VOV4.M’nông – Ủy ban Văn hóa n’hanh ntĭm nti bah Quốc hội mhe tâm rgop đah N’gâng kan Văn hóa Thể thao n’hanh pâl nđaih n’hanh n’gor Nghệ An ƀư rgum nchră “Pâl nđaih Việt Nam-rdâk nkra tay n’hanh hun hao”. Ntoh ngơi ntĭm rđău rgum nchră, Groi Kruanh Rnâng kan Quốc hội Trần Thanh Mẫn mĭn lah, hun hao nău kan pâl nđaih lah du nău ntrŭnh têh bah Đảng, Ngih dak he. Chôt srê Covid-19 têh jŏ jong 2 năm lĕ khuch dŭt âk tât nău hun hao wăng sa-rêh jêng bah neh dak, tâm nĕ geh nău kan pâl nđaih.

Rgum nchră “Pâl nđaih Việt Nam-rdâk nkra tay n’hanh hun hao.

Yor khuch bah srê, tât aƀaơ, dak he mô hŏ wơt năch pâl nđaih dak bah dih, năch pâl nđaih tâm dak hŭch rlău 42% nkôp đah rơh aơ năm bah năp; dĭng lĕ sŏk bah năch pâl nđaih hŭch bơi 50%. Rgum nchră ƀư kloh nău tâm boh bah Bôk nău kan rdâk hao wăng sa-rêh jêng nsum bah neh dak đah ăp bôk nău kan, trong nchrăp, ngăn lah ăp nău kơl mpeh đăp mpăn njrăng n’gang srê gay pơk mpông đăp mpăn; ăp nău kơl n’hao dơi tâm rlong bah pâl nđaih Việt Nam tâm rnôk mhe.

Nuĭh rblang: Y Sưng Phê Ja