VOV4.M’nông - Săch nuĭh ntoh măt an Quốc hội khóa 15 n’hanh HĐND ăp gưl năm kan 2021-2026 lah nău chính trị khlay bah neh dak, lah di an nuĭh ƀon lan ƀư tĭng nău dơi ƀư tơm tă bah nău săch, săch ăp nuĭh ntoh măt ntoh lư, ngăn ngên gĭt blău, tâm di ntoh măt an nuĭh ƀon lan ta Quốc hội n’hanh HĐND ăp gưl. Yor nê, nău ntĭm rđau tâm trong kan mbơh, nkoch trêng săch nuĭh ntoh măt an Quốc hội khóa 15 n’hanh HĐND ăp gưl năm kan 2021q-2026 an dơi ăp ngih pah kan, rmôt kan bah Trung ương tât ƀon lan uănh tât, ƀư đah âk trong êng gay rgop dŭt n’hâm tâm nău lôch uĕh bah rơh săch.

         Ndrel đah đah lam dak, ăp nkual rnoi mpôl đêt dôl ntrôl dăng trong kan nkoch trêng đah âk trong êng êng, gay kơl nuĭh ƀon lan wât kloh mpeh nău khlay bah rơh săch n’hanh nău kan đah n’ha phiếu bah nơm, Bôk khay 3/2021, Hội đồng săch rnoi mpôl đêt-Ủy ban Dân tộc lĕ an Tring nchrăp 1449 mpeh mbơh ƀư tâm trong mbơh, nkoch trêng rơh săch nuĭh ntoh măt an Quốc hội khóa 15 n’hanh ntoh măt an Hội đồng nhân ăp gưl năm kan 2021-2026 đah nkual rnoi mpôl đêt.

         Tĭng nê, nkô̆ nău nkoch trêng rgum rgum mpeh nău rƀŏng, nkô̆ nău n’hanh nău khlay bah rơh săch; ăp nău mbơh pháp luật geh tât kơt: Hiến pháp 2013, Luật săch nuĭh ntoh măt Quốc hội, Luật săch nŭh ntoh măt HĐND ăp gưl an aƀaơ; ăp săm ƀŭt ntĭm mpeh săch bah ngih dak, sam ƀŭt bah Ủy ban thường vụ quốc hội n’hanh Hội đồng săch ngih dak.

         Nkoch trêng ăp nău ƀư, mpeh nău dơi săch, nuĭh dơi săch bah nuĭh ƀon lan n’hanh nău kan nuĭh ƀon lan tâm rnôk râng săch.

Nkoch trêng mpeh nău kơl bah nuĭh ƀon lan, nkual rnoi mpôl đêt đah trong hăn rgâl mhe bah Đangr; Ntrong leo tâm rlong ndâk njêng mbah rhơn rơh săch; rnê nkhôm ngăch ăp ntŭk kan n’hanh êng nuĭh geh uĕh nău kan tâm trong kan săch, ngăn lah trong kan săch ta ăp nkual geh mpôl rnoi đêt gŭ rêh, nkual yôk yang, n’harr bri, dŭt jêrr jŏt.         

         Nkoch trêng mpeh nkô̆ nău ăp rơh mâp nuĭh ƀon lan, mpeh nău rêh n’hanh nău kan bah ăp nuĭh dơi săch, lơn lah nuĭh dơi săch lah rnoi mpôl đêt, nuĭh dơi săch ta nkual rnoi mpôl đêt, nuĭh dơi săch lah nuĭh rnoi mpôl đêt nuĭh, nuĭh dơi săch ta nkual jêr jŏt.

         Nkoch trêng mpeh trong kan rhŏ, tŏng ăp an rơh săch uĕh n’hanh nkoch trêng mpeh jêh rơh săch, tâm rgop trong kan njrăng n’gang srê Covid-19.

