VOV4.M'nông: Ta năp nô nău nuh srê Covid-19 tât krit nji, âk kon se ân gŭ rgum êng, tĭng groi nđôi, săm ji Covid-19 mô lah mâp dăch đah nuĭh geh ntưp Covid-19, Bộ Y tế hŏ geh si ƀŭt njuăl mbrô 7020 mpeh nău an gŭ rgum êng njrăng n'gang nuh srê Covid-19 đah kon se. Tĭng nê, Bộ Y tế an nuĭh mât chăm dơi hăn ndrel kon se tât ntŭk gŭ săm Covid-19, ntŭk wơt kơl mât săm Covid-19/ntŭk an gŭ rgum êng mô lah dơi gŭ ndrel kon se rnôk an gŭ êng ta jay đah nău ton ŭch gŭ rgum êng n'hanh kon se ta jay đăp mpăn pah kan njrăng n'gang Covid-19. Đah ăp nuĭh mât chăm kon se mô dơi hăn ndrel, gŭ ndrel gay mât chăm kon se ri n'gâng kan ta ntŭk tâm pă nuĭh mât chăm kon se, nchŏng đă cán bộ tâm ntŭk an gŭ kan dak si/ ntŭk an gŭ rgum êng mô lah nuĭh râng kơl êng mât chăm kon se geh ăp tŏng nău gĭt blău, nău dơi mât chăm, ntop kơl kon se. Đah kon se ta nâm 16 năm deh lah nuĭh Việt Nam, geh mâp dăch đah nuĭh ntưp Covid-19, ân gŭ rgum êng ta jay 14 nar kơp ntơm bah nar mâp n'glĕ dŭt đah nuĭh mĭn geh ntưp n'hanh tĭng groi nđôi tay n'hâm suan tâm 14 nar bah kơi nê./.

Nuĭh rblang: Điểu Thân