VOV4.M’nông: Rlău 2 năm bah năp, câu lạc bộ Yor mpôl oh he ta nkuăl Chư M’gar, n’gor Dak Lak lĕ mbư âk nău kan rbŏng tât ăp oh kon hŏk ach o, jêr jŏt ta ntŭk. Ăp nău ƀư geh nkô̆ bah câu lạc bộ lĕ rgop mĭn uănh, ntĭm nti ăp oh, ntop soan an ăp oh nsrôih tay, nsrôih nti ren uĕh lơn.

Wơt dơn nklâm ndơ dŭt năm geh phe, dak toh ndrôk n’hanh du đêt ndơ dŏng nti, H’Yên Niê, jrô 8B, ngih sam ƀŭt THCS Ngô Mây, xă Ea Mdroh, nkuăl Cư M’gar, dŭt răm yor nklân ndơ aơ aơ kơl me bơ̆ dơh oi du đêt prăk dŭt ăp nar. Săk oh geh tay ndơ dŏng rhŏ an nti ren. Rnoh ndơ aơ bah nău nchrăp ƀư “Ntop soan trong jong”, câu lạc bộ Yor mpôl oh he nkuăl Cư M’gar hôm e an ăp khay bơi 1 năm bah năp, ntrŭt nsôr H’Yên lơ nsrôih lơn tâm nti nsơm:

          “Tâm rnôk bah năp oh dơi sŏk prăk kơl hăn nti ntop soan hăn trong ngai, dơi ăp nai ntop kơl ăp khay djôt ndơ tât jay. Rlău ma nĕ oh hôm râng jrô nti ŭch rŏng, dơi ăp nai ntĭm tay môn toán, văn, anh, dơi răk nđơn n’hanh pâl rlưn. Oh saơ dŭt răm n’hanh nsing nơm lơn, oh mbra nsrôih nti an gĭt, gơih đeh, djăt nău me bơ̆ gay ăp nai mô rngot”.

          Ntop soan hăn trong ngai lah nău nchrăp ƀư dơi câu lạc bộ Yor mpôl oh he nkuăl Cư M’gar mbơh ƀư bah bôk năm 2021 an kon hŏk jêr jŏt n’hanh kon hŏk rnoi mpôl đêt ta lam nkuăl. Tĭng nĕ, ăp nuĭh tâm câu lạc bộ mbra boăt nthoi, rgŏ jă ăp nuĭh lŏng bôk tôr “ntop soan” an du kon hŏk geh nău rêh jêr jŏt đah trong ntop kơl prăk ăp khay tâm năm ăp oh hăn nti, jŏ tât rnôk lôch gưl nti. Rnoh ntop kơl lah 240 rbăn du khay đah du hê oh kon hŏk gưl mầm non n’hanh tiểu học, 290 rbăn prăk du khay đah du hê kon hŏk trung học cơ sở. Tâm năm 2021, câu lạc bộ lĕ boăt nthoi ntop kơl an 103 oh, đah dĭng lĕ rnoh prăk bơi 150 rkeh prăk.

          Câu lạc bộ geh âk nău nchrăp ƀư êng hăn ndrel đah kon hŏk nkual rnoi mpôl đêt kơt: Jrô nti ŭch rŏng ntĭm tay an dơm an kon hŏk, an bê ntil nta an nău rêh rnăk wâl kon hŏk jêr jŏt; ntĭm re dak an dơm an kon se, ndâk njêng jay tâm kơl an ăp Tủ ndrôm sam ƀŭt jrô nti gay n’hao văn hóa răk uănh an kon se.

          Lơn lah, tâm rơh srê Covid-19 rơh tal 4 ntoh, câu lạc bộ geh âk nău ƀư ntop kơl kon hŏk kơt bôk nău kan ndrôm sam ƀŭt giáo khoa an oh mô lah an điện thoại ntop kơl nti trực tuyến. Oh H Mít Knul, kon hŏk jrô 8B, ngih sam ƀŭt THCS Ngô Mây, xă Ea Mdroh, nkuăl Cư M’gar, dơi sŏk điện thoại thông minh n’hanh sim 4G bah bôk nău kan nkoch:

          “Tâm năm bah năp oh dơi sŏk điện thoại gay nti online. Điện thoại kơl oh dơi nti uĕh lơn. Oh saơ dŭt lah uĕh ăp nai n’hanh ăp kônh yơ lŏng bôk tôr lĕ kơl oh gay oh nti ren uĕh lơn n’hanh bah kơi aơ têh oh mŏng mbra dơi joi geh nău kan đăp mpăn gay kơl tay ăp oh ach o jêr jŏt kơt nơm nar aơ”.

