VOV4.M’nông: Ăp nar dja, Ủy ban Mặt trận Tổ quốc ăp n'gor, nkual ƀon têh kan nsum đah  Ủy ban nhân dân ndrel gưl nchrăp ƀư tâm nchră mâp cử tri gay ăp nuĭh dâk tâm rlong tĭng ƀư nău dơi rgŏ jă bầu cử. Aơ dơi uănh lah du rơh "năl geh nău dơi" bah kơi tay gay uănh năl nău dơi kan, nuih n'hâm uĕh bah nuĭh dâk tâm rlong di, gĭt geh krêp dêh ngăn đah ƀon lan, djăt nău rgop bah ƀon lan, dơi ƀon lan nsing nơm...lah mô. Yơn lah, nău ma âk nuĭh ƀon lan uănh khlay lah nuĭh dâk tâm rlong ân geh bôk nău kan na nê̆ n'hanh mbra moh ndơ ƀư lah jêng nuĭh ntơh măt bah nuĭh ƀon lan.

  Pháp luật quy định nău ƀư an nuĭh tâm rlong mâp nuĭh ƀon lan ta rnôk mâp cử tri ta ntŭk he tâm rlong ân dơi ƀư geh nău tâm ban, mbơh kloh, di pháp luật, đăp mpăn rnă njrăng, đăp mpăn lam rêh jêng kon nuĭh. Rlău ma ăp rơh mâp nuĭh ƀon lan ta ntŭk nuĭh tâm rlong ri nău rgop jă bầu cử ma ăp bôk nău kan nkoch trêng nău lư nsum mpôl lah trong ƀư dŭt khlay gay ăp nuĭh tâm rlong dơi tĭng ƀư nău dơi rgŏ jă bầu cử đŏng.

  Nău ma ƀon lan uănh khlay lah nău nuĭh tâm rlong mbra moh ndơ ƀư rnôk jêng đại biểu quốc hội, đại biểu hội đồng nhân dân n'hanh moh ndơ ƀư rnôk jêng nuĭh ntơh măt ngăn an nău ngơi nuĭh ƀon lan. Cử tri Nguyễn Tâm Trinh, quận Đống Đa, Hà Nội mpơl nău:

“Mpeh bôk nău kan, nkô̆ nău lah moh ndơ lah, lah rnoh tât nsrôih lah moh ndơ? Ân lah aƀaơ geh ăp nkô̆ nău kơt: sa khâm, tĭng nău nŏng êng, rnă njrăng lam rêh jêng kon nuĭh. Nkô̆ nău khlay lah nuĭh ntơh măt an ƀon lan n'hanh mpôl hên saơ he geh nău dơi gay tĭng ƀư nău ŭch rŏng bah he n'hanh bah mpôl hên".

Cử tri Chu Văn Phương, nkual ƀon têh Việt Trì, n'gor Phú Thọ ŭch rŏng:

“Gâp dŭt mpŏng ăp nuĭh tâm rlong geh bôk nău kan bah he n'hanh ăp nău ton bah năp ƀon lan ân tĭng ƀư răp jăp bôk nău kan bah he. Ma bôk nău kan ƀon lan bu mbra tĭng groi nđôi dăch dêh tĭng bôk nău kan bah nuĭh tâm rlong n'hanh tĭng ƀư geh nău tam".

Dĭng geh nuĭh ƀon lan uănh khlay mha êng dja, lah yor ŭch ƀon lan tĭng di nuih n'hâm, ăp nuĭh tâm rlong ân geh bôk nău kan na nê̆, nkre đah ngăn ngăn đah ntŭk he tâm rlong. Yơn lah, ntơm bah nău ton tât nău kan hôm lah du lvang ƀah ngai, yor kơt nê̆ dĭng geh nău mĭn rnam ton ta du đêt nuĭh tâm rlong. Tĭng wa Lê Bá Trình, tă ƀư Groi kruanh Ủy ban Trung ương Mặt trận Tổ quốc Việt Nam: ăp rơh rgum mâp ƀon lan gay rgŏ jă bầu cử geh nkô̆ hôr tâm ban kơt du rơh năl di tay nău dơi kan, nuih n'hâm uĕh lŏng bah nuĭh tâm rlong gĭt di ngăn, krêp dêh ngăn đah ƀon lan, djăt nău rgop bah ƀon lan, dơi ƀon lan nsing nơm...Yor kơt nê̆, lah nuĭh tâm rlong mô geh bôk nău kan na nê̆, mô tĭng ƀư nău ton bah he, ri rup gui bah khân păng mbra geh roh hêng tâm măt ƀon lan. Mpeh trong luật pháp, mô hŏ geh nău way nchâp đă ăp nuĭh ntơh măt ân tĭng ƀư nău ton rnôk mâp nuĭh ƀon lan, yơn wa Lê Bá Trình mĭn lah, nău way nchâp đă dŭt têh lah nău nsing nơm bah nuĭh ƀon lan:

