VOV4.M’nông: Lơ 29/12, rmôt hăn kan bah Rnâng kan Trung ương yor wa Hoàng Đăng Quang, Groi Kruanh Rnâng kan ƀư kan Trung ương ƀư tơm hŏ geh nar pah kan đah Rnâng kan n’gor uỷ Dak Lak mpeh “Nau uănh nau ƀư nau tam mât biên chế”. Lvang năm 2016-2021, n’gor Dak Lak hŏ n’huch rlau 10% rnoh biên chế geh jao ndrel dăp rgum tay ntrong kan tĭng nau ntrŭnh. Lam n’gor n’huch 466 nŭih tâm biên chế ăp ntŭk kan Ngih dak, n’huch 4.377 nŭih pah kan tâm ăp rmôt kan ndâk njêng bah ngih dak ndrel n’huch 543 nŭih tâm rmôt cán bộ, công chức gưl xã.

Tâm nar pah kan, wa Hoàng Đăng Quang, Groi Rnâng kan ƀư nau kan Trung ương đă n’gor Dak Lak lŏ ƀư kơp, ntop, ƀư jêh nau kan, nau dơi bah ăp n’gâng kan, ntŭk kan, nkuăl gay ma rklaih nau tâm rkăng, ƀư rjăp ntŭk ƀư nau kan, nau geh kan bah công chức, biên chế công chức. Lŏ dăp rgum ntŭk kan ân gleh, ueh, nsôih mô ntrŭnh ƀư nau tâm ban ma mô tâm di tâm nau kan biên chế./.

Nŭih rblang: H’Thi