VOV4.M'nông: Nkô̆ nău rnoi mpôl đê̆ n'hanh pah kan rnoi mpôl đê̆ way geh ntŭk gŭ kan nâp jŏ tâm n'gâng kan rdâk njêng n'hanh mât njrăng neh dak. Ăp năm rlău aơ, nơm geh tơm prăk bah Ngih dak, ăp doanh nghiệp, ăp mpôl n'hanh ăp nuĭh, muh măt ƀon lan, lơn lah nkual ƀon lan rnoi mpôl đê̆ hŏ rgâl kloh. Ăp njăr trong ƀư lôch jêh hŏ kơl buăt nthoi ntung trong đah ăp ƀon lan uĕh lơn, ntung trong hun hao lơn. Yơn lah, rđĭl đah ăp nkual êng ƀa ƀă, nkual ƀon lan rnoi mpôl đê̆ hôm geh ntung trong rbăn lhơ, ndrel đah ăp nău đêt geh mpeh ntung trong jêng jêr hun hao ngăch, nâp dăng. Nău nkoch ƀư trong ta nkuâl yôk prêh Mù Cang Chải (n'gor Yên Bái) mbra an saơ kloh nkô̆ nău dja:

Nkoch mpeh ntung trong ta ntŭk he, wa Sồng A Trống, Kruanh UBND xã Chế Tạo, nkuâl Mù Cang Chải, n'gor Yên Bái nkoch:  

Xã Chế Tạo lah xã dŭt jêr jŏt mpeh ntung trong rsong hăn. Yor bri dak yôk nor sop nkăp bah xã tâng jru n'hanh ntơm ndơ ntuh kơl bah ngih dak đêt. Yơn lah xã dơi ntuh kơl dŭt âk đŏng yơn mô jêng lip tam đêt. Trong ndeh ôtô ri mhe hăn tât nklang xã dơm. Hôm lĕ rngôch ăp ƀon lan ri mô hŏ geh trong ndeh ôtô hăn tât. Trong ntơm bah aơ hăn tât nklang nkual 2 geh 17 cây số, aƀaơ khay wai ri hăn jŏ nklăp 1 mông hôm khay mih hăn nklăp 1 mông n'gul. Hôm ntơm nơh mô hŏ nkra nkra đêt ri geh 17 km trong ma hăn jŏ tât 2 mông mơ dơi tât".  

Đah ƀon lan ta nkual yôk prêh, nkual rnoi mpôl đê̆, geh trong bê tông hăn tât ƀon nê lah nău dŭt ŭch geh ngăn. Gĭt dơi nău wơl geh bah ƀon lan, rnôk Huyện ủy Mù Cang Chải rgŏ jă bôk nău kan "nar kêng dŭt pơh ndrel ƀon kan lŏ mir", hang rmưn cán  bộ, tahen pah kan ta nkuâl hŏ ŭch hao êng tât ăp ƀon lan yôk prêh gay kơl ƀon lan rdâk nhih jay, kăch rek mbo ba n'hanh lơn lah ƀư ntung trong hăn. Bí thư Huyện ủy Mù Cang Chải Nông Việt Yên an gĭt:

“Ndơ dja ri hŏ ntop kơl âk xi măng hôm. Kônh wa tâm rgop êng. Nkuâl rgŏ jă ntop kơl xi măng an dja. lôch nê kônh wa rgop lŭ, choih, nar pah kan. Nkuâl ntop kơl xi măng đah kỹ thuật. Mhe aơ nơh n'gor rgâl trong kan gay ntop kơl ƀư ntung trong hăn mha êng nê̆. Yơn ma mbra geh rmlông dak sor dĭl, mô di ƀư kơt kônh wa lôch bar pe tơ̆ mih lah dak rchoh lĕ. He đă lah ăp du khay, ăp cán bộ, đảng viên ân ntêm dŭt đêt lah 2 nar tâm nar prao mô lah nar pơh sĭt ƀon đah kônh  wa. Ntơm bah nău ƀư ntung trong, nkra trong, ƀư mhe, tuh bê tông ăp njăr trong hăn”.

