VOV4.Mnông-   Kahgĭt 75 năm nar lam dak tâm lơh tâm su nar 19/12, ôi nar 17/12, mpôl đại biểu nkuăl ƀon têh Hà Nội lĕ tât an kao ta ntŭk ndah rup “Khĭt săk gay ma ngih dak dâk rêh”, ntŭk tăm kao Hàng Đậu, phường Quán Thánh, quận Ba Đình. Nar 19/12, 75 năm ba năp, ƀư tĭng nău kuăl jă bâh lam dak tâm lơh bâh kruanh Hồ Chí Minh, tahen n’hanh ƀon lan Hà nội lĕ n’hao prêh chông cờ “Khĭt săk rgâl an neh dak dâk rêh”, rgâl ta ăp trong ƀon têh, ăp ngih jay jêng ntŭk tâm lơh mbơh ntŭk krap nde an ƀon lan, lĕ tahen lơh rlăng. Ryơk rnê an kao ta ndup ndah “Khĭt săk rgâl an neh dak dâk rêh”-Nău ntĭt an nău tâm lơh têh dăng bâh tahen n’hanh ƀon lan thủ đô tâm 60 nar măng tâm rdâng đah Pháp ta dŭt năm 1946, bôk năm 1947, nuĭh leo kan nkuăl ƀon têh mpơl nău lah ueh tâm rgop kan têh, nău khĭt ji bâh ăp rơh nuĭh bơ̆ che hăn ba năp, ăp tahen, ƀon lan lĕ ƀư jêng nău nkoch rêng, lah nău ryơk n’hao bâh nuĭh Hà Nội nar aơ n’hanh ba kơi tay. Nuĭh leo kan nkuăl ƀon têh nsrôih leo kan Đảng bộ, n’gâng kan, tahen n’hanh ƀon lan Hà Nội an geh n’hao tay nău way ơm tâm rnglăp, nsum soan, nsum du nuih n’hâm rdâk njêng n'hanh hun hao thủ đô an tâm di đah nău kan lah ntŭk bôk năp tơm khlăy bâh nău kan chính trị- hành chính ngih dak bâh lam dak.

Nuĭh rblang: Thị Đoắt