VOV4.M’nông: Mât nâp nkuăl n’har bri mô êng knŭng ƀư nau kan mât bah rmôt nkuăl n’har bri hôm lah nau kan bah lam ƀon lan. Ndơn gĭt nau nê hŏ geh dơi Đồn Biên phòng Đăk Tiên, n’gâng kan ndrel ƀon lan xã Thuận Hà, nkuăl Dak Song, n’gor Dak Nông kơt tĭng nau kan, nsum n’hâm mât nkuăl n’har bri bah neh dak.

Tâm ăp khay du tŏ, wa Trần Bá Tuyết ndrel ă nŭih kan bah rmôt kan mât njok trong n’har bri tâm n’gâng ta Thôn 8, xã Thuận Hà lŏ ndrel cán bộ, tahen Đồn biên phòng Dak Tiên hŏ muih, rep, mât njrăng nkuăl n’har bri bah nkuăl. Wa Trần Bá Tuyết ndơn nau lah: “Kan nsum mpeh nau mât đăp mpăn nkuăl n’har bri bah neh dak lah nau mât đăp mpăn bah nau kan mât neh dak, nau tă geh jêng pah kan bah nơm. Yor ri, kônh wa mro râng ndrel đah ăp rmôt kan ndrel râng đah nsum mpôl rmôt tahen biên phòng mêt uănh, muih rep, răk kloh trong. Săk nŭih kŏ gay bonh đă, nkoch trêng ân kônh wa gĭt kloh lơn nau kan, nau khlay ndrel nau kan bah nau mât ƀư tơm nkuăl n’har bri ndrel nau njrăng, rdâng ăp phung tih dôih”.

Tĭng Đại uý Lương Văn Phú, Chính trị viên Groi Đồn Biên phòng Dak Lak, nau kan tâm rgop gay ma mêt uănh, nkân njrăng, muih rep, răk trong nkuăl n’har bri geh nau tâm rgop nsum ndrel mât ƀư ân ueh, săk tam. Ăp nŭih kan nsum râng ueh, gơih, uănh aơ lah nau kan bah nơm. Mô êng kơt nê, ăp rnôk ƀư nau kan tâm mir, lah saơ geh nau mô ueh, ăp nŭih mô năl, kônh wa kŏ ngăch mbơh ân n’gâng kan, tahen biên phòng gĭt.

Trong hăn nkuăl n’har bri Việt Nam-Campuchia yor Đồn biên phòng Đăk Tiên mât jong nklăp 10km. Uănh năl nau kan mât nkuăl n’har bei mô êng lah nau kan bah rmôt tahen Biên phòng ma hôm lah nau kan bah lam bon lan, rmôt kan hŏ uănh khlay, ƀư ueh nau kan kơl tâm nchră nau đah gưl uỷ, n’gâng kan, nkuăl tâm nau ntrŭt dăng nau kan lam ƀon lan râng ueh nau kan nau kan bah gưl uỷ, n’gâng kan tâm nkuăl ntrŭt dăng nau mât njôk trong n’har, n’gâng n’har, mât ueh tâm thôn, ƀon.

Tĭng Trung tá Nguyễn Huy Hiếu, Kruanh Đồn Biên phòng Đăk Tiên, đah nau kan tâm dăch dơh, gĭt kloh nau vay ơm, nau rêh bah kônh wa, ntơm bah gưl uỷ, n’gâng kan, rđau kan ân tât ăp cán bộ, tahen, ngăn lah Rmôt bonh đă ƀon lan, tâm rnôk ƀư nau kan mro geh nau tâm rgop ffah gưl uỷ, n’gâng kan, ăp rmôt kan bah nkuăl gay ma ntrŭt dăng nau kan nkoch trêng ân ƀon lan gĭt kloh mpeh nau ntrŭnh geh tât nkuăl n’har bri.

