VOV4.M'nông: Bôk nău kan gưl neh dak hun hao wăng sa rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030 dôl tâm rnôk ƀư lôch jêh hao mbơh rblang Thủ tướng Chính phủ n'glêh an trong nchrăp ntuh kơl. Aƀaơ Ủy ban Dân tộc dôl nchrăp ăp si ƀŭt geh tât, lĕ ma geh ăp rnoh tât kan, nău way tâm pă tơm prăk, ăp Thông tư ntĭm nti an tĭng ƀư bôk nău kan. Ndrĭ rnôk an tĭng ƀư bôk nău kan dja ta ăp n'gor ri nău ntrŏng ntŭk an ƀư bôk nău kan mhâm ƀư? Nkô̆ way nkoch "Ndrel hăn nău dơi kon nuĭh" nar aơ nkoch tât nkô̆ dja.

Bôk nău kan gưl neh dak hun hao wăng sa rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021- 2030 mbra dơi tĭng ƀư ta ăp nkual rnoi mpôl đê̆ n'hanh mpeh yôk yang lah ăp xã, thôn geh rnoh âk rnăk rnoi mpôl đê̆ ntơm bah 15% let lơ. Ntŭk ƀư lah ăp n'gor dŭt jêr jŏt mha êng (lah ăp xã nkual III, thôn dŭt jêr jŏt mha êng tĭng lôch jêh geh ôp uănh ăp tŏng lam lĕ rngôch, tâm pă nkual rnoi mpôl đê̆ n'hanh mpeh yôk yang tĭng rnoh gĭt blău hun hao ta ntŭk tĭng n'gor tă bah Ủy ban dân tộc n'gluh an dŏng, lvang năm 2021 – 2025). Bôk nău kan dơi an ƀư ta ăp nkual wăng sa- rêh jêng kon nuĭh mbrơi hun hao đŏng; săk blău tơm nuĭh kan đêt; ntŭk ntô ndơ dŏng rbăn lhơ, lơn lah mpeh ntung trong; nău dơi but săm ji, kơt nti bah nuĭh ƀon lan hôm âk jêr jŏt....

Ăp xã, thôn mhe nkoch bah lơ nê mbra dơi Ngih dak an ntuh kơl lor ntŭk ntô ndơ dŏng, nta joi geh nău rêh, hun hao tơm nuĭh kan n'hanh ăp trong kơl đăp mpăn rêh jêng kon nuĭh an kon nuĭh dơi tât ăp ndơ rhŏ dŏng tơm, tĭng kơn ntruch huêt bah tâm ƀah rđĭl đah ăp nkual hun hao. Wa Quàng Văn Hương, Groi kruanh Hội đồng Dân tộc bah Quốc hội an lah:  

“Nkual nê lah nkual hŏ ach o hôm, aƀaơ ân n'hao âk ntĭm nti blău hăr ti kan, gay ƀon lan geh nău gĭt blău, ƀư njêng mơ dơi hun hao. N'hao săk blău tơm nuĭh kan tâm bôk nău kan nê geh đŏng, yơn aơ lah nău ŭch Đảng ngih dak mât uănh âk lơn, jêng lah he ân geh trong ƀư tâm ban kơt trong nkra đŏng, yor djăt ma geh du rơh mih têh, dak bŭk mô lah nuh srê dơm, ƀon lan roh lĕ klor, ndrĭ âk geh âk ntil gay nuĭh ƀon lan rnă nchrăp lor, ngoăy lah tâm  joi geh nău rêh, bar lah ân nâp jŏ, ntơm bah thú y tât njrăng n'gang nuh srê, trôk nar lơh."

Rlău ma nê, ntŭk dŏng ƀư hôm lah ăp xã jêr jŏt (xã nkual II): Lah ăp xã geh âk ƀon lan rnoi mpôl đê̆ gŭ rêh jêng ƀon nsum, hôm mô ăp tŏng ngoăy mô lah du đêt ntŭk ntô ndơ dŏng ntung trong n'hanh tât ăp ndơ rhŏ dŏng tơm lam rêh jêng kon nuĭh. Đah ăp xã nkual II, ngih dak mbra joi geh nău rêh, kơi ntop ntuh kơl du gâl ntŭk ntô ntung trong ndơ dŏng hôm pah pât, lơn lah tĭng ƀư ăp trong kơl đah kon nuĭh.