Tĭng Tiến sĩ Hà Việt Quân, Rmôt rdâk njêng Đề án nkrum lam n'hanh bôk nău kan gưl neh dak tât hun hao wăng sa- rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021-2030 ri bol ma hŏ geh ăp nău dơi khlay tâm 35 năm rgâl mhe yơn lah nkual rnoi mpôl đê̆ n'hanh mpeh yôk yang hôm lah nkual dŭt jêr jŏt tâm lam dak đŏng, lơn lah nkô̆ nău mpeh ndơ dŏng ntung trong:

“Ntung trong ri tâm nkrum lam wăng sa rêh jêng kon nuĭh kơt lah du nău ŭch geh khlay bôk năp n'hanh geh du nău ngăn kơt he mhe nkoch nê ri hŏ geh du đêt ntŭk hŏ dŏng tơm ndơ ntuh kơl gay rgum nkra geh ntŭk ntô ndơ dŏng ntung trong đŏng yơn păng mô geh ăp nău tât ring tam ngăch dĭl tât nău rêh drăp ndơ n'hanh nuih n'hâm nkual rnoi mpôl đê̆ n'hanh mpeh yôk yang yor păng hôm geh âk ntil ndơ yơn nkô̆ way geh dŭt âk ma dŭt dơh mâp  lah tă bah ăp ntŭk nkual rnoi mpôl đê̆ ri khân păng mâp jêr jŏt mpeh tơm ndơ ntuh kơl ngăn ngăn lah nkual rnoi mpôl đê̆ mâp dŭt âk ntul rlong geh tât nău rgum n'hanh dŏng tơm ndơ ndrel tâm rnôk nê ri nău ŭch geh mpeh hun hao wăng sa rêh jêng kon nuĭh ri ân geh tơm ndơ dŭt têh".

Ngoăy tâm ăp nkô̆ khlay tâm bôk nău kan rnoh tât hun hao wăng sa rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021-2030 lah rgâl geh ntung trong hăn ta nkual rnoi mpôl đê̆. Ndrĭ tâm rơh ntuh kơl an hun hao wăng sa rêh jêng kon nuĭh bah nkual rnoi mpôl đê̆ n'hanh mpeh yôk yang jŏ jong mbra ân geh nău rgâl mhâm ƀư? Tâm ôp mpeh nkô̆ nău dja, tiến sĩ Hà Việt Quân mĭn lah:

“Trong nkra đăt ndal ri tĭng gâp ân rgum tâm nkô̆ nău way trong kan. Tâm nê ri lah ma nău way trong kan ri mbra rgum tâm bar trong kan tơm, lơn lah nău way trong kan mpeh mât dŏng n'hanh nău way  trong kan mpeh leo an ƀư nău way trong kan mât uănh ri mpôl hên geh nău gĭt êng lah ân geh ăp nău way ntrŭt nsôr ntuh kơl gay rgum dơi ăp ntil nuĭh râng kan wăng sa. Mô dơn lah nsing tâm tơm ndơ bah Ngih dak ma hôm ân nsing tâm tơm ndơ bah ăp doanh nghiệp n'hanh mô dơn nê ma hôm nsing tâm tơm ndơ bah nuĭh ƀon lan đŏng. Hôm nău way leo trong ƀư ri he dôl rgum joi trong luh ăp trong nkra geh tât trong nkra ăp nkô̆ nău kloh rvah tâm mât n'hanh dŏng tơm ndơ đŏng. Ăp nău way tâm pă tơm ndơ du trong kloh rvah, đăp mpăn gay ăp nuĭh dŭt jêr jŏt ri an ntuh kơl lor âk lơn n'hanh ăp nău way trong kan geh tât tĭng groi nđôi, grêt dêh n'hanh rgum nău tât râng bah nuĭh ƀon lan tâm nău groi nđôi, grêt tĭng đŏng”.

Ndrĭ, gay rgum, dŏng geh nău tam ăp tơm ndơ gay rgâl geh ntung trong, tŏng đah nău ŭch tât rnoh hun hao wăng sa - rêh jêng kon nuĭh nkual rnoi mpôl đê̆ n'hanh mpeh yôk yang lvang năm 2021-2030 ân geh ăp bôk nău kan trong kơl rgum lam lĕ rngôch jŏ jong đăp mpăn, ƀư bah ăp nău rbăn lhơ tâm rơh bah ri aơ nơh. Ân geh nău mĭn kơt trong tât mhe tâm rdâk njêng n'hanh tĭng ƀư trong kơl rnoi mpôl đê̆, tâm nê nuih n'hâm dơn kan, nău nsrôih bah nuĭh rdâk njêng nơm n'hanh dŏng ƀư trong kơl hôm lah tơm ndơ n'glêh an đŏng./.

Hoàng Thái/VOV4- Nuĭh rblang: Điểu Thân