“Tĭng gâp ăp nuĭh tâm rlong mpơl kloh nău dơi kan, nău dơn kan bah he ma bôk nău kan na nê̆ gay ƀon lan saơ lah he kan dơi lah mô n'hanh jêh aơ tay groi nđôi, rnôk he ton đah ƀon lan mhâm nơh n'hanh rnôk hŏ dơi lăp hôm he tĭng ƀư trong nchrăp hŏ ton đah ƀon lan mhâm ƀư. Jêng ăp nuĭh tâm rlong ân geh bôk nău kan na nê̆ bah năp ƀon lan ri rnôk nê mơ geh bu rơih nău. Lah he ƀư tĭng trong ntơh măt dơm nuĭh ƀon lan djăt tĭng mô âk".

Du Quốc hội, Hội đồng nhân dân lah bah nuĭh ƀon lan ngăn, tă bah nuĭh ƀon lan n'hanh yor an nuĭh ƀon lan lah nău ma lĕ rngôch nuĭh ƀon lan ŭch rŏng. Wa Lê Như Tiến, du hê nuĭh tă tâm rlong n'hanh hŏ geh nău dơi tay tâm rơh Quốc hội, Groi Chủ nhiệm Ủy ban Văn hóa, Ntĭm nti, mom ndăm, druh ndăm rchong, kon se jê̆ bah Quốc hội an lah: Nău tă ơm gĭt rêh ngăn n'hanh lah ngăn he mĭn rvê đah nuĭh ƀon lan da dê. Gay nuĭh ƀon lan geh nău mĭn uĕh n'hanh nklăch phiếu an he jêng geh nău gĭt êng nchrăp ndê na nê̆ ăp ntil he mbơh rblang bah năp nuĭh ƀon lan rnôk rgŏ jă rơh bầu cử. Đah bôk nău kan bah nuĭh dâk tâm rlong đại biểu quốc hội, đại biểu hội đồng nhân dân ân kloh rvah, seh ƀhah n'hanh der lah nsum nsum. Ăp nuĭh tâm rlong ân nkoch kloh nău ŭch tât kan bah he lah dơi sơch lăp ƀư đại biểu quốc hội, đại biểu hội đồng nhân dân; ăp nuĭh ân gĭt wât kloh nău mha êng ntŭk he dâk tâm rlong n'hanh ndơ̆ luh ăp trong nkra, nsŏng kơl, trong kan na nê̆...ring tam tât nău hun hao bah n'gor n'hanh lam dak:

“Ăp nuĭh tâm rlong bôk năp khân păng mô hŏ gĭt blău “lah ngơi bah năp mpôl âk nuĭh, lah ngơi bah năp nuĭh ƀon lan, mhâm ƀư an lăp tâm bôk tôr bu djăt tĭng"

Nău ngơi ân hăn ndrel đah ƀư. Nău ton bah ăp nuĭh tâm rlong lah ntŭk nsing gay nuĭh ƀon lan groi nđôi nău kan bah ăp nuĭh tâm rlong rnôk hŏ dơi sơch ƀư biểu Quốc hội n'hanh đại biểu Hội đồng nhân dân tâm du bông nău kan bah he. Ndrĭ, ân geh du nău way nchâp đă gay an rlu ăp đại biểu Quốc hội n'hanh Hội đồng nhân dân i mô nkah tĭng nău ton bah he bah năp cử tri, bah năp nuĭh ƀon lan rnôk rgŏ jă rơh bầu cử./.

Nuĭh rblang: Điểu Thân