VOV4.M'nông: Nar 12/11/2020, Thủ tướng Chính phủ hŏ n'gluh an dŏng Quyết định 33/2020/QĐ-TTg mpeh rnoh di tâm pă nkual rnoi mpôl đê̆ n'hanh mpeh yôk yang tĭng rnoh hun hao lvang năm 2021- 2025. Aơ lah ntŭk  nsing khlay gay ăp n'gor an ƀư trong kan n'glăp nsum, ngăn ngăn n'hanh geh nău tam đah tĭng nkual rnoi mpôl đê̆, tŏng đah nău ŭch geh ngăn ngăn.

Tĭng si ƀŭt n'glêh an, ăp thôn dơi kơp dơn lah dŭt jêr jŏt mpeh nkual rnoi mpôl đê̆ n'hanh yôk yang ân lah thôn geh rnoh âk rnăk rnoi mpôl đê̆ tâm lĕ rngôch rnoh ƀon lan gŭ rêh đăp mpăn jêng du mpôl ntơm bah 15% let lơ n'hanh tŏng 1 tâm 2 rnoh: Geh rnoh rnăk ach o ntơm bah 20% let lơ (êng đah nkual Đồng bằng sông Cửu Long geh rnoh rnăk ach o ntơm bah 15% let lơ mô lah geh rlău 30 rnăk lah rnăk nuĭh rnoi mpôl đê̆ ach o); Geh rnoh rnăk ach o ntơm bah 15% tât ta nâm 20% (êng nkual Đồng bằng Sông Cửu Long geh rnoh rnăk ach o ntơm bah 12% tât ta nâm 15%).

Đah rnoh 2, ân tŏng geh 1 tâm 3 rnoh (geh rlău 60% rnoh rnăk ach o lah rnăk rnoi mpôl đê̆ tâm lĕ rngôch rnoh rnăk ach o bah thôn; mô hŏ geh trong hăn bah thôn tât nklang xã mô lah hŏ geh trong yơn rsong hăn dŭt jêr jŏt, lơn lah khay mih; mô hŏ geh trong rse điện gưl neh dak mô lah hŏ geh yơn rlău 30% rnoh rnăk mô hŏ dơi tât dŏng điện neh dak.

Nău tâm pă thôn dŭt jêr jŏt mha êng tĭng rnoh geh hun hao lah ntŭk nsing di năl dơi  nuĭh, ntŭk gŭ gay an ƀư ăp bôk nău kan, trong kơl rnoi mpôl đê̆ bah Đảng n'hanh Ngih dak tĭng rơh, đăp mpăn tâm di đah nău geh ngăn ngăn. Nsing kalơ nê, ăp n'gâng kan n'hanh ăp n'gor tĭng ƀư geh nău tam rnoh tât hŭch ach o jŏ jong ta nkual "rlŭng ach o" geh ndơ ma hun hao wăng sa- rêh jêng kon nuĭh dŭt jêr jŏt mha êng.

Sŏk nău ntĭt bah n'gor Thái Nguyên. Tĭng săk nchih uănh an dŏng thôn dŭt jêr jŏt mha êng nkual rnoi mpôl đê̆ n'hanh mpeh yôk yang lvang năm 2021-2025, Thái Nguyên geh 50 thôn dŭt jêr jŏt mha êng mpeh 22 xã bah 5 nkuâl lah:  Võ Nhai, Định Hóa, Đồng Hỷ, Phú Lương, Phú Bình. Tâm rnoh ăp xã, thôn, xóm luh bah săk thôn dŭt jêr jŏt mha êng bah n'gor Thái Nguyên, geh âk ntŭk hŏ ƀư lôch jêh bôk nău kan rdâk njêng ƀon lan mhe. Nău dja nơm geh ngăch rgum ăp tơm ndơ, tơm prăk an ntuh kơl lor ma ăp nkual dja, tâm nê ân nkoch tât ăp bôk nău kan rdâk njêng ƀon lan mhe, bôk nău kan 135, đề án 2037, ntơm bah nê hŏ rgâl lĕ rngôch wăng sa- rêh jêng kon nuĭh nkual rnoi mpôl đê̆ n'hanh mpeh yôk yang, rgâl nău mĭn bah n'gâng kan tâm dâng, tâm ban kơt bah nuĭh ƀon lan đŏng. Wa Nguyễn Thái Nam, Kruanh Ban dân tộc n'gor Thái Nguyên an gĭt:

“Đah nuih n'hâm nsrôih âk bah ăp gưl ủy n'gâng kan ta ntŭk, tât năm 2025, he mbra hŭch du n'gul rnoh xã dŭt jêr jŏt mha êng, nsrôih tât năm 2030, Thái Nguyên mbra mô hôm geh ntŭk jêr jŏt mha êng đŏng ôh".

