VOV4.M’nông - Tâm nău mbơh trong kan năm kan khóa 14 bah Quốc hội mĭn lah: năm kan bah năp lĕ lôch jêh đah ăp săk rnglăy uĕh lĕ rngôch ta ăp nău kan bah ndâk njêng pháp luât, groi nđôi, ntrŭnh nău khlay bah neh dak tât tâm rnglăp nchră nău bah dih nghị viện. Tă nĕ, lĕ rgop ndŏ neh dak nâp nâl rlet rlău jêr jŏt, jêng ăp nău rgâl uĕh, têh dăng tâm nău rêh wăng sa-rêh jêng, mât njrăng bri dak, rnă njrăng, tâm rnglăp nchră nău, rgâl uĕh n’hanh n’hao nău rêh nuĭh ƀon lan.

Năm kan Quốc hội khóa 14 lĕ ntrôl dăng n’hanh n’hao uĕh trong kan ndâk njêng pháp luật, geh nkô̆ nău pháp lý tâm ban an nău hun hao ngăch, nâp nâl bah neh dak. Tâm năm kan mhe rlău, đah 72 luật, 02 pháp lệnh n’hanh âk nghị quyết geh quy phạm pháp luật dơi mbơh lĕ geh nkô̆ nău pháp lý an nău rgâl mhe, n’hao tam, săk rnglăy nău kan bah n’gâng kan ngih dak; mât uĕh ƀon lan ƀư tơm n’hanh dơi ƀư tơm bah nuĭh ƀon lan; ntrôl hun hao wăng sa nchrŏng trong xã hội chủ nghĩa.

Kruanh Quốc hội Nguyễn Thị Kim Ngân an gĭt, trong kan groi nđôi dơi uănh khlay, nkô̆ nău groi nđôi geh jru tơm tâm nău kan, uănh lĕ rngôch ăp nău kan, nar lơ n’hao tam, săk rnglăy, dơi geh săk rnglăy khlay, dơi nuĭh ƀon lan uănh lah prêh. Tă bah nău ƀư groi nđôi mĭn lah di bah nău kơl, pháp luật, mât uĕh tay ăp nău ƀư uĕh, ngăch saơ nău n’hŭch, jêr jŏt. Groi nđôi bôk nău way kan hăn jru lơn, săk rnglăy na nê̆ đah 7 bôk nău way kan geh tât hun hao wăng sa-rêh jêng n’hanh nău rêh nuĭh ƀon lan; geh trong dơi rgâl, nar lơ uĕh, n’hanh blău lơn.

Jrô rƀŭn Diên Hồng-Jay Quốc hội Việt Nam

“Ôp n’hanh ơh nău ôp geh âk nău rgâl mhe, ngăn lah trong ƀư “ôp ngăch, ơh ngăch” lĕ nta an n’hao đah rnoh đại biểu Quốc hội ôp, tâm rlach, n’ăp đah nkô̆ nău n’hanh uĕh nău ôp, nău ơh, jêng mông nar răm n’gôr, wăch rgum uănh tât lơn lah bah đại biểu Quốc hội, nuĭh dơi hăn săch n’hanh nuĭh ƀon lan lam dak. Nău sŏk phiếu nsing nơm đah nuĭh mât tay nău kan tă bah Quốc hội săch mô lah uănh an dơi ƀư rjăp, rgop tay ƀon lan ƀư tơm tâm nău kan bah ngih pah kan ƀon lan đă kơt tâm nău rêh jêng kon nuĭh”.

Quốc hội khóa 14 lĕ uănh mĭn tay, ntrŭnh âk trong khlay bah neh dak, geh ntrŭt têh tât nău rêh wăng sa-rêh jêng, hun hao nkual yôk ƀơn lan rnoi mpôl đêt, hăn ndrel đah nău kan đăp mpăn mât njrăng bri dak, rnă njrăng, tâm rnglăp nchră nău. Quốc hội lĕ ntrŭnh an ntuh kơl ăp nău nchrăp ƀư, ndơ ƀư khlay ngih dak, geh nkô̆ nău khlay têh đah nău hun hao wăng sa-rêh jêng bah neh dak kơt ndâk njêng du đêt gưl trong cao tốc ta Bắc-Nam mpeh bah lơ luh nar lvang 2017-2020, ăp nău nchrăp ƀư bah nău nchrăp ndâk ƀư tach ndeh păr quốc tế Long Thành; an nsrŭng ƀư tĭng nău ntrŭnh ntuh kơl nău nchrăp ƀư điện hạt nhân Ninh Thuận....

Trong kan nuĭh kan dơi uănh mĭn tay, ƀư rjăp, rlăp na nê̆, di trong, tâm di nău ŭch ngăn n’hanh dơi geh nău tâm ban âk. Nău uănh mĭn tay, ntrŭnh an ndâk njêng, nglăp ndrel, nkra an di n’har neh n’hanh dăp ăp ntŭk kan hành chính gưl nkuăl, gưl xă ta ăp n’gor, nkaul ƀon têh tâm Trung ương lĕ rgop ƀư geh săk rnglăy nău ntrŭnh bah Đảng, Nghị quyết bah Quốc hội mpeh ngăch dơh rmôt kan n’gâng kan ƀĭt joet, ntrôl hun hao wăng sa-rêh jêng, đăp mpăn mât njrăng bri dak, rnă njrăng, đăp mpăn nău rêh jêng kon nuĭh ta ntŭk. Ăp đại biểu Quốc hội lah ntung nthoi khlay đah Quốc hội n’hanh nuĭh ƀon lan tă bah nău djăt, lah di ngăn ngên, nău ŭch bah nuĭh ƀon lan tâm ngih rƀŭn kơt nkoch trêng ndơ̆ nău kơl n’hanh nău ntrŭnh bah pháp luật tâm nău rêh. Kruanh Quốc hội Nguyễn Thị Kim Ngân mĭn lah:

 “Năm kan Quốc hội khóa 14 lĕ lôch uĕh đah âk săk rnglăy uĕh lĕ rngôch ăp nău kan bah ndâk njêng pháp luật, groi nđôi, ntrŭnh an nău khlay bah neh dak tât tâm rnglăp nchră nău nghị viện lĕ rgop ndơ̆ neh dak nâp nâl rlet rlău jêr jŏt, geh âk nău rgâl uĕh, têh dăng tâm nău rêh wăng sa-rêh jêng, mât njrăng bri dak, rnă njrăng, tâm rnglăp bah dih, rgâl uĕh n’hanh n’hao nău rêh Nuĭh ƀon lan, rgop têh tâm nău geh dŭt khlay bah lăp nsum bơi 35 năm rgâl mhe, ƀư sâm ndrŏng tay nău way ơm 75 năm uĕh ang bah Quốc hội.

Nkhêp di rơh aơ, ndơn măt Quốc hội, Kruanh Quốc hội Nguyễn Thị Kim Ngân mbơh nău lah uĕh ngăn ngên n’hanh têh jru ngăn tât lĕ rngôch rnoi mpôl n’hanh nuĭh ƀon lan lam dak lĕ nsing nơm an nău kan khlay bah nuĭh đại biểu ƀon lan; nău tâm rgop, nsum mpôl nău kan bah Kruanh dak, Chính phủ, Ủy ban trung ương Mặt trận Tổ quốc Việt Nam, Ngih phah dôih gưl prêh, Viện kiểm sát ƀon lan gưl prêh, ăp ngih pah kan, rmôt kan kơt nău kan ndrel, nău kơl bah băl mpôl lam ntŭr neh.

Nuĭh răk rblang: Y Sưng Phê Ja