VOV4.M’nông – Kêng măng 4/1, tâm nchră ta rmôt mpeh dự thảo Nghị quyết nău kơl năm bah năp tay, prăk kaih gay kơl bôk nău kan rdâk nkra tay n’hanh hun hao wăng sa-rêh jêng, ăp nuĭh ntoh măt tâm ban ŭch an nău kơl prăk kaih tâm năm bah năp tay, gay rdâk nkra tay, hun hao ngăch nkra njêng tăch rgâl; đăp mpăn nău rêh jêng. Bôl ndrĭ, du đêt nuĭh ntoh măt nkoch nău klach rvê mpeh ăp nău kơl prăk kaih năm bah năp tay dơi ƀư jêng tât “roh mpăr” prăk kaih, “roh mpăr” neh ntu. Nkre, dăn đă nău kơl prăk kaih năm bah năp rgum tâm ăp nău kan, ntil nău an dơi ntrŭt hao, geh tam rêng hvi. Ăp nuĭh ntoh măt an lah mô hŏ geh tâm ban đah nău kơl năm bah năp n’hanh nău kơl prăk kaih tâm dự thảo Nghị quyết gay kơl Bôk nău kan rdâk nkra tay n’hanh hun hao wăng sa-rêh jêng. Tâm nchră ta rmôt, Kruanh dak Nguyễn Xuân Phúc đă ntop tay rmôt trong mkra ƀư hao săk rnglăy dŏng tơm prăk ngih dak, tŏng ăp sŏk an tơm prăk ngih dak nâp nâl, geh nău kloh rah wah bah tơm prăk n’hanh n’hao nău tâm pă bah ndơ soay. Nuĭh ntoh măt Nguyễn Trường Giang, mpôl ntoh măt Quốc hội n’gor Dak Nông tâm ban ŭch đah nău ntrŭnh mô sŏk, n’hŭch du đêt ntil soay, prăk sŏk, tâm nĕ n’hŭch soay giá trị gia tăng 2% kơt tĭng an ăp ntil ndơ soay tăch 10%. Yơn lah, nuĭh ntoh măt dăn đă an uănh tay nuĭh kơt tĭng, rgum tâm ăp nău kan, ntil nău an dơi ntrŭt hao, geh tam rêng hvi. Ăp nuĭh ntoh măt dăn đă rnôk Nghị quyết dơi mbơh an, Chính phủ n’hanh ăp n’gâng kan, nău kan tâm ton, ƀư kloh nău kan chính trị, nău kan mbơh rblang, êng nuĭh dơn trok, ngăn lah nău kan nuĭh djôt bôk tâm ntĭm rđău, ƀĭt joet n’hanh groi nđôi tâm rnôk ƀư tĭng nău ntop kơl, tŏng ăp di nău rƀŏng, dêr nău mplư rlăm nău kơl, tŏng ăp geh săk rnglăy n’hanh di.

Quốc hội tâm nchră dự thảo Nghị quyết mpeh nău kơl năm bah năp tay, prăk kaih

Jêh rnôk djăt Chính phủ mbơh nau mbơh bah 3 nau nchrăp nchră nau ntrŭnh ndrel du nau nchrăp luật tâm rơh rƀŭn tal bah Quốc hội gưl 15, Rmôt kan ntoh măt Quốc hội n’gor Dak Lak hŏ tâm ban nau ndrel rnê prêh ngăn ăp bôk nau kan hŏ năn ndơ̆ luh nkô̆ nau khlay, ndal ân nau ndâk tay nau văng sa rêh jêng. Ăp ntoh măt kŏ rgop nau mpeh nau nchrăp nau ntrŭnh, prăk kaih gay ma kơl an Bôk nau kan ndâk ndrel hun hao văng sa, rêh jêng. Yơn lah, wa Lê Thị Thanh Xuân ntoh nau rvê mpeh rnoh geh mrô ndơ̆ luh. Mpeh năm ƀư nau kan, wa Nguyễn Thị Thu Nguyệt, ân lah, nchrăp luh âk nau kan aơ ma năm ƀư nau kan tâm 2 năm lah gleh ir, ri ân geh nau kan ƀư ân geh mbơh rjăp:

‘Nau ƀư mhâm kan gay ma đăp mpăn nau săk tam dơi geh nkô̆ nau nchrăp luh ri chính phủ ân geh ăp nau mĭn njêng gay ma kơl an nau ntrŭnh du trong ân tâm di ndrel geh mhâm nau ƀư? Tal 2 đŏng, ân geh săch ăp nau ƀư nau kan lor gay ma geh ƀư ân ăp nau kan aơ ri mơ geh đăp mpăn tĭng nau săch. Ndri ma ân geh dăn nau đă lah nau bôk năp ndrel nau nsum ngăn Chính phủ ân geh uănh khlay ndrel ndơ̆ luh ăp nau kan, ăp nau jêr, ăp nau nkol ndrel mhâm ƀư gay ntrŭnh ƀư tâm 2 năm”./.

Nŭih blang: Y Sưng Phê Ja