VOV4.M’nông: Đah trong way ƀư “Mô an geh nuĭh ntlơi bah kơi”, tâm khay bah năp, ngăn lah tâm lvang chôt srê Covid ntoh tay ta âk n’gor, nkual ƀon têh, nuih n’hâm “Nuĭh geh kơl n uĭh mô geh” lơ dơi mât uĕh mâp nâp dăng, hang rkeh nklâm ndơ bah ăp nuĭh lŏng bôk tôr, đê̆ đŏng bah ăp nuĭh đêt jêr jŏt lơn lĕ dơi njuăl tât ty âk rnăk ach o, rnăk êp ach o n’hanh nuĭh mô lap ăp nuĭh mô geh dơn naư kơl, ƀư khân pơng lơ răm rhơn.

          Nkre năp mray nău rêh, nkre mât rong an nuĭh sai geh ji chôt ndal, wa Phạm Thị Huệ, jay ta phường 8, quận 4, nkual ƀon têh Hồ Chí Minh kâp lĕ rngôch tâm nău tăch hủ tiếu. Nar nkhah srang kon nuĭh tă bah chôt srê Covid-19 jŏ jong ƀư rnăk wâl tâp tâm nău rêh jêr jŏt ngăn. Lah mô geh nău uănh kơl bah n’gâng kan ƀon lan n’hanh ăp rmôt kơl an, rnăk wâl wa jêr ma rlet rlău lvang nkhah srang kon nuĭh.

          “Gâp an nchăm jay 10 rkeh prăk gay năp mray nău rêh lah mô ri mô geh prăk. Mĭn ăp ntil hôm knŭng hôm e 500 rbăn prăk dơm. Chôt srê jŏ jong an nsrôih rlet rlău. Knơm ƀon lan, công an n’hanh Ủy ban, ăp rmôt kơl an gâp phe dak ngêt, prăk n’hanh ndơ tay, gâp dŭt lah uĕh”.

          Đah trong way ƀư “Mô an rnăk jêr jŏt geh ji ngot mô lah tăch proăch nar sa yor srê Covid-19”, ăp nklâm ndơ lah ndơ dŏng khlay kơt: phe, sĭk, dak mắm, dak ngi, ƀot ngot... dơi ăp rmôt kan, ăp gưl, rmôt kơl an an tât ty rnăk ach o jêr jŏt mô geh tâm nău nuĭh kơl bah ndơ ntop kơl 26 rbăn rmen prăk tĭng Nghị quyết 68 bah Chính phủ dơi dơn âk nklâm ndơ khlay. Wa Lê Đình Nhật ta nkuăl Thường Tín ngoăy tâm ăp rnăk ach o bah Hà Nội nkoch:

          Băng: “Ta năp nu nău srê Covid-19, Đảng, ngih dak lĕ uănh mĭn tât rnăk ach o mpôl hên. Bôl âk, bôl đêt ri aơ lah nklâm ndơ dŭt n’hâm ngăn ngên”.

          Năm 2020 n’hanh năm 2021 đah âk ntŭl rlong, rnôk nuĭh ƀon lan lam dak nkre njrăng rdâng đah srê Covid-19 nkre rŭn soan đah trôk nar, dak lip mro mrăng, nău rêh nuĭh ƀon lan lĕ jêr jŏt lŏ lơ jêr jŏt tay. Nkô̆ nău ƀon lan, nău tâm rgum, tâm pă dơi dâk hao, ndrel ty kơl nuĭh ach o, ƀon lan nkual dak lip, nău way ơm “Tâm yô̆ tâm kơl”, “nuĭh geh kơl nuĭh mô geh” dơi ntop hao têh dăng tâm play nuĭh Việt Nam. Bah meng nău uănh mĭn bah Trung ương Đảng, Quốc hội, Chính phủ, gưl ủy Đảng, n’gâng kan ƀon lan ăp ntŭk, he kơp dơn đŏng ăp nău ƀư uĕh bah ăp ngih pah kan, rmôt kan, ntŭk kan, êng nuĭh, ăp doanh nghiệp, doanh nhân, bôl dôl dŭt jêr jŏt tă bah chôt srê Covid-19 ƀư yơn hôm e kơl tay nuĭh ach o n’hanh ƀon lan geh trôk nar, dak lip.

Yuh Thành Thu Lương, Kruanh rmôt thiện nguyện Mùa Thu n’hanh ăp nuĭh băl lah ngoăy tâm ăp rmôt ƀư thiện nguyện, mô knŭng kuăl jă ăp nuĭh lŏng bôk tôr kơl an ăp nklâm ndơ an nuĭh ach o, nuĭh geh kop ji, ma hôm tăch ndơ lŏ mir an nuĭh ƀon lan, ƀư prăk nkrem ndâk ƀư jay dêr dak lip, ndâk ƀư ngih sam ƀŭt nkual prêh... Ăp nău ƀư bah ăp nuĭh, rmôt lĕ n’hanh dôl rgop âk soan kơl nuĭh ach o, nuĭh mô ngăch đah nuih n’hâm bah nơm.