Ntŭk bôk năp hun hao (ăp xã nkual I) gŭ tâm săk dơi kơl bah bôk nău kan đŏng, lĕ ma ăp xã di rnoh rdâk njêng ƀon lan mhe; ăp xã geh rnoh rnăk ach  o ta nâm 10%. Yơn lah, đah ăp xã nkual I, bôk năp gay tĭng ƀư trong kơl đah kon nuĭh mpeh rnăk ach o, dăch kêng ach o.

Tĭng wa Ma Thị Thúy, Groi kruanh mpôl way rnâng kan Mpôl Đại biểu Quốc hội n'gor Tuyên Quang, nău tâm pă tơm prăk dja ân nsing tâm nău ŭch geh ngăn ngăn ta ntŭk, an lor ăp xã dŭt jêr jŏt, ntŭk dŭt jêr  jŏt mha êng gay nta trong dơh kơl ăp n'gor jêr jŏt ơm geh ndơ dŏng khlay mpeh ntung trong n'hanh ăp ndơ êng ƀa ƀă gay hun hao.  

          Nar 8/7 mhe aơ, Groi Thủ tướng Rnâng kan Trương Hòa Bình, Kruanh Ƀan rđău đă Trung ương Bôk nău kan gưl neh dak tât rnoh hun hao wăng sa - rêh jêng kon nuĭh nkual ƀon lan rnoi mpôl đê̆ n'hanh mpeh yôk yang lvang năm 2021-2030 hŏ ký ton Bôk nău kan pah kan năm 2021 bah Ƀan rđău đă. Tĭng nê, nuĭh lăp kan nsum Ƀan rđău đă Trung ương n'hanh ăp bộ, nhih pah kan tâm ban bộ, nhih pah kan mpeh Chính phủ (ăp bộ, nhih pah kan Trung ương), UBND ăp n'gor, nkual ƀon têh mpeh Trung ương tĭng nău dơi, nău kan dơi jao, ndăn ngăch an ƀư ăp nău kan, na nê̆: lôch jêh ăp tŏng si ƀŭt mbơh gŭ mĭn geh nău dơi tĭng ƀư Bôk nău kan; uănh  gưl bah lơ, hao mbơh rblang Thủ tướng Chính phủ uănh an dŏng N'glêh an ntuh kơl Bôk nău kan tĭng di quy định bah pháp luật mpeh ntuh kơl ngih dak; dăp rgum ăp tŏng Ƀan rđău đă n'hanh nhih pah kan kơl kan Ƀan rđău đă ta ăp gưl tĭng quy định bah pháp luật; leo ƀư mbơh gĭt jru lam lĕ rngôch, nkoch trêng gĭt tât ăp mpôl kan, ăp nuĭh geh tât n'hanh nuĭh ƀon lan mpeh Bôk nău kan n'hanh du đêt nkô̆ bah Đề án nkrum lam; nsŏng kơl, dăn đă ăp trong nkra rgum, âk ntil ăp tơm ndơ tĭng ƀư Bôk nău kan, lơn lah tơm prăk ODA n'hanh rgum tay tơm prăk lam rêh jêng kon nuĭh, rgop tâm di bah nsum mpôl gay kơi ntop an  Bôk nău kan...

Tâm rnôk kâp Thủ tướng Chính phủ uănh an dŏng ngăn Bôk nău kan, nău ân dơi ƀư aƀaơ bah Ban dân tộc ta ăp n'gor gŭ tâm săk geh kơl trong nchrăp kan ân ơm nsŏng kơl an UBND n'gor đă UBND ăp nkuâl, nkual ƀon têh ôp uănh tay ăp tŏng lam lĕ rngôch nuĭh dơi kơl, ntŭk dơi kơl, nchrăp lĕ rngôch rnoh ŭch geh prăk tĭng ƀư gay hao mbơh rblang gưl bah lơ geh nău dơi kan uănh năl di tay uănh an dŏng tĭng di quy định./.

Hoàng Thái/VOV4- Nuĭh rblang: Điểu Thân