Nău ŭch mô hôm geh ntŭk jêr jŏt mha êng lah du nău kan rgum tơm tâm trong kơl rnoi mpôl đê̆, tâm ban kơt nău ƀư jêng ngăn ngăn Nghị quyết Đại hội Đảng bộ n'gor Thái Nguyên bah năm kan mhe. Rnoh âk thôn, xã luh bah săk dŭt jêr jŏt mha êng ta n'gor Thái Nguyên hŭch mô dơn lah du nău nkah uĕh tâm wăng sa- rêh jêng kon nuĭh ma hôm lah ntŭk nsing gay rdâk njêng n'hanh an ƀư ăp trong kơl rnoi mpôl đê̆ tât rơh bah kơi tay. Wa Đỗ Danh Huân, Groi kruanh UBND nkuâl Đồng Hỷ, Thái Nguyên an gĭt mpeh trong nkra bah nkuâl.

“Mpôl hên rgum tâm nău rgâl nău gĭt êng bah kônh wa ƀon lan, mpeh nkô̆ nău jut jăng ji ngot hŭch ach, n'hao rnoh geh nău rêh bah nuĭh ƀon lan, ndop uĕh ăp tơm prăk n'hanh lam rêh jêng gay tĭng ƀư jut jăng ji ngot n'hŭch ach o”.

Nsing tâm nău mbơh bah ăp n'gor mpeh lôch jêh tâm pă nkual rnoi mpôl đê̆ n'hanh mpeh yôk yang tĭng di rnoh quy định ta si ƀŭt n'glêh an mbrô 33/2020/QĐ-TTg bah Thủ tướng Chính phủ, Ủy ban Dân tộc hŏ rgum nchih săk ăp thôn dŭt jêr jŏt mha êng gay n'gluh an dŏng si ƀŭt ƀư ntŭk nsing tor gĭt lor trong, kơt dŏng, tĭng ƀư ăp trong kơl geh tât tâm lvang năm 2021-2025.

Mhe aơ, nar 16/9/2021, Bộ trưởng, Chủ nhiệm Ủy ban Dân tộc hŏ ký Quyết định mbrô 612/QĐ-UBDT uănh an dŏng săk nchih 13.222 thôn dŭt jêr jŏt mha êng, lĕ ma: 11.179 thôn bah xã nkual III; 736 thôn bah xã nkual II; 1.184 thôn bah xã nkual I n'hanh 123 thôn bah ăp xã geh thôn mpeh nkual rnoi mpôl đê̆ n'hanh mpeh yôk yang ta 41 n'gor, nkual ƀon têh mpeh Trung ương. Tâm rnôk tĭng ƀư, lah geh tâm pă luh êng, n'glăp nsum, nchrai mô lah rgâl moh săk, UBND n'gor rđău đă ăp n'gâng kan dơi kan ôp uănh tay ăp tŏng lam lĕ rngôch, ntrŏng năl rnoh di n'hanh nchih si ƀŭt tĭng di quy định ta Quyết định mbrô 33/2020/QĐ-TTg nar 12/11/2020 bah Thủ tướng Chính phủ njuăl Ủy ban Dân tộc rgum, uănh năl di tay n'hanh n'glêh an rgâl di, kơi ntop. Nău n'glêh an dja geh nău tam kơp ntơm bah nar ký n'gluh an dŏng n'hanh rgâl Quyết định mbrô 433 nar 18/6/2021 bah Bộ trưởng, Chủ nhiệm Uỷ ban Dân tộc mpeh Uănh an dŏng săk nchih thôn dŭt jêr jŏt mha êng nkual rnoi mpôl đê̆ n'hanh mpeh yôk yang lvang năm 2021-2025./.

VOV 4- Nuĭh rblang: Điểu Thân