Aƀaơ, ăp nkual jru ngai dôl nsrôih ntrôl dăng trong kan nkoch trêng săch tât ăp ƀon lan, kơl ƀon lan ăp rnoi mpôl đêt wât mpeh nău dơi n’hanh nău kan bah nơm tâm rơh săch êp tât. Gưl ủy n’gâng kan ƀon lan lĕ săch ăp cán bộ pah kan rgŏ jă ƀon lan wât nău ngơi rnoi đêt, gĭt blău mpeh trong kan rgŏ jă, tâm rgop rjăp đah nkoch trêng nău mĭn nkoch trêng đah mbung. rmôt công an xă chính quy, n’har bri, mpôl druh ndăm, rmôt bu ur... dơi rgŏ jă gay râng “nău kan nkoch trêng”. Wa Nguyễn Thị Hồng Vân, Groi Kruanh MTTQ Việt Nam, n’gor Lạng Sơn an gĭt:

         “Mpôl hên lĕ ndâk njêng trong nchrăp gay ntrôl dăng trong kan nkoch trêng mpeh săch đah trong ƀư nkoch trêng an ngăn ngên tâm di, ngăch yơn an săk rnglăy. Tâm nĕ rgum tât ăp nuĭh lah nuĭh ƀon lan ta nkual jêr jŏt, ƀon lan rnoi mpôl đêt ta n’har brio.... Bah nĕ nău rêng hvi, gay nar săch Quốc hội n’hanh HĐND ăp gưl năm kan 2021-2026 ngăn ngên nar rgum bah lam ƀon lan”.

         Gay tâm di đah nău rêh uĕh tĭng rnoi mpôl, nău nkoch trêng an kônh wa âk trong ƀư bah nău uănh, ntrŭt nsôr, dŏng ăp ntil ndơ mbơh nu nău mhe, uănh khlay ăp trong nkoch trêng đah mbung. Âk trong nkoch trêng ƀư mhe kơt mât uĕh nău tơm bah nuĭh dơi nsing nơm, ƀư njroh mprơ tâm nđŭr ta ăp rgum chợ mô lah nchih tay sam ƀŭt nkoch trêng săch đah nău ngơi rnoi mpôl đêt tâm nkual an dơh wât, dơh nkah gĭt.... Wa Phạm Thị Lan, Groi kruanh Ủy ban MTTQ Việt Nam n’gor Gia Lai mĭn lah săk rnglăy bah rmôt “nkoch trêng đah mbung” ta nkual jru ngai.         “Lơn lah ăp nuĭh nsing nơm ntoh lư, ăp bu ranh ƀon, kruanh tƀon sŏk nău ngơi bah khân pơng, sam ƀŭt ta ntŭk kơt Jarai n’hanh Bana gay njưal ăp nău mbơh tĭng nuih n’hâm nsum tât đah ăp nuĭh ƀon lan. Tă bah trong mbơh aơ âk kônh wa lơn lah nuĭh rnoi mpôl đêt khân pơng geh âk nău mô blău, mô wât, dŏng n’ha phiếu bah nơm gay săch ăp nuĭh tŏng ăp nău rêh, nău dơi gay râng nuĭh ntoh măt HĐND ăp gưl”.

         Dơi an lah, đah ntrôl dăng mbơh mpeh săch tă bah âk trong, uĕh lăng, nău nkoch trêng mpeh săch ta nkual jru ngai lĕ rgop dun tay ăp nău mĭn tih, nsŭk nsôr bah ăp nuĭh rlăng; kơl ƀon lan rnoi mpôl đêt wât kloh; Hăn nklăch phiếu rgop săch nuĭh gĭt blău, ntoh măt an nuĭh ƀon lan ndơ̆  nău kơl hunh ao.... kơl nău rêh bah khân pơng hao rklaih ach o, đăp mpăn nău rêh. Bah nĕ, ƀon lan rnoi mpôl đêt wât kloh mpeh nău tơm, nău kan bah nơm n’hanh nchrăp râng nar săch./.

Nuĭh rblang: Y Sưng Phê Ja