

Nuĭh rblang: Điểu Thân