Tâm ăp năm êp aơ, ƀư tĭng nau rđau mrô 01 bah Thủ tướng Chính phủ mpeh nau ƀư nau kan “Lam ƀon lan râng nau mât nkuăl neh, rnă njrăng nkuăl n’har bri bah neh dak tâm rơh mhe” ndrel nau ntrŭnh mrô 33 bah Bộ chính trị mpeh “Nau kan mât neh dak tâm rơh mhe” rmôt kan hŏ ƀư ân ueh nau kan noch trêng, bonh đă ƀon lan ƀư ueh ueh ntrong kan, nau ntrŭnh bah Đảng, pháp luật bah Ngih dak. Nkre, ăp rmôt kan mât njrăng nkuăl n’har bri geh ndâk, ăp nŭih lah nŭih ƀon lan, geh nau kan ndrel rmôt tahen mât njrăng nkuăl n’har bei bah neh dak.

Đồn kŏ n’hao tay du hê cán bộ râng nau kan Đảng uỷ xã ndrel đă cán bộ đảng viên tât pah kan rƀŭn nsum đah chi bộ thôn, ƀon, ƀư nau kan ân rnăk vâl. Ăp cán bộ rmôt, pah kan tâm nkuăl di ndăn nŭih geh bu rnơm kơt lah bu ranh ƀon, kruanh ƀon gay ma nkoch trêng, bonh đă, kơl an ƀon lan gĭt klih ăp nau tât tâm nkuăl n’har bri, n’gâng n’har gay ma gĭt dơi nau kan nơm mât njrăng, mbơh ân năn ăp nau kan ƀư tih nkuăl neh nơm.

Năm 2020, ƀư nau kan nkre mât njrăng nkuăl n’har bri nkre njrăng rdâng srê Covid-19, Đồn biên phòng Dak Tiên ndâk 3 rmôt kan nâp ndrel vay tâm rgop mro đah ăp rmôt, ăp ntŭk mât njrăng trong, nkân njrăng tâm ăp ntŭk trong pơk êng, mât rjăp, mô ân geh nau lăp tih dôih bah nkuăl n’har bri.

Đồn Biên phòng Dak Tiên hôm kơl an ƀon lan tuch tăm, pĕ lih ndơ tuch tăm, ôp khâl, pa ưnkhâm ndơ, khám săm ji, kơl an prăk ân rmôt kan bah nkuăl. Rmôt kan kŏ pă ndrôk ntil ân nŭih ach o tâm xã Thuận hà ndrel ndơn mât chăm du hê oh kon se geh nau rêh jêr jŏt, kơl an 2 kon se nti rêh ach o nti blau. Ăp nau kan ueh ăp nar bah cán bộ, tahen tâm Đồn Biên phòng Đăk Tiên hŏ ƀư nâp tay nau rnơm bah ƀon lan tâm Đnảg, Ngih dak, tahen kơl rgop nau ndâk njêng nuih n’hâm ƀon lan ân nâp, mât nâp nau rnă njrăng tâm nkuăl n’har bri bah neh dak nơm.

Wa Trần Lê Cường, Bí thư Đảng uỹ xã Thuận Hà, nkuăl Dak Nsong, n’gor Dak Nông lah rjăp: “Hăn nsum đah kônh wa tâm nau ndâk njêng ƀon lan mhe, cán bộ, tahen Đồn biên phòng Dak Tiên hŏ kơl an ueh ngăn ân ăp nkuăl nau kan ngăn. Tâm nê geh dơi nau nkoch tât nau kan ndâk ntrong kan chính trị tâm dâng, hun hao đảng viên mhe, kơl an nau kan pah kan, nkra trong hăn, trong hoch dak, hun hao ăp nau kan kơl an ƀon lan hun hao văng sa. Tă bah nê, ăp nŭih ƀon lan geh nau kan nâp lơn tâm nau râng mât nau rnă njrăng nkuăl neh, rnă njrăng nkuăl n’har bri, ngăn lah ndâk njêng nuih n’hâm ƀon lan ân nâp”./.

Nŭih rblang: H’Thi