          Dơi ndâk njêng bah khay 8 năm 2019, Câu lạc bộ Yor mpôl oh he mpeh tâm Hội đồng đội nkuăl Cư M’gar n’hanh nuĭh tâm mpôl kơl kan Ngih dak nkual Tây Nguyên (mpeh tâm Ntŭk kơl kan Ngih dak, Trung ương Đoàn). Câu lạc bộ aƀaơ geh 32 nuĭh, du hê du nău kan yơn geh nsum nău rƀŏng lah mĭn uănh, ntĭm nti ăp oh kon hŏk ta nkual jru ngai. Nô Mai Văn Chuyền, nai ngih sam ƀŭt THCS Ngô Mây, Chủ nhiệm Câu lạc bộ nkoch:

          “Nău jêr jŏt bah ăp oh lah geh nău tâm pă bah lĕ rngôch ăp nuĭh, bah nsum mpôl ri nĕ mbra lah nuih n’hâm an ăp oh dơi saơ nău khlay bah nău tâm pă, nău kơl bah lĕ rngôch ăp nuĭh an ăp oh ri bah kơi aơ mbra lah nău nti uĕh năp an ăp oh tâm rgŏ năp. Tâm năm tât đah trong way ƀư n’hanh nău rƀŏng nău kan kơt nĕ câu lạc bộ dôl rƀŏng tât ăp bôk nău kan geh nău nâp nâl, jŏ jong n’hanh geh nău ntrŭt jru tât ăp oh n’hanh tât ntŭk gŭ rêh, geh nău uănh mĭn bah ăp nuĭh tât ntĭm nti n’hanh hun hao bah kon se, lơn lah kon se ta nkual jru ngai, nkual ƀon lan”.

          Tâm năm 2021, câu lạc bộ lĕ rgŏ jă geh bơi 1 rmen prăk gay ƀư ăp bôk nău kan. Tă bah nĕ ntop kơl an hăng rhiăng kon se n’hanh kon hŏk dơi geh. Yuh Lý Thị Hồng Trị, Kruanh Ban mpôl kơl kan ngih dak nkual Tây Nguyên (mpeh tâm Ntŭk kơl kan Ngih dak, Trung ương Đoàn) uănh lah, aơ ngoăy tâm âk câu lạc bộ kơl kan yor ntŭk gŭ rêh ntoh lư ta Dak Lak n’hanh lĕ geh âk nău rgop dŭt n’hâm tâm ăp nău ƀư ntop kơl njrăng n’gang srê Covid-19, dơi Trung ương đoàn rnê rhơn tâm năm bah năp.

“Câu lạc bộ bah nô Mai Văn Chuyền ri dŭt lah nsôih tâm ăp ntrong leo trong kan kơl kan. Ta aơ lah nai yơn ăp băl dŭt n’hâm n’hanh ăp nău ƀư bah ăp băl dŭt khlay, ntuh kơl an kon hŏk. Ntĭt nsa ntĭm nti an ăp oh mô gĭt, nuĭh ach o mô geh ndơ gay hăn nti. Kơl ndrôm sam ƀŭt rnôk ăp oh nchrăp lăp năm nti, ao răm, bảo hiểm y tế. Rƀŏng tât an ăp băl kon hŏk ta nkual jru ngai an ăp băl geh nti n’hanh nsrôih rlău jêr jŏt.

Lôch năm 2021, ăp nuĭh câu lạc bộ yor mpôl oh he nkuăl Cư M’gar lŏ rgum rƀŭn, ndrel tâm nchră gay joi trong ăp nău nchrăp kan kơl nuĭh tâm năm mhe. Hôm e nău rƀŏng nsum lah rƀŏng tât kon se nkual jêr jŏt, câu lạc bộ n’gluh an tay ăp bôk nău kan khlay, kơt an thẻ bảo hiểm y tế an kon hŏk jêr jŏt, pơk jrô nti mpeh rplay sam ƀŭt, nău blău an ăp oh dơi ntop soan hăn ndrel đah ăp oh. Knơm nĕ, ntop âk kon se dơi ntop kơl, ntop tay soan n’hanh tơm prăk gay nti nsơm, mât rong nău ŭch rŏng, jêng nuĭh uĕh an rnăk wâl, nău rêh jêng.

          Nuĭh rblang: Y Sưng Phê Ja