          “Chôt srê ntoh tay ri ăp nuĭh ŭch da dê rgop du gâl gay ntop kơl ƀon lan. Jêh chôt srê aơ ri mbra ăp nuĭh rhoăt âk nău blău ơm an nău rêh, an săk nơm. Gâp saơ ăp nuĭh tâm kơl ndrel âk lơn, tâm rgum ndrel ndrel tay n’hanh ndrel ty gay mĭn an ntŭk gŭ rêh rlău bah năp dŭt âk”.

          Đah nău rƀŏng “Mô an nuĭh ƀon lan geh ntlơi bah kơi”, khay bah năp, âk ntŭk ta lam dak, ngăn lah ăp n’gor, nkual ƀon têh geh khuch hô yor srê Covid-19 kơt nkual ƀon têh Hồ Chí Minh, n’gor Bình Dương, Đồng Nai n’hanh ăp n’gor nkual Đông Nam Bộ n’hanh Dâng rđŭng dak me Cửu Long lĕ geh âk nău ƀư ngăn ngên uănh mĭn an nuĭh ach o. Rlău ma ăp nău kơl ndal kơt nău mbơh ƀư Nghị uyết 68 đah ndơ ntop kơl hao tât 26 rbăn rmen prăk mô lah mhe aơ ndơ ntop kơl 38 rbăn rmen prăk rlak bah tơm prăk nkrem bảo hiểm roh nău kan kơl nuĭh pah kan n’hanh doanh nghiệp mâp jêr jŏt tă bah chôt srê Covid-19. N’gâng kan ƀon lan ăp gưl ăp n’gor, nkual ƀon têh lĕ rlak tơm prăk n’gor geh âk ndơ ntop kơl nuĭh ƀon lan gay rlet rlău jêr jŏt. Bah meng nĕ, Hội chữ thập đỏ, Rmôt kan bu ur, Mpôl druh ndăm, Liên đoàn lao động, ăp rmôt kan rêh jêng,... geh ăp nău ƀư ngăn ngêt ntop kơl nuĭh jêr jŏt, mô ngăch, nuĭh pah kan ta ăp nkual jay gŭ geh roh nău kan. Wa Trương Thị Ngọc Ánh, Groi Kruanh Ủy ban Trung ương Mặt trận Tổ quốc Việt Nam an gĭt:

          “Trong way ƀư mpôl hên kuăl jă, kơl an nuĭh ach o năm aơ mô di lah an kơl tâm prăk nkrem yor nuĭh ach o ma dơi rgop đah prăk, đah ndơ, nuĭh geh ri kơl ndơ nĕ, tâm pă an ăp ntŭk dôl mâp jêr jŏt tă bah srê Covid-19 n’hanh ƀư tĭng di nău rƀŏng lah mô an du hê ach o, nuĭh jêr jŏt ma mô dơi uănh tât, ntop kơl. Nĕ lah he rgop gay ƀư răm ăp rnăk wâl jêr jŏt geh ăp nuih n’hâm, geh nău răm gay hun hao tâm nău rêh”.

          N’gâng kan Lao động-Thương binh n’hanh xã hội wa Đào Ngọc Dung mĭn lah, bôk nău kan n’hŭch ach o ta dak he lĕ dơi geh âk nău rƀŏng nâp, yơn hôm e âk nău njê, ŏk r’ah, lơn lah ‘n’gu tơm ach o” ta nkual rnoi mpôl đêt n’hanh khuch bah chôt srê Covid-19, âk nuĭh tâm nău ach o n’hanh ach o tay. N’gâng kan Lao động-Thương binh n’hanh Xã hội ndrel Mặt trận tổ quốc ăp gưl, ăp N’gâng kan, nău kan geh tât ƀư ăp trong mât uănh an nuĭh ach o:

          “Gâp an lah tĭng kơt Ntĭm đă 05, ŭch rklaih ach o n’hanh nău kan aơ ƀư tay ri Ngih dak an ƀư tơm ntĭm rđău. Tal 2 lah rgum ntop kơl gay ntrŭt nsôr hun hao bah nuĭh ach o, mô kâp knơm. Tâm nău nkra aơ mpôl hên n’gluh an n’hŭch dŭt n’hâm nău an dơm ma rgâl nău an trong lah ntop geh nău nkol n’hanh an manh, n’ăp ngân hàng chính sách tĭng trong nĕ đŏng. Tal 3 lah mât uĕh soan dăng bah lĕ trong chính trị, pă gưl ntuh kơl tơm tăm kơt rgŏ jă kon nuĭh. Rnoh an ƀư mhe geh âk lơn, nsrôih dŭt năm kan dơi geh 75% rnoh nău rêh an nuĭh ach o”.

Dơi mĭn lah, nuih n’hâm tâm yô̆ tâm kơl “Nuĭh geh kơl rgum nuĭh mô geh” dơi mât uĕh mro tâm ăp rnôk. Nău ƀư yor nuĭh ach o geh mô knŭng tâm khay 10 hô ngăn ma hôm lah nău ƀư dơi ƀư ƀa ƀơ tâm năm, đăp mpăn nău rƀŏng “Mô geh nuĭh ntlơi bah kơi”./.

                    Nuĭh rblang: Y Sưng